ၵႃး – ရူတ်ႉၶိူင်ႈၽႃႇၵၼ် တီႈဝဵင်းၼမ်ႉလၼ်ႈ ၵူၼ်းၶီႇရူတ်ႉၶိူင်ႈတၢႆ ပဵၼ်ၵူၼ်းသိုၵ်း SSPP ၊ ၸဝ်ႈၵႃးၶိုင်ႁေႃႈပၢႆႈ ဢမ်ႇတၼ်းပူၼ်ႉ ယွၼ်ႉမၢၵ်ႇၵႃးလၼ်ဢွၵ်ႇၸွမ်းတၢင်းသေ ထုၵ်ႇတီႉၺွပ်းၵုမ်းတူဝ်။
ပူၼ်ႉမႃး ဝၼ်းတီႈ 17/10/2023 ယၢမ်းၵၢင်ၼႂ် 9:20 မူင်း ၸၢႆးမၼ်ႇတလ ၵူၼ်းသိုၵ်း SSPP ထုၵ်ႇၵႃးၽႃႇသႂ်ႇ ၼႂ်းၵႄႈ ဝၢၼ်ႈၶူဝ်ႁၢၵ်းလႄႈ ဝၢၼ်ႈၶူဝ်လဵၵ်း ႁိမ်းဝၢၼ်ႈလီႈ ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇသေ လႆႈလူႉ တၢႆထင်တီႈ ။
ၽူႈတူင်ႉၼိုင် ၼႂ်းၵၢၼ်သိုၵ်း SSPP တၢင်းထုင်ႉၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းသိုၵ်းႁဝ်း ယွၼ်းၶႂၢင်ႉသေ ပွၵ်ႈမိူဝ်းၸႂ်းႁိူၼ်း ၊ လႆႈမိူဝ်းပဵၼ်ၽေးၵိုင်ႉၵၢင်ႉ ၸွမ်းတၢင်း ၺႃးၵႃးၽႃႇသႂ်ႇ ၼႂ်းၵႄႈဝၢၼ်ႈၶူဝ်ႁၢၵ်း – ဝၢၼ်ႈၶူဝ် လဵၵ်း လႆႈလူႉတၢႆထင်တီႈၶႃႈဢေႃႈ။ ၸဝ်ႈၵႃး ဢၼ်ၽႃႇသႂ်ႇ ၵူၼ်းသိုၵ်းႁဝ်းၶႃႈ တၢႆၼၼ်ႉ ၸိုဝ်ႈႁွင်ႉ ၸၢႆးၵွၼ် ဢႃယု 32 ပီ လႄႈ ၽူႈၸၢႆးထႅင်ႈၵေႃႉၼိုင်ႈ။ ၶဝ်လုၵ်ႉၼမ်ႉလၼ်ႈၼႆႉသေ တေၵႂႃႇၼမ်ႉၸၢင် ။ ၶဝ်ၽႃႇယဝ်ႉ ဢမ်ႇတူၺ်း ၵူၼ်းမၢတ်ႇသေ ႁေႃႈၵႃးပၢႆႈ။ ဢဝ်မၢၵ်ႇလေႃႉၵႃးၶဝ် လၼ်ဢွၵ်ႇပႅတ်ႈၸွမ်းတၢင်း ။ ႁဵတ်းၼၼ်သေ ပၢႆႈဢမ်ႇပူၼ်ႉ ။ ယူႇတီႈၵူၼ်းသိုၵ်း SSPP လမ်းၸွမ်းတီႉၺွပ်းသေ ၵုမ်းတူဝ်လႆႈၶႃႈဢေႃႈ”- ဝႃႈၼႆ။
ထိုင်မႃး ဝၼ်းတီႈ 18/10/2023 ၼႆႉ ယူႇတီႈသင်ၶၸဝ်ႈ၊ ၵူၼ်းမိူင်းလႄႈ ၵေႃႉသိုၵ်းႁၢၼ် ၼႂ်း SSPP ၸင်ႇႁူမ်ႈၵၼ် ပူၼ်ႉၶၢပ်ႈတူဝ် ၸၢႆးမၼ်ႇတလၵႂႃႇ ၼႆယဝ်ႉ။
ၼႂ်းဝၼ်းတီႈ 17 ယၢမ်းၵၢင်ၼႂ်မွၵ်ႈ 6 မူင်းၶိုင်ႈ ၼၼ်ႉၵေႃႈ ၵႃးၽႃႇသႂ်ႇ ရူတ်ႉၶိူင်ႈ ၵူၼ်းမိူင်းလမ်းၼိုင်ႈ ပဵၼ်ၽူႈယိင်း သွၼ်ႉ မႃးၸွမ်းၵၼ် 2 ၵေႃႉ တီႈတၢင်းၽေ ႁိမ်းႁူင်းယႃလူင် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇသေ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း။
မိူဝ်ႈဝႃး ဝၼ်းတီႈ 18 ယၢမ်းၵၢင်ၼႂ် ၼၼ်ႉၵေႃႈ ၵႃးလူင် 12 လေႃႉတင်း ၵႃးဢွၼ်ႇ (ၵႃးႁိူၼ်းသုၼ်ႇတူဝ်) လမ်းၼိုင်ႈ ၽႃႇ ၵၼ် တီႈၼိူဝ်သဵၼ်ႈတၢင်းလူင် သီႇပေႃႉ – လႃႈသဵဝ်ႈ ၸဝ်ႈၵႃးဢွၼ်ႇ လႆႈလူႉတၢႆထင်တီႈ ၵေႃႉၼိုင်ႈ ၼႆယဝ်ႉ။
