မိူဝ်ႈၼႆႉ ဝၼ်းတီႈ 24/10/2023 ယၢမ်းၵၢင်ၼႂ် ဢူးမူဝ်ႇသေး ဢႃယု 40 ပီ ၵူၼ်းဝၢၼ်ႈလိုၼ်း ဢိူင်ႇမိူင်းၶွၼ် ၸႄႈဝဵင်း ၵဵင်းတုင် ၸိုင်ႈတႆးပွတ်းဢွၵ်ႇၶူင်း ထုၵ်ႇၵူၼ်းဢမ်ႇႁူႉၾၢႆႇ ၽၼ်းတၢႆ ၵိုၵ်းထဵင်ၼႃး တီႈႁိမ်းဝၢၼ်ႈ ၽွင်းမၼ်းၸၢႆး ၵႂႃႇၼွၼ်းပႂ်ႉၼႃးသေ ၼၼ်ႉ ဝႃႈၼႆ။
ၽူႈၶဝ်ႈၸုမ်းၸွႆႈထႅမ် တႆးၼိူဝ် ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၵဵဝ်ႇၵပ်းလွင်ႈၵၢၼ်တၢႆမၼ်းၸၢႆးၼႆႉ ႁဝ်း ၶႃႈ ဢမ်ႇ လႆႈႁူႉၸွမ်းလွင်ႈပိူင်ပဵၼ်မၼ်းၶႃႈ ယွၼ်ႉသင်လႄႈၺႃးၽၼ်းတၢႆ ဢၼ်ဝႃႈၼၼ်ႉ ယူႇတီႈၵူၼ်းပိုၼ်ႉတီႈ ၵပ်းၾူၼ်းၸူးၸုမ်း ႁဝ်းၶႃႈသေ ႁဝ်းၶႃႈ ၸင်ႇလႆႈၵႂႃႇႁပ်ႉဢဝ်တူဝ်တၢႆမၼ်းၸၢႆး မႃးသူင်ႇဝႆႉတီႈႁူင်းယႃလူင်ဝဵင်းၵဵင်းတုင်ၸိူင်ႉၼၼ်ၵူၺ်းၶႃႈ”- ဝႃႈ ၼႆ။
ၵဵဝ်ႇၵပ်းလွင်ႈၼႆႉ ယူႇတီႈ ပလိၵ်ႈမၢၼ်ႈၶဝ် တိုၵ်ႉၵူတ်ႇထတ်းတူၺ်း လွင်ႈပိူင်ပဵၼ်တႄႉ ငဝ်ႈႁၢၵ်ႈမၼ်း တီႈႁူင်းယႃလူင်ဝဵင်းၵဵင်းတုင်ဝႆႉယူႇ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 11/10/2023 ယၢမ်းၵၢင်ၼႂ် ၼၼ်ႉၵေႃႈ သွင်ၽူဝ်မေးၽိတ်းမေႃးၵၼ်သေ ၵေႃႉပဵၼ်ၸဝ်ႈၽူဝ် ၽၼ်းမေးၸဝ်ႈၵဝ်ႇတၢႆ တီႈပွၵ်ႉႁူဝ်ၼႃး ၸႄႈဝဵင်းမိူင်းသၢတ်ႇ ပႅတ်ႈတူၵ်းၼမ်ႉ။
ဝၼ်းတီႈ 5/9/2023 ယၢမ်းၼႂ်ၸဝ်ႉ 6 မူင်းပၢႆၼၼ်ႉ ၸူၼ်ၶဝ်ႈႁိူၼ်းၵူၼ်းဝၢၼ်ႈလင်ၼိုင်ႈ တီႈဝၢၼ်ႈမႂ်ႇ ထုင်ႉၼႃးၵွင်းမူး ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ယိုဝ်းၸဝ်ႈႁိူၼ်းတၢႆ၊ ယိုဝ်းပႃးၵူၼ်းဝၢၼ်ႈဢၼ်ၶဝ်ႈမႃးၸွႆႈ တၢႆထႅင်ႈ 3 ၵေႃႉ။