ဝၼ်းတီႈ 06/10/2024  ယၢမ်းၵၢင်ဝၼ်း 12 မူင်းပၢႆ လုၵ်ႈဢွၼ်ႇၸၢႆး ၵူၼ်းမိူင်းဝဵင်းလႃႈသဵဝ်ႈ ဢၼ်ပၢႆႈၽေးသိုၵ်းမႃးယူႇသဝ်းဝႆႉ တီႈဝဵင်းၼမ်ႉလၼ်ႈၼၼ်ႉ လူင်းလဵၼ်ႈၼမ်ႉၸွမ်းဢူၺ်းၵေႃႉသေ ၸူမ်ၼမ်ႉတၢႆ။

ၸၢႆးဢွၼ်ႇ ဢၼ်လႆႈလူႉတၢႆၵႂႃႇၼၼ်ႉ တိုၵ်ႉမီးဢႃယု 4 ၶူပ်ႇ၊ ၸိုဝ်ႈႁွင်ႉ ပူႇသူး၊ မီးပီႈၼွင်ႉ 4 ၵေႃႉ မၼ်းၸၢႆး ပဵၼ်လုၵ်ႈၸၢႆးၵေႃႉထီႉ 3။    

ၽူႈမီးပုၼ်ႈၽွၼ်း ၼႂ်းၸုမ်းၸွႆႈထႅမ်ပရႁိတ ဝဵင်းၼမ်ႉလၼ်ႈ လၢတ်ႈၽူႈတွႆႇႁွၵ်ႈဝႃႈ -“ လုၵ်ႈဢွၼ်ႇၸၢႆးၼၼ်ႉ ပဵၼ် ၵူၼ်းလႃႈသဵဝ်ႈ။ ပၢႆႈၽေးသိုၵ်း မႃးၸွမ်းပေႃႈမႄႈၵူၼ်းႁိူၼ်းၶဝ်။ မႃးမီးဝႆႉတီႈၵျွင်းမုၼ်ၸဝ်ႈၼႆႉ။ မၼ်းၸၢႆးလူင်းလဵၼ်ႈၼမ်ႉႁွင်ႈ ၸွမ်းဢူၺ်းၵေႃႉမၼ်းသေလႄႈ ၸူမ်ၼမ်ႉတၢႆ”- ဝႃႈၼႆ။

ၼမ်ႉႁွင်ႈၼၼ်ႉ ဢမ်ႇပေႃးလိုၵ်ႉၼင်ႇၵဝ်ႇ။ ပဵၼ်ၼမ်ႉႁွင်ႈ ၵူၼ်းတၢင်းဝၢၼ်ႈၵေႃႈ မႃးဢၢပ်ႇမႃးၸႂ်ႉ။ ၼင်ႇႁိုဝ် တေဢမ်ႇမီးလွင်ႈၸိူင်ႉၼႆထႅင်ႈၼၼ်ႉ ပေႃႈမႄႈလုၵ်ႈဢွၼ်ႇ ထုၵ်ႇလီတူၺ်းလူ လုၵ်ႈလၢင်း ၸဝ်ႈၵဝ်ႇလီလီ – ၸုမ်းၸွႆႈထႅမ် ပရႁိတ လၢတ်ႈၼင်ႇၼႆ။

တီႈၵျွင်းမုၼ်ၸဝ်ႈမူႇလၼႆႉ တေမီးၵူၼ်းပၢႆႈၽေးသိုၵ်း ဢၼ်လုၵ်ႉဝဵင်းလႃႈသဵဝ်ႈ၊ သီႇပေႃႉ၊ ၵျွၵ်ႉမႄး ၸိူဝ်းၼႆႉ မႃးယူႇသဝ်းဝႆႉ ႁူဝ်ၵူၼ်း 10 ပၢႆ။

ယၢမ်းလဵဝ် တီႈဝဵင်းၼမ်ႉလၼ်ႈ ပၢင်တိုၵ်းဢမ်ႇပဵၼ်သေတႃႉ ၼႂ်းဝဵင်းသီႇပေႃႉ – လႃႈသဵဝ်ႈၼႆႉ ဝၢႆးသိုၵ်းၵဝ်ႈၵၢင်ႉ MNDAA တင်းသိုၵ်းတဢၢင်း TNLA ပဵၼ်ပၢင်တိုၵ်း ၵၼ်တင်းသိုၵ်းမၢၼ်ႈယဝ်ႉ သိုၵ်းတင်းသွင် ၾၢႆႇတူင်ႉၼိုင်ၵႂႃႇမႃးဝႆႉ။ မိူၼ်ၼင်ႇ ႁိမ်းႁွမ်းဝဵင်းၼမ်ႉလၼ်ႈၵေႃႈ ၾၢႆႇသိုၵ်းမၢၼ်ႈ လိူဝ်သေၵႆႉယိုဝ်းၵွင်ႈ လူင်ၵႂႃႇၵူႈႁူးၵူႈတၢင်းယဝ်ႉ။ ထႅမ် ႁႅင်းသိုၵ်း ၶဝ်ႈၵုမ်းၼႂ်းပိုၼ်ႉတီႈ။ ယွၼ်ႉၼၼ် ၵူၼ်းမိူင်းမႆႈၸႂ် လွင်ႈႁူမ်ႇလူမ်ႈသၢႆၸႂ်ၸဝ်ႈၵဝ်ႇ ၽွင်းဢွၵ်ႇတႃႈဢွၵ်ႇတၢင်း ႁဵတ်းႁႆႈႁဵတ်းသူၼ် ၸိူဝ်းၼႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)