ၵူၼ်းမူႇၸေႊ 3 ၵေႃႉၺႃးၶႃႈလူႉတၢႆသေ ၸွၵ်းထူင်ၵႂႃႇပႅတ်ႈၼႂ်းၵွင်ႈယုၵ်းယၢၵ်း ဢၼ်မီးႁိမ်းဝၢၼ်ႈႁူဝ်ၼွင်။

ဝၼ်းတီႈ 21/10/2023 ယၢမ်း10 မူင်း ထူပ်းႁၼ်ထူင်ၸၢၼ်ႈ ဢၼ်ႁေႃႇပူၵ်ႉတူဝ်ၵူၼ်းတၢႆၼဝ်ႈဝႆႉ 3 ၵေႃႉ တီႈၵွင်ယုၵ်းယၢၵ်း ႁိမ်းဝၢၼ်ႈႁူဝ်ၼွင် ၸႄႈဝဵင်းမူႇၸေႊ ။

ၵူၼ်းပိုၼ်ႉတီႈၼႂ်းဝဵင်းမူႊၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၶဝ်ပိၵ်ႉသႅင်ႇၶဝ်ဝႆႉ မွၵ်ႈ 10 ဝၼ်းၼႆႉလႄႈ ထၢင်ႇဝႃႈ ဢမ်ႇယူႇလီသေ ၵႂႃႇယူတ်းယႃတူဝ် တီႈႁူင်းယႃႁိုဝ်ၼႆဢေႃႈ။ၵူၺ်းၼႃႇ ၽိူဝ်ႇမႃးႁၼ်တူဝ်တၢႆၶဝ် ပႅတ်ႈၼႂ်းၵွင်ယုၵ်းယၢၵ်းၼႆႉယဝ်ႉ ၸင်ႇႁူႉဝႃႈ  ၶဝ်ၺႃးၶႃႈႁႅမ်တၢႆ။ၵမ်ႈၽွင်ႈၵေႃႈဝႃႈ ၺႃးဝၢင်းယႃသေတၢႆၼႆဢေႃႈ။တူဝ်ၼဝ်ႈဝႆႉမူတ်းယဝ်ႉလႄႈ ဢမ်ႇႁူႉဝႃႈ ၺႃးၶႃႈၸိူင်ႉႁိုဝ်တေႉတေႉ။ႁၢၼ်ႉၶဝ် မီးဝႆႉသွင်တီႈ တေၺႃးၶႃႈတၢႆတီႈႁၢၼ်ႉလႂ် ပႆႇၸၢင်ႈဝႃႈ ” – ဝႃႈၼႆ။

ၵူၼ်း 3 ၵေႃႉဢၼ်ၺႃးၶႃႈတၢႆၼႆႉ ပဵၼ် ဢူးၵျေႃႇဝူၺ်ႇ ဢႃယု 50 ပၢႆ ၊ ၵျေႃႇၵျေႃႇ ဢႃယု 20 ပၢႆ လႄႈ မဢေး ဢႃယု 30 ပၢႆ။  ဢူးၵျေႃႇဝူၺ်ႇလႄႈ ၵျေႃႇၵျေႃႇ ပဵၼ်ပေႃႈလုၵ်ႈၵၼ် ပိုတ်ႇႁၢၼ်ႉၶၢႆၶူဝ်းဝႆႉ ၼိူဝ်သဵၼ်ႈတၢင်းၵႂႃႇၵျိၼ်းသၢၼ်းၵျေႃႉ ၼႂ်းဝၢၼ်ႈလွၼ်ႊဢိၼ်ႇ ၸႄႈဝဵင်းပၢင်ႇသၢႆး ၸႄႈတွၼ်ႈမူႇၸေႊ လႆႈႁူႉၼင်ႇၼႆ။

ၵူၼ်းပိုၼ်ႉတီႈၼႂ်းဝဵင်းမူႊၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းဝႃႈတႄႉ ၵေႃႉဢၼ်ၶႃႈႁႅမ်ၶဝ်တၢႆၼႆႉ လႅပ်ႈပဵၼ်ၶိုၼ်းဢူၺ်းၵေႃႉၵၼ်တင်းလုၵ်ႈၸၢႆးၸဝ်ႈႁၢၼ်ႉ ၊  ငိၼ်းဝႃႈ မၼ်း ထုၵ်ႇၼီႈလုၵ်ႈၸဝ်ႉႁၢၼ်ႉဝႆႉမွၵ်ႈ 8 သႅၼ်ၼႆႉၼႆဢေႃႈ။  ဢူးၵျေႃႇဝူၺ်ႇသမ်ႉလၢတ်ႈမၼ်းဝႃႈ – ပေႃးဢမ်ႇတႅၼ်းၶိုၼ်း တေၵႂႃႇတၢင်ႇလၢတ်ႈပလိၵ်ႈၼႆ  လႄႈ ထိုင်တီႈၶႃႈႁႅမ်ၵၼ်တၢႆႁိုဝ်ၼႆ ဢွၼ်ၵၼ်ထၢင်ႇၵၼ်ၸိူင်ႉၼႆ။  မဢေး ဢၼ်ၺႃးၶႃႈတၢႆၸွမ်းၼၼ်ႉၵေႃႈ သမ်ႉပဵၼ်ၵူၼ်းယိပ်းသဵၼ်ႈမၢႆငိုၼ်းၶဝ်   ” – ဝႃႈၼႆ။

ၵေႃႉပူၼ်ႉပႅၼ်ၼႆႉ ပဵၼ်ၽႂ် ၸွင်ႇၸႂ်ႈ ဢၼ်ပဵၼ်ဢူၺ်းၵေႃႉၵၼ်တင်းၵျေႃႇၵျေႃႇ ၼၼ်ႉႁိုဝ်ၼႆ ပႆႇမီးၸုမ်းလႂ်ယိုၼ်ယၼ်။ ထိုင်မိူဝ်ႈလဵဝ် ၽူႈမီးပုၼ်ႈၽွၼ်း တိုၵ်ႉလူင်းပိုၼ်ႉတီႈၵူတ်ႇထတ်းထဵတ်ႈထၢမ်တူၺ်း ႁိူၼ်းတႂ်ႈႁိူၼ်းၼိူဝ်ယူႇ ၼႆယဝ်ႉ။

ၵူၼ်းယူႇႁိမ်းၸမ်ၵၼ်တင်းၸဝ်ႈႁၢၼ်ႉဢၼ်ၺႃးၶႃႈၼႆႉ လၢတ်ႈတီႈၽူႈတွႆႇႁွၵ်ႈဝႃႈ – “ ဢူၺ်းၵေႃႉလုၵ်ႈၸၢႆးၶဝ်ၼႆႉ မႃးယူႇၸွမ်းၶဝ် 2-3 လိူၼ်ဢေႃႈၼၼ်ႉ။ၽႂ်ၵေႃႈဢမ်ႇထၢင်ႇဝႃႈ မၼ်းတေႁဵတ်းၼၼ်။ၵူၺ်းၼႃႇ တႄႇဝၼ်းဢၼ်ပိၵ်ႉသႅင်ႇဝႆႉ ၶၢဝ်းတၢင်း 10 ဝၼ်းၼႆႉၵေႃႈ ဢမ်ႇႁၼ်မၼ်းပေႃႇမႃးယဝ်ႉ။ ၵွပ်ႈၼႆ ၵူၼ်းတီႈၼႆႈ ထၢင်ႇထိူမ်ဝႃႈ ပဵၼ်မၼ်းၶႃႈႁႅမ်ၶဝ်ပေႃႈလုၵ်ႈတၢႆ ” – ဝႃႈၼႆ။

မိူဝ်ႈဝၼ်းတီႈ10/10/2023 ၼၼ်ႉၵေႃႉ ၼၢင်းယိင်းၵူၼ်းၵႃလီႉၵေႃႉၼိုင်ႈ ၵႂႃႇဢဝ်ၶူဝ်းဢၼ်သင်ႇဝႆႉၼိူဝ်ဢွၼ်ႊလၢႆႊ တီႈၵုၼ်ႁဵင်ၼႆသေႁၢႆၵႂႃႇလႆႈၶိုၼ်းၼိုင်ႈလႄႈဝၼ်းၼိုင်ႈၸင်ႇႁၼ်တူဝ်တၢႆမၼ်းၼၢင်းၶိုၼ်းတီႈၵုၼ်ႁဵင် ။ထိုင်မိူဝ်ႈလဵဝ် ယင်းပႆႇတီႉၺွပ်းလႆႈ ၽူႈပူၼ်ႉပႅၼ်။

ၵၢပ်ႈဝၢၼ်ႈပၢၼ်မိူင်းယၢမ်းလဵဝ် ပၢင်တိုၵ်းသိုၵ်းသိူဝ် လိူင်ႇၼမ် ၊ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ႁဵတ်းႁႂ်ႈၵူၼ်းၵေႃႇၵၢၼ်ႁၢႆႉ ၼမ်လိူဝ်မႃးလႄႈ ၵူၼ်းမိူင်းၸိူဝ်းႁဵတ်းပၢႆးမၢၵ်ႈမီးၵေႃႈ ဢမ်ႇထၢင်ႇႁၢင်ႈလႆႈႁဵတ်းသေ လႆႈၵူဝ်ၽူႈလၵ်ႉၸၵ်ႉၶုတ်ႈယူႇ ၵူႈဝၼ်းၶိုၼ်း။

ႁူဝ်လိူၼ်ဢွၵ်ႊထိူဝ်ႊပိူဝ်ႊ 2023 ၼႆႉၵူၺ်းၵေႃႈ မီးၵူၼ်းႁၢႆႉ ၽူႈၸၢႆး 3 ၵေႃႉ ၶီႇၵႃး (Crown) လမ်းၼိုင်ႈသေ မႃးၵိုတ်းႁႄႉၵႃး ၵူၼ်းမိူင်း တီႈႁိမ်းလႅင်းၵႃးသူၺ်ႇလယူင်ႇ ပွၵ်ႉ 7 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸူၼ်ဢဝ်ငိုၼ်း ၼႂ်းၵႃး ၵူၼ်းမိူင်းၼၼ်ႉၵႂႃႇ 800 သႅၼ်ပၢႆ ၼႆယဝ်ႉ။