မိူဝ်ႈၼႆႉ ဝၼ်းတီႈ 06/11/2024 ယၢမ်းၵၢင်ၼႂ် သိုၵ်းၵဝ်ႈၵၢင်ႉ MNDAA ယူႇၾၢႆႇႁွင်ႇဝဵင်း ယိုဝ်းမၢၵ်ႇလူင် ၸူးသိုၵ်းမၢၼ်ႈ ယိုတ်းမိူင်း ဢၼ်ပႂ်ႉၵဵၵ်ႉ/ လၢၼ်ႇ တီႈၼိူဝ်သဵၼ်ႈတၢင်းလူင် ၼမ်ႉလၼ်ႈ – မိူင်းလိူၼ်း တၢင်းၸဵင်ႇႁွင်ႇဝၼ်းဢွၵ်ႇဝဵင်း ၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တင်းမူတ်း 3 လုၵ်ႈ။

ၵူၼ်းၼမ်ႉလၼ်ႈ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇဢၼ်ယိုဝ်းမႃးၼႆႉ ပဵၼ်မၢၵ်ႇတပ်ႉ သိုၵ်းၵဝ်ႈၵၢင်ႉၶဝ် ယိုဝ်းမႃး တင်းမူတ်း 3 လုၵ်ႈ မႃးတူၵ်းၼႂ်းသူၼ်ႁႆႈၼႃး ဢၼ်မီးႁိမ်း ၵဵၵ်ႉသိုၵ်းမၢၼ်ႈ ပႂ်ႉဝႆႉၼႂ်းၵႄႈၼမ်ႉလၼ်ႈ – မိူင်းလိူၼ်းၼၼ်ႉ။ လွင်ႈတုမ်ႉတိူဝ်ႉ ၵူၼ်းမိူင်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ”- ဝႃႈၼႆ။

ယၢမ်းလဵဝ် တီႈဝဵင်းၼမ်ႉလၼ်ႈၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ တိုၵ်ႉၶဵင်ႈၶႅင်ၵၢၼ်သိုၵ်း ၵၼ်ဝႆႉႁၢဝ်ႈႁႅင်း။ ၾၢႆႇၼိုင်ႈၵေႃႈ သိုၵ်းၵဝ်ႈၵၢင်ႉၼႆႉ လွမ်ႉႁွပ်ႈဝဵင်းၼမ်ႉလၼ်ႈ ဝႆႉမူတ်းယဝ်ႉ လွင်ႈၼႆႉ မီးမႃးၶၢဝ်းတၢင်းႁိုင်မွၵ်ႈ 3 လိူၼ်ယဝ်ႉ ဝႃႈၼႆ။

“တီႈဝဵင်းၼမ်ႉလၼ်ႈၼႆႉ ပၢင်တိုၵ်းပႆႇပဵၼ် ၶဝ်သွင်ၾၢႆႇသမ်ႉ ယူႇယူႇသေ ယိုဝ်းၵွင်ႈလူင်လွၵ်ႇၵၼ် ႁဵတ်းၼၼ် ၶႃႈ ဢေႃႈ။ မၢင်ပွၵ်ႈမႃး ၼႂ်းၵႄႈၼမ်ႉလၼ်ႈ – မိူင်းလိူၼ်းၼၼ်ႉ ၶဝ်မင်ၵၼ်ယူႇ။ သိုၵ်းမၢၼ်ႈသမ်ႉ ယူႇယူႇဢွၵ်ႇသွၵ်ႈႁႃ သိုၵ်းၵဝ်ႈၵၢင်ႉ ၸိူင်ႉၼၼ်ဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

မိူဝ်ႈဝႃး ဝၼ်းတီႈ 05/11/2024 ယၢမ်းဝၢႆးဝၼ်း 2 မူင်း မၢၵ်ႇလူင်တူၵ်းတီႈ ပွၵ်ႉၸၢၼ်း 1 လုၵ်ႈလႄႈ ပွၵ်ႉပၢင်ႇႁႆႈ 1 လုၵ်ႈ တီႈဝဵင်းၼမ်ႉလၼ်ႈ ၸၢၵ်ႇမၢၵ်ႇ တိူဝ်ႉၺႃးၵူၼ်းထဝ်ႈ 1 ၵေႃႉလႄႈ လုၵ်ႈဢွၼ်ႇ 2 ၵေႃႉ တီႈပွၵ်ႉၸၢၼ်း လႆႈမၢတ်ႇၸဵပ်း။ ၼႂ်း 3 ၵေႃႉၼၼ်ႉ လုၵ်ႈဢွၼ်ႇတႃႇၵေႃႉၼိုင်ႈ လႆႈသူင်ႇယူတ်းယႃတူဝ် ဝႆႉတီႈႁူင်းယႃ ၼမ်ႉလၼ်ႈ။ ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ဝႃႈၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ ယူႇတီႈ ၾၢႆႇသိုၵ်မၢၼ်း သင်ႇပိၵ်ႉဢိုတ်း လႅင်းၾူၼ်းပႅတ်ႈတင်းၶိုၼ်း ထိုင်မႃးမိူဝ်ႈ ၼႆႉ ယၢမ်းၵၢင်ၼႂ် ၸင်ႇပိုတ်ႇပၼ်လႅင်းၾူၼ်းၶိုၼ်း – ၵူၼ်းပိုၼ်ႉတီႈလၢတ်ႈ။