ၸဝ်ႈၵွၼ်းဝတ်ႉတီႈတႃႈၶီႈလဵၵ်း ထုၵ်ႇၵူၼ်းလႅၼ်ၵိၼ်ငိုၼ်း သုမ်းငိုၼ်းထႆး လၢၼ်ႉဝၢတ်ႇ

မီးၵူၼ်းဢမ်ႇႁူႉၾၢႆႇ လႅၼ်ၵိၼ်ငိုၼ်း တီႈၸဝ်ႈၵွၼ်းဝတ်ႉဝၢၼ်ႈၵႅဝ်ႈလူင် ဝဵင်းတႃႈၶီႈလဵၵ်းၵႂႃႇ ဢမ်ႇယွမ်း 1,000,000 ဝၢတ်ႇ (ၼိုင်ႈလၢၼ်ႉဝၢတ်ႇ ငိုၼ်းထႆး)။

ၸဝ်ႈၶူး ၼၼ်ႇတႃႇသႃႇရ (ႁွင်ႉ) သၢႆလႅင်းၶိူဝ်း ၸဝ်ႈၵွၼ်းဝတ်ႉဝၢၼ်ႈၵႅဝ်ႈလူင် ဢိူင်ႇၽင်မိၼ် ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း လႅၼ်လိၼ်တႆး – ထႆး ထုၵ်ႇၵူၼ်းဢမ်ႇႁူႉၾၢႆႇ လႅၼ်ဢဝ်ငိုၼ်းၸဝ်ႈၵႂႃႇ 1,500,000 ဝၢတ်ႇ (တေတူၵ်းငိုၼ်း မၢၼ်ႈ မွၵ်ႈ 1,000 သႅၼ်ပျႃး) ၸဝ်ႈၶူး ထုၵ်ႇလႅၼ်ယွၼ်ႉလွင်ႈထီႇလႄႈ တႄႇၺႃးလႅၼ်မႃး မိူဝ်ႈၵၢင်လိူၼ်သႅပ်ႊထႅမ်ႊပိူဝ်ႊ 2023 ၼၼ်ႉမႃး ၼႆယဝ်ႉ။

ၸဝ်ႈၶူး သၢႆလႅင်းၶိူဝ်း ၸဝ်ႈၵွၼ်းဝတ်ႉဝၢၼ်ႈၵႅဝ်ႈလူင် လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတၢင်း မၼ်းပဵၼ်ၼႆ ၵၢင်လိူၼ်သႅပ်ႊထႅမ်ႊပိူဝ်ႊၼၼ်ႉ ၶဝ်မႃးၶၢႆထီႇထိုင်တီႈၵျွင်းၼႆႉသေ ၸဝ်ႈလႆႈသိုဝ်ႉထီႇၶဝ် ဝၢႆးသိုဝ်ႉထီႇၶဝ်ယဝ်ႉ မွၵ်ႈၶၢဝ်းတၢင်း 3-4 ဝၼ်း ၶဝ် ထူဝ်းၾူၼ်းမႃး မီးလွင်ႈယႂ်ႇ တေဢုပ်ႇၸဝ်ႈၼႆသေ တေသူင်ႇၵူၼ်းမႃး ႁဵတ်းၼၼ်သေ ထိုင်မႃး ဝၼ်းတီႈ 18/9/2023 ၼၼ်ႉ ၸုမ်းၶဝ်ၼၼ်ႉ မႃးတီႈဝတ်ႉၼႆႉ 3-4 ၵေႃႉ။ ၶဝ်မႃးဢုပ်ႇဝႃႈ ပေႃးၸဝ်ႈသြႃႇႁဝ်း ၶႂ်ႈတိူဝ်ႉထီႇ 5,000 သႅၼ်ပျႃးၸိုင် တေ လႆႈပၼ်ငိုၼ်း ၸိူင်ႉၼႆၸိူင်ႉၼၼ် ၸဝ်ႈၵေႃႈယုမ်ႇၶဝ် ၼႂ်းဝၼ်းၼၼ်ႉ ၸဝ်ႈပၼ်ငိုၼ်းထႆးၵႂႃႇ 200,000 ဝၢတ်ႇ ၵမ်းလဵဝ်”- ဝႃႈၼႆ။

ၵူၼ်းဢမ်ႇႁူႉၾၢႆႇ ဢၼ်မႃးယွၵ်ႇလႅၼ်ႇ ၸဝ်ႈၶူး တီႈဝတ်ႉဝၢၼ်ႈၵႅဝ်ႈလူင် မိူဝ်ႈဝၼ်းတီႈ 18/9/2023 ၼၼ်ႉ ႁႅင်းၵူၼ်း ၶဝ်မႃး  4 ၵေႃႉ။ ပဵၼ်ၽူႈၸၢႆး 1 ၵေႃႉလႄႈ ၽူႈယိင်း 3 ၵေႃႉ။ ၽူႈၸၢႆးၼၼ်ႉတႄႉ ႁေႃႈၵႃးမႃးသူင်ႇသေ ပႂ်ႉဝႆႉတီႈၵႃး။ တႃႇၽူႈ ယိင်း 3 ၵေႃႉၼၼ်ႉတႄႉ ၶိုၼ်ႈမႃးၸူး တီႈၸဝ်ႈၶူး ၽူႈဢွၼ်မႃးဢုပ်ႇၼၼ်ႉသမ်ႉ ပဵၼ်တေႃႇၶိၼ်ႇ ၶိၼ်ႇၶလႄႈ မရတၼႃႇ ၼႆ ယဝ်ႉ။

တႄႇဢဝ် ဝၼ်းတီႈ 18 ၼၼ်ႉမႃး ၸဝ်ႈၶူးသၢႆလႅင်းၶိူဝ်း လႆႈပၼ်ငိုၼ်းထႆး ၵမ်းသိုဝ်ႈ 2 သႅၼ်ဝၢတ်ႇ ဝၢႆးၼၼ်ႉ ၶိုၼ်းဢဝ် ငိုၼ်းထႆး လႅၵ်ႈပဵၼ်ငိုၼ်းမၢၼ်ႈသေ ဢူၼ်းပၼ်ၶဝ်တၢင်းၼႂ်းပၢၼ်ႇ (ယေးငိုၼ်း) လႄႈ Wave Money ၸိူဝ်းၼႆႉထႅင်ႈ ဢမ်ႇယွမ်း 10 ပွၵ်ႈ။ 1 ပွၵ်ႈလႂ် ဢူၼ်းပၼ် ဢေႇသုတ်း 20,000 ဝၢတ်ႇ (ငိုၼ်းမၢၼ်ႈမွၵ်ႈ 30 သႅၼ်ပျႃး)လႄႈ ၼမ်သုတ်း 100 သႅၼ်ပျႃး ၸိူဝ်းၼႆႉ။

“ၵမ်းလိုၼ်းသုတ်း ဢၼ်ၸဝ်ႈၶူးလႆႈဢူၼ်းပၼ်ၼႆႉ ပဵၼ်ဝၼ်းတီႈ 12/10/2023 ၼႆႉ။ လင်ၼႆႉမႃး ၸဝ်ႈၶူးၵပ်းၸူးၶဝ်ယူႇ ၵေႃႈ တိတ်းယူႇ ၵူၺ်းၵႃႈ ၶဝ်ဢမ်ႇႁပ်ႉသၢႆ မိူၼ်မိူဝ်ႈၵူႈပွၵ်ႈယဝ်ႉ။ မိူဝ်ႈၵူႈပွၵ်ႈတႄႉ ထူဝ်းႁႃၶဝ် ႁပ်ႉသၢႆယူႇ ၵမ်ႉၶဝ်ဝႃႈ မီးတီႈ ၼေႇပျီႇတေႃႇ၊ မီးတီႈၵဵင်းတုင် မီးတီႈၼႆႈ တီႈၼၼ်ႈ ယဝ်ႉၵေႃႈ လၢတ်ႈၸဝ်ႈဝႃႈ ႁႂ်ႈဢူၼ်းငိုၼ်းၶဝ် ႁဵတ်း ၼၼ် ႁဵတ်းၼႆသေ ၸဝ်ႈလႆႈဢူၼ်းပၼ်ၵႂႃႇၼႆႉ ဢမ်ႇယွမ်း 10 ပွၵ်ႈယဝ်ႉ ၵမ်းလိုၼ်းမႃး ၸဝ်ႈၸင်ႇႁူႉဝႃႈ ထုၵ်ႇယွၵ်ႇလွၵ်ႇလႅၼ်”- ၸဝ်ႈၶူး သၢႆလႅင်း ၶိူဝ်း သိုပ်ႇလၢတ်ႈၼႄၼင်ႇၼႆ။

သင်ဝႃႈ မီးတၵ်ႉၵႃႇ ၵူၼ်းၶႂ်ႈမႃးလူႇတၢၼ်းဢၼ်ၼႆႉ ဢၼ်ၼၼ်ႈၼႆသေ တေလႆႈပၼ်ငိုၼ်းၶဝ် ဢွၼ်တၢင်း ၵႃႈၼႆႉ ၵႃႈၼၼ်ႉ ၵွၼ်ႇၼႆသေ ၸင်ႇၶႂ်ႈဢွၼ်ႇမႃးလူႇတၢၼ်းပၼ်ၼႆၸိုင် ယႃႇပေယုမ်ႇငၢႆႈသေ ဢူၼ်းငိုၼ်းပၼ် ၸဝ်ႈၶူး သၢႆလႅင်းၶိူဝ်း တိုၵ်းသူၼ်း ပၼ်ၾၢင်ႉထိုင် သင်ၶၸဝ်ႈလႄႈ တၵ်ႉၵႃႇသတ်ႉထႃး ၸိူင်ႉၼင်ႇၼႆ။  

ဝၢႆးသိုၵ်းမၢၼ်ႈ ယိုတ်းမႃးၶၢဝ်းတၢင်း 2 ပီပၢႆၼႆႉ ဝၢၼ်ႈမိူင်းဢမ်ႇမီးလွင်ႈႁူမ်ႇလူမ်ႈ ၼိမ်သဝ်း ယဝ်ႉၵေႃႈ ၽူႈလၵ်ႉၸၵ်ႉ ၶုတ်ႈ  ၵူၼ်းလွၵ်ႇလႅၼ်ၵိၼ်ၵၼ် တင်းဢွၼ်ႊလၢႆႊ ၸိူဝ်းၼႆႉၵေႃႈ လိူင်ႇၼမ်ႁႅင်း မိူၼ်ၼင်ႇ ၸွမ်းလႅၼ်လိၼ်တႆး – ထႆး ဝဵင်းတႃႈၶီႈ လဵၵ်းလႄႈ လႅၼ်လိၼ်တႆး – ၶႄႇ ဝဵင်းမူႇၸေႊ၊ လၢဝ်ႇၵၢႆး၊ ပၢင်သၢင်းလႄႈ မိူင်းလႃး ၸိူဝ်းၼႆႉ။

ၼႂ်းလိူၼ်ၼႆႉ ၶၢဝ်းတၢင်း 16 ဝၼ်းၵူၺ်း တီႉၺွပ်းလႆႈ ၵူၼ်းလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၸွမ်းလႅၼ်လိၼ် မိူင်းႁူမ်ႈတုမ်မၢၼ်ႈ – ၶႄႇ 4,600 ပၢႆၼႆ လူင်ပွင်ၸိုင်ႈၶႄႇ ပိုၼ်ၽၢဝ်ႇဝႆႉၼင်ႇၼႆ။