ၼႂ်းလိူၼ် ဢွၵ်ႊထူဝ်ႊပိူဝ်ႊၼႆႉ ၵူၼ်းပိုၼ်ႉတီႈ ဢွၼ်ၵၼ်ယုမ်ႇယမ်ဝႃႈ ၼမ်ႉလိၼ်း ဢၼ်မီးၼႂ်းၵႄႈ ၵျွၵ်ႉမႄး – မိူင်းငေႃႉၼၼ်ႉ ပဵၼ်ၼမ်ႉၽီပၼ် ၊ ယူတ်းယႃတၢင်းပဵၼ်လႆႈၼႆသေ ဢွၼ်ၵၼ် ၵႂႃႇဢၢပ်ႇ ၵူၼ်းၵိုၼ်းသတ်ႉ ၼႅၼ်ႈ။
မိူဝ်ႈဝၼ်းတီႈ 17/10/2023 ၼႆႉ ၼၢင်းယိင်းၵေႃႉၼိုင်ႈ ဢၼ်ၵႂႃႇဢၢပ်ႇၼမ်ႉလိၼ်းတီႈဝၢၼ်ႈၼမ်ႉမင်းၼၼ်ႉ ပလၢတ်ႉလူမ်ႉတၢႆ ။
ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ လူမ်ႉတၢႆၵေႃႉၼိုင်ႈၼႆတႄႉမႅၼ်ႈတႄႉဢေႃႈ။ လူမ်ႉၸိူင်ႉႁိုဝ်ၼႆတႄႉ ဢမ်ႇလႆႈႁူႉႁူဝ်ယွႆႈမၼ်း ။ ယင်းငိၼ်းဝႃႈ မီးၵူၼ်းၵေႃႉၼိုင်ႈ ၵႂႃႇဢၢပ်ႇၼမ်ႉမႃးႁေ မႃးပဵၼ်တၢင်းပဵၼ်တၢႆၽၢၵ်ႇၵေႃႈမီးၼႆဢေႃႈ ” – ဝႃႈၼႆ။
ၵေႃႉဢၼ်လူမ်ႉသေ လူႉတၢႆၵႂႃႇၼႆႉ ၸိုဝ်ႈ ပႃႈမျႃႉထုၼ်း ဢႃယု 45 ပီ လုၵ်ႉတၢင်းၸႄႈဝဵင်းၼမ်ႉသၼ်ႇသေ ၵႂႃႇဢၢပ်ႇၼမ်ႉ တီႈဢၼ်ၵူၼ်းပိုၼ်ႉတီႈယုမ်ႇယမ်ဝႃႈ ယူတ်းယႃတၢင်းပဵၼ်လႆႈ ။
ၼၢင်းယိင်းၵူၼ်းပိုၼ်ႉတီႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ ၶႃႈၶႂ်ႈလၢတ်ႈဝႃႈ ၼမ်ႉဢၼ်ၶဝ်ၵႂႃႇဢၢပ်ႇယူႇၼႆႉ ။ ႁဝ်းႁၼ်မီးမႃးၸဵမ်မိူဝ်ႈလဵၵ်ႉ ။ မၼ်းပဵၼ်တီႈပိူၼ်ႈ မႃးဝႄႉလၢင်ႉရူတ်ႉလၢင်ႉၵႃးၵူၺ်း ။ မႃးဝႄႉလိုဝ်ႈၵိၼ်ၶဝ်ႈၵိၼ်ၽၵ်းၵူၺ်း ။ ဢမ်ႇႁၼ်ၽႂ်ဝႃႈ ပေႃးဢၢပ်ႇလႄႈ တၢင်းပဵၼ်ၶတ်းတၢင်းပဵၼ်ၶႅင်တေႁၢႆ ။ ၽီပၼ်လႄႈ ႁၢႆၼႆဢမ်ႇၸႂ်ႈ ။ ၵူၺ်းၵႃႈ ပေႃးၵႂႃႇႁိူဝ်ႉမႃးဝႄႉသေ ၵိၼ်ၼမ်ႉလိုဝ်ႈတႄႉ တေႁၢႆႁိူဝ်ႉယူႇၶႃႈ မၼ်းၵတ်း ယဵၼ်လီၶႃႈလူးၼေႃႈ။ ယႃႇပေယုမ်ႇဝႃႈ မၼ်းယႃၶတ်းယႃၶႅင်လႆႈၼႆ ႁႂ်ႈပီႈၼွင်ႉတႆးႁဝ်း ယႃႇယုမ်ႇငၢႆႈ ” – ဝႃႈၼႆ။
ၵူၼ်းပိုၼ်ႉတီႈယုမ်ႇယမ်ဝႃႈ ပဵၼ်ၼမ်ႉၽီပၼ် ၊ ယူတ်းယႃတၢင်းပဵၼ်လႆႈၼႆသေ ၵိုင်ႉၵၢင်ႉလိုဝ်းမႃးတၢင်းဢွၼ်ႊလၢႆႊ ၼႂ်းႁူဝ်လိူၼ်ၼႆႉ။ ၵူၼ်းတီႈၸမ်တီႈၵႆ ဢွၼ်ႁိုၼ်ႇၵၼ်ၵႂႃႇဢၢပ်ႇ ၼိုင်ႈဝၼ်းလႂ် ႁူဝ်ၵူၼ်း 500 ၶိုၼ်ႈၼိူဝ် ၊ မၢင်ဝၼ်း ထိုင် 1000 လူးၵွၼ်ႇ။ ၼမ်ႉလိၼ်းဢၼ် ၵူၼ်းပိုၼ်ႉတီႈ ယုမ်ႇယမ်ဝႃႈ ပဵၼ်ၼမ်ႉၽီပၼ်ၼႆႉ မီးတီႈဝၢၼ်ႈၼမ်ႉမင်း ၼႂ်းၵႄႈ မိူင်းငေႃႉ – ၵျွၵ်ႉမႄး ၊ မိူဝ်ႈလဵဝ် မီးၵူၼ်းၵႂႃႇ ပိုတ်ႇလၢၼ်ႉပိုတ်ႇသႅင်ႇတၢင်းၵိၼ်တၢင်းယႅမ်ႉဝႆႉလႄႈ ပဵၼ်တီႈၵူၼ်းၵိုၼ်းငိုၼ်းၶွၼ်ႈဝႆႉ တီႈၼိုင်ႈ ၼႆယဝ်ႉ။
ဝၢၼ်ႈၼမ်ႉမင်းၼႆႉ မိူဝ်ႈၵွၼ်ႇမီးႁိူၼ်းၵူၼ်းဝၢၼ်ႈမွၵ်ႈ 15 လင်ၵူၺ်း။ ၽွင်းပီ 2020 ၼၼ်ႉ RCSS လႄႈ TNLA ပဵၼ်ပၢင်တိုၵ်းၵၼ်လႄႈ ၵူၼ်းဝၢၼ်ႈလႆႈပၢႆႈၽေးသိုၵ်းတေႃႇထိုင်ယၢမ်းလဵဝ်ယင်းဢမ်ႇၸၢင်ႈပွၵ်ႈယူႇၶိုၼ်းႁိူၼ်းယေး။
