သိုၵ်းၶၢင် KIA ပိုၼ်ၽၢဝ်ႇ ယိုတ်းလႆႈတပ်ႉပၢင်သဝ်း သိုၵ်းမၢၼ်ႈ 2 တီႈ ၼႂ်းၼၼ်ႉ ၼႂ်းၸိုင်ႈတႆး ပွတ်းႁွင်ႇတီႈၼိုင်ႈ လႄႈ ၼႂ်းၸႄႈမိူင်းၶၢင် တီႈၼိုင်ႈ။

မိူဝ်ႈဝၼ်းတီႈ 19/10/2023 ၼၼ်ႉ သိုၵ်းၶၢင် KIA လၢႆတပ်ႉၵွင် ႁူမ်ႈၵၼ် လေႃႇတိုၵ်းသိုၵ်းမၢၼ်ႈယိုတ်းမိူင်းသေ ယိုတ်းလႆႈ တပ်ႉပၢင်သဝ်းသိုၵ်းမၢၼ်ႈတီႈဝၢၼ်ႈၼမ်ႉၵူတ်ႉ ဢၼ်ယၢၼ်ၵႆၵၼ်တင်း မိူင်းၵူဝ်း 10 လၵ်း ၊ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ။

ဢိင်ၼိူဝ်လွင်ႈၼႆႉ ၾၢႆႇသိုၵ်းမၢၼ်ႈယိုတ်းမိူင်းတႄႉ ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ – “ ၾၢႆႇသိုၵ်းၶၢင် ၽႄၵၼ် 3 ၸုမ်းသေ ၶဝ်ႈလေႃႇတိုၵ်းလႄႈ ႁူဝ်ၶမ်ႈမွၵ်ႈ 4 မူင်းၼႆႉ ၾၢႆႇၸၵၸ လႆႈထွႆဢွၵ်ႇပိုၼ်ႉတီႈ။တႃႇတေတုမ်ႉတွပ်ႇၶိုၼ်းသိုၵ်းၶၢင်ၶဝ်ၼႆႉ လႆႈဢဝ် ၶိူင်ႈမိၼ်လႄႈၵွင်ႈလူင်ၸွႆႈတိုၵ်းပႃး ” – ဝႃႈၼႆဝႆႉ။

ပၢင်သဝ်း ဢၼ်သိုၵ်းၶၢင်ယိုတ်းသိမ်းလႆႈၼႆႉ ပဵၼ်ဢွင်ႈတီႈၶိုၵ်ႉတွၼ်း တႃႇသိုၵ်းမၢၼ်ႈယိုတ်းမိူင်းၼႆၵေႃႈ ဝႃႈလႆႈ  ၾၢႆႇသိုၵ်းၶၢင်တႄႉပိုၼ်ၽၢဝ်ႇဝႆႉၼင်ႇၼႆ။

ဢိင်ၼိူဝ်လွင်ႈၼႆႉ ၸဝ်ႈသိုၵ်းလူင် ၼေႃႇၽူႇ ၽူႈၶၢၼ်ပၢၵ်ႇ KIA လၢတ်ႈတီႈ BBC ဝႃႈ – “ ဢၼ်သိမ်းလႆႈဢွင်ႈတီႈၸိူဝ်းၼႆႉ လႆႈဝႃႈ ပဵၼ်ၼႃႈလိၼ်ၶိုၵ်ႉတွၼ်းၶွင်သိုၵ်းမၢၼ်ႈ။မၼ်းၸမ်မိူင်းၶႄႇလူး။မၼ်းၸမ်ၸႄႈဝဵင်းပၢင်ႇသၢႆး ” – ဝႃႈၼႆ။

လိူဝ်သေယိုတ်းလႆႈတပ်ႉပၢင်သဝ်းမၢၼ်ႈ ၼႂ်းၸိုင်ႈတႆးပွတ်းႁွင်ႇတီႈၼိုင်ႈယဝ်ႉၼၼ်ႉ မိူဝ်ႈဝၼ်းတီႈ 20/10/2023 ၼၼ်ႉၵေႃႈ ယိုတ်းလႆႈ တပ်ႉပၢင်သဝ်းသိုၵ်းမၢၼ်ႈ ဢၼ်မီးႁိမ်းဝဵင်းမႂ်ႇ(ဝိုင်းမော်) ၼႂ်းၸႄႈမိူင်းၶၢင်ၼၼ်ႉတီႈၼိုင်ႈ ၼႆ KIA ပိုၼ်ၽၢဝ်ႇလၢတ်ႈဝႆႉ။

ၾၢႆႇသိုၵ်းမၢၼ်ႈယိုတ်းမိူင်းတႄႉ ပိုၼ်ၽၢဝ်ႇဝႆႉဝႃႈ ပၢင်တိုၵ်းပွၵ်ႈၼႆႉ ၾၢႆႇ သိုၵ်းၶၢင် KIA မီးလွင်ႈတုမ်ႉတိူဝ်ႉလူႉသုမ်းၼမ် ဝႃႈၼႆသေတႃႉ ၸဝ်ႈသိုၵ်းလူင် ၼေႃႇၽူႇ ၽူႈၶၢၼ်ပၢၵ်ႇ KIA တႄႉလၢတ်ႈတီႈသိုဝ်ႇၶၢဝ်ႇဝႆႉဝႃႈ လွင်ႈၼႆႉ ပႆႇႁူႉႁူဝ်ယွႆႈမၼ်း ဝႃႈၼႆၵူၺ်း။

ၼႂ်းလိၵ်ႈပိုၼ်ၽၢဝ်ႇ သိုၵ်းၸၵၸၼၼ်ႉ ပႃးဝႆႉဝႃႈ – “ တႄႇဢဝ် ဝၼ်းတီႈ 8/7/2023 ထိုင် ဝၼ်းတီႈ 20/10/2023 မီးလွင်ႈပိုတ်းယိုဝ်းၵၼ်တင်း  KIA ၸွမ်းသဵၼ်ႈတႃႈသၢႆတၢင်း ဝၢၼ်ႈမေႃႈ – ဝဵင်းမႂ်ႇ (ဗန်းမော် – ဝိုင်းမော်)ၸိူဝ်းၼႆႉ ဢမ်ႇယွမ်း 80 ပွၵ်ႈ”- ဝႃႈၼႆဝႆႉ။

ၼႂ်းဝူင်ႈဝၢင်ႈၼႆႉ သိုၵ်းမၢၼ်ႈယိုတ်းမိူင်း မီးလွင်ႈပိုတ်းယိုဝ်းၵၼ်တင်းၸုမ်းယိပ်းၵွင်ႈၵၢင်ႇလၢႆတီႈ မိူၼ်ၼင်ႇ ဝၼ်းတီႈ 20/10/2023 ၼႆႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်လမ်းၼိုင်ႈ လုၵ်ႉတၢင်းလႃႈသဵဝ်ႈ ၵႂႃႇပွႆႇမၢၵ်ႇသႂ်ႇ တီႈတပ်ႉသိုၵ်းတဢၢင်း TNLA ဢၼ်ပၵ်းဝႆႉ တီႈဝၢၼ်ႈမိူင်းလီႉ ဢိူင်ႇတီးမ ၸႄႈဝဵင်းမူႇၸေႊ ၸိုင်ႈတႆး ပွတ်း ႁွင်ႇၼၼ်ႉ 4 လုၵ်ႈ။

ဝၼ်းတီႈ 19/10/2023 ၼၼ်ႉၵေႃႈ သိုၵ်းၶၢင် KIA တင်း သိုၵ်းၵၢဝ်ႈၵၢင်ႉ MNDAA ႁူမ်ႈၵၼ် လေႃႇတိုၵ်း သိုၵ်းမၢၼ်ႈ တီႈလွႆဝဵင်းလႃႇ ၼႂ်းၵႄႈမိူင်းယႃႉ – မိူင်းပေႃႈ ၼႂ်းၸႄႈဝဵင်းမူႇၸေႊ သိမ်းလႆႈတပ်ႉသိုၵ်းမၢၼ်ႈ ထိုင်မႃးယၢမ်းၵၢင် ဝၼ်း 11 သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း လုၵ်ႉတၢင်းလႃႈသဵဝ်ႈ မႃးယိုဝ်းၸွႆႈ။