ပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA တီႈဝဵင်းသႅၼ်ဝီ ပူၼ်ႉမႃးၼႆႉ ႁဵတ်းႁႂ်ႈတုမ်ႉတိူဝ်ႉ ၵူၼ်းပိုၼ်ႉတီႈ လႆႈပၢႆႈၽေးသိုၵ်း ၼပ်ႉႁဵင်လႄႈ ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး သၢၼ်ၶတ်း ၸွမ်းလွင်ႈပၢင်တိုၵ်းၼၼ်ႉ ႁၢဝ်ႈႁႅင်း။  

မိူဝ်ႈၼႆႉ ဝၼ်းတီႈ 24/10/2023 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်း မၢၼ်ႈ ယိုဝ်းမၢၵ်ႇလူင်ၸွမ်းသဵၼ်ႈတၢင်းၵၢၼ်ၵႃႉၶၢႆၶႄႇ ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ သေ ၸၢၵ်ႇမၢၵ်ႇလူင် တိူဝ်ႉသႂ်ႇမႄႈမၢၼ်း ၵေႃႉၼိုင်ႈ လႆႈမၢတ်ႇၸဵပ်း၊ ႁိူၼ်းယေးၵူၼ်းဝၢၼ်ႈ လႆႈလူႉၵွႆ ၸွမ်း ၵမ်ႈၽွင်ႈလႄႈ ႁဵတ်းႁႂ်ႈၵူၼ်းဝၢၼ်ႈ 1,000 ပၢႆ လႆႈပၢႆႈၽေးသိုၵ်းထႅင်ႈ ၼႆယဝ်ႉ။

ၼႂ်းၽိုၼ်တၢမ်းငဝ်းလၢႆးၼၼ်ႉ ဢွၵ်ႇဝႆႉဝႃႈ တႄႇဢဝ် ဝၼ်းတီႈ 5/10/2023 တေႃႇထိုင် 19/10/2023 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်း KIA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်းသေ ဢမ်ႇၵႃး သိုၵ်းမၢၼ်ႈတင်း သိုၵ်းတႆး SSPP ထႅင်ႈ တီႈၼႂ်းဢိူင်ႇၵုၼ်ၵွၵ်ႇ ၸႄႈဝဵင်းသႅၼ်ဝီၼၼ်ႉသေ ယွၼ်ႉသိုၵ်းမၢၼ်ႈ ဢဝ်မၢၵ်ႇလူင်ယိုဝ်းလႄႈ ႁဵတ်းႁႂ်ႈမႄႈမၼ်း ၵေႃႉၼိုင်ႈ မၢတ်ႇၸဵပ်း၊ ႁိူၼ်းယေး ၵူၼ်းဝၢၼ်ႈသၢမ်ဝၢၼ်ႈ လူႉၵွႆၸွမ်းသေ ႁဵတ်းႁႂ်ႈၵူၼ်းဝၢၼ်ႈ 1,000 ပၢႆ လႆႈပွႆႇပႅတ်ႈ ႁိူၼ်းယေး ပၢႆႈ ၽေးသိုၵ်းၵၼ်ထႅင်ႈ ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉပၢင်တိုၵ်း တင်းသွင်ၾၢႆႇ ႁိမ်ၼႃႈတီႈၵၼ်သေ ႁဵတ်း ႁႂ်ႈၵူၼ်းမိူင်းလႆႈတူၵ်းၼမ်ႉႁူၼမ်ႉတႃ လႆႈပၢႆႈၽေးသိုၵ်း ႁႃသေႃႉႁူမ်ႈပိုင်ႈၸွမ်းဝတ်ႉဝႃးၼၼ်ႉ ႁဝ်းၶႃႈ သၢၼ်ၶတ်း လွင်ႈၼႆႉတႄႉတႄႉၶႃႈယဝ်ႉ။ တိုၵ်းယွၼ်း သိုၵ်းမၢၼ်ႈလႄႈ ၽူႈၸိူဝ်းၵဵဝ်ႇၶွင်ၶဝ် ႁႂ်ႈႁပ်ႉဢဝ်ပုၼ်ႈၽွၼ်းတင်းမူတ်း”- ဝႃႈၼႆ။

လိူဝ်ၼၼ်ႉ သိုပ်ႇလၢတ်ႈဝႃႈ – ပၢင်တိုၵ်းၼႆႉ ႁဝ်းၶႃႈ ႁၼ်ထိုင်ဝႃႈ မၼ်းပဵၼ်ပၢင်တိုၵ်း ႁိမ်ဢဝ်ၼႃႈတီႈၵၼ် ယွၼ်ႉဝႃႈ ၸွမ်း သဵၼ်ႈတၢင်းလူင် သႅၼ်ဝီ – ၶျိၼ်ႊသူၺ်ႊႁေႃႊၼႆႉ မၼ်းပဵၼ်သဵၼ်ႈတၢင်းၶိုၵ်ႉၶၵ်ႉလမ်ႇလွင်ႈ တႃႇၵၢၼ်ၵႃႉၶၢႆမိူဝ်းၼႃႈလႄႈ ၵွပ်ႈပိူဝ်ႈၼႆ မၼ်းပႃးၼႂ်းၽႅၼ်ၵၢၼ် ၶူင်းၵၢၼ်ၵႃႉၶၢႆ ၵွတ်ႇလူၵ်ႈ (Belt and Road Initiative – BRI) ၶွင်ၶႄႇ ၼၼ်ႉလႄႈ ယွၼ်ႉၼၼ် ၶဝ်ၸင်ႇႁိမ်ၼႃႈတီႈၵၼ်ၼၼ်ႉယဝ်ႉ”- ဝႃႈၼႆ။

ပၢင်တိုၵ်း တီႈဢိူင်ႇၵုၼ်ၵွၵ်ႇ ၼႂ်းၸႄႈဝဵင်းသႅၼ်ဝီၼႆႉ ၾၢႆႇသိုၵ်းမၢၼ်ႈသမ်ႉ ပဵၼ်တပ်ႉၶမယ 323 တပ်ႉမ 88 – 99 လႄႈ ၸ ၵၶ 12 ၸိူဝ်းၼႆႉ လွင်ႈပၼ်ႁႃ ထႅင်ႈဢၼ်ၼိုင်ႈသမ်ႉ ယွၼ်ႉသိုၵ်းၶၢင် KIA ပႂ်ႉၵဵပ်းၶွၼ်ႇၸဝ်ႈၵႃးလူင် တီႈႁိမ်းဝၢၼ်ႈတၢင်ႉၶၢၼ် လႄႈ ဝၢၼ်ႈၵုၼ်ၵွၵ်ႇ ၸိူဝ်းၼၼ်ႉသေ ႁဵတ်းႁႂ်ႈသိုၵ်းမၢၼ်ႈ ႁႅင်းသိုၵ်းလေႃႇတိုၵ်းမႃး ႁၢဝ်ႈႁႅင်း ၼႆယဝ်ႉ။

ယွၼ်ႉပၢင်တိုၵ်းၼႆႉသေ ႁဵတ်းႁႂ်ႈၵူၼ်းဝၢၼ်ႈ လႆႈပၢႆႈၽေးသိုၵ်းၼၼ်ႉသမ်ႉ မိူၼ်ၼင်ႇ ဝၢၼ်ႈပဵင်းၵၢင် လင်ႁိူၼ်း 32 လင် ႁူဝ် ၵူၼ်း 96 ၵေႃႉ၊ ဝၢၼ်ႈၵုၼ်ၵွၵ်ႇ လင်ႁိူၼ်း 80 လင် ႁူဝ်ၵူၼ်း 240 ၵေႃႉ၊ ပဵင်းႁုင်း လင်ႁိူၼ်း 40 လင် ႁူဝ်ၵူၼ်း 120 ၵေႃႉ၊ ဝၢၼ်ႈႁေႈ လင်ႁိူၼ်း 57 လင် ႁူဝ်ၵူၼ်း 171 ၵေႃႉ၊ တၢင်ႉၶၢၼ် လင်ႁိူၼ်း 30 လင် ႁူဝ်ၵူၼ်း 90 ၵေႃႉ၊ ၼွင်မွၼ်း လင် ႁိူၼ်း 30 လင် ႁူဝ်ၵူၼ်း 90 ၵေႃႉ၊ ႁူဝ်ၼွင် လင်ႁိူၼ်း 17 လင် ႁူဝ်ၵူၼ်း 52 ၵေႃႉလႄႈ ဝၢၼ်ႈၽၢႆၶမ်း လင်ႁိူၼ်း 20 လင် ႁူဝ်ၵူၼ်း 60 ၵေႃႉ ႁူမ်ႈတင်း လင်ႁိူၼ်း 306 လင်လႄႈ ႁူဝ်ၵူၼ်း 919 ၵေႃႉ ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇဝႆႉၼင်ႇၼႆ။