ၼႂ်းႁူဝ်လိူၼ်ၼႆႉ မီးၶၢဝ်ႇလိုဝ်းတၢင်းဢွၼ်ႊလၢႆႊဝႃႈ တပ်ႉၵူၼ်းမိူင်းလွတ်ႈလႅဝ်းမၢၼ်ႈ BPLA ( ဗမာပြည်သူ့ လွတ် မြောက်ရေးတပ်မတော်) ဢၼ်တူင်ႉၼိုင်ယူႇၼႂ်းၸႄႈဝဵင်းမူႇၸေႊၼၼ်ႉ ဢွၵ်ႇလိၵ်ႈပိုၼ်ၽၢဝ်ႇ တေၵဵပ်း ၶွၼ်ႇ ၵူၼ်းမိူင်း လွင်ႈၼႆႉ BPLA ၶိုၼ်းလၢတ်ႈဝႃႈ ဢၼ်ၽႄႈယူႇတၢင်းဢွၼ်ႊလၢႆႊၼၼ်ႉ ပဵၼ်လိၵ်ႈပိုၼ်ၽၢဝ်ႇဢၼ် ပွမ်ၵူၺ်း ဝႃႈၼႆ။

 လိၵ်ႈပိုၼ်ၽၢဝ်ႇ BPLA ဢၼ်ၽႄႈဝႆႉယူႇတၢင်းဢွၼ်ႊလၢႆႊၼၼ်ႉ ပႃးဝႆႉဝႃႈ – “ ၸဝ်ႈပၢႆးမၢၵ်ႈမီး ဢၼ်ႁဵတ်းသၢင်ႈ ယူႇၸွမ်း ၼႂ်းပိုၼ်ႉတီႈဢၼ်  တပ်ႉၵူၼ်းမိူင်းလွတ်ႈလႅဝ်းမၢၼ်ႈ BPLA ( ဗမာပြည်သူ့လွတ်မြောက်ရေးတပ်မတော်) ၵုမ်းၵမ်ၼႆႉ တေလႆႈသႂၢင်းၶွၼ်ႇ  ၊ ပေႃးဢမ်ႇသႂၢင်းၶွၼ်ႇသေ သိုပ်ႇႁဵတ်းၵၢၼ်ယူႇပေႃးၼႆၸိုင် BPLA တေဢဝ်လိူင်ႈ ပၼ်တူတ်ႈတၢမ်ႇ ။ ႁႂ်ႈၵပ်းသိုပ်ႇ BPLA တပ်ႉမႁႃႇ မၢႆ 2 ၵမ်းလဵဝ် ” – ဝႃႈၼႆဝႆႉ။

တႄႇဢဝ်ႁူဝ်ပီ 2023 ၼၼ်ႉမႃး ၸႄႈဝဵင်းမူႇၸေႊၼႆႉ ၵႆႉမီးလွင်ႈၸုမ်းယိပ်းၵွင်ႈၵၢင်ႇ ၶဝ်ႈၼႂ်းဝၢၼ်ႈၼႂ်းဝဵင်းသေ ၵဵပ်းၶွၼ်ႇၵူၼ်းမိူင်း။ မိူဝ်ႈလဵဝ် လိၵ်ႈပိုၼ်ၽၢဝ်ႇယွၼ်းၶွၼ်ႇၼႆႉသမ်ႉ ဢွၵ်ႇမႃးထႅင်ႈလႄႈ ၵူၼ်းမိူင်းယိင်ႈၶႅၼ်းလႆႈႁၢပ်ႇ လၢႆမႃႇလၢႆၵၢၼ်း ၶၢင်းပွင်ႉၵိၼ်းၸႂ်။

ၵူၼ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဢွၼ်တၢင်းၵေႃႈ ၵႆႉလႄႇမီးၼႃႇၼေႃႈ လွင်ႈဝႃႈ ၸုမ်းယိပ်းၵွင်ႈၵၢင်ႇ ၵဵပ်းၶွၼ်ႇၼႆ ။ ယွၼ်ႉဝႃႈ ၸုမ်းယိပ်းၵွင်ႈၵၢင်ႇ တူင်ႉၼိုင်လၢႆၸုမ်းလႄႈ ၵူၼ်းမူႇၸေႊတႄႉ လႆႈၵူဝ်ယူႇတႃႇသေႇ ဢေႃႈ။ မိူဝ်ႈလဵဝ်ၶႅၼ်းၼႃႇယဝ်ႉ။ လွင်ႈလွၵ်ႇလႅၼ်ၵၼ်ၵေႃႈ မီးမႃးၼမ်လႄႈ လိၵ်ႈဢၼ်လိုဝ်းယူႇတေႃႇလဵဝ်ၼႆႉ ၵမ်ႈၽွင်ႈဝႃႈ ဢၼ်တေႉမၼ်း ၵမ်ႈၽွင်ႈဝႃႈ ဢမ်ႇၸႂ်ႈဢၼ်တေႉမၼ်း” –  ဝႃႈၼႆ။

ဢိင်ၼိူဝ် လွင်ႈလိၵ်ႈပိုၼ်ၽၢဝ်ႇ ၵဵပ်းၶွၼ်ႇၼၼ်ႉသေ BPLA တႄႉ လၢတ်ႈဝႃႈ လွင်ႈၼႆႉ ပဵၼ်ၶၢဝ်ႇလိုဝ်း ၊ မီးၸုမ်းဢမ်ႇႁူႉၾၢႆႇၶိုင်ႁဵတ်းဢွၵ်ႇမႃးၵူၺ်းဝႃႈၼႆ။

ၽူႈမီးပုၼ်ႈၽွၼ်းၼႂ်းၸုမ်း BPLA  လၢတ်ႈတီႈၽူႈတွႆႇႁွၵ်ႈဝႃႈ – “ လိၵ်ႈၼႆႉ ပဵၼ်လိၵ်ႈပွမ်ၵူၺ်း ။ ဢၼ်ၶဝ် တွၵ်ႇၸုမ်ႈဝႆႉၸိူဝ်းၼၼ်ႉၵေႃႈ ပဵၼ်ဢၼ်ပွမ်မူတ်း ။ ၸုမ်းႁဝ်းၶႃႈတီႈၼႆႈ ဢမ်ႇမီးသုၼ်ႇၵဵပ်းၶွၼ်ႇၵမ်းသိုဝ်ႈ ႁဵတ်းၼၼ်ၶႃႈ။ တူၺ်းဢဝ် ဢၼ်ႁဝ်းၶႃႈယၢမ်ႈဢွၵ်ႇလိၵ်ႈပိုၼ်ၽၢဝ်ႇၸိူဝ်းၼၼ်ႉၵူၺ်းၵေႃႈႁူႉလႆႈၶႃႈဢေႃႈ ။ ဝႃႈလိၵ်ႈၼႆႉ တေပဵၼ်ဢၼ်တေႉဝႃႈပွမ်။ ၸုမ်းႁဝ်းၶႃႈ ဢမ်ႇမီးပုၼ်ႈၽွၼ်းႁဵတ်းသင်လႆႈတေႉတေႉ တီႈမူႇၸေႈၼႆႉ လၢတ်ႈသိုဝ်ႈသိုဝ်ႈၵေႃႈ ယူႇတႂ်ႈဢၢမ်းၼၢတ်ႈၶွင် MNDAA (611) ၵူၺ်းဢေႃႈ။ဢၼ်ဢွၵ်ႇလိၵ်ႈမႃးၼႆႉ တေပဵၼ်ၵူၼ်းဢၼ်ၶႂ်ႈယႃႉၸိုဝ်ႈသဵင်ႈၵၼ်ၵူၺ်း။ တီႈတေႉမၼ်း ၸုမ်းႁဝ်း ဢမ်ႇလႆႈၵဵပ်းၶွၼ်ႇသေတီႈ ။ ၵမ်းၼႆႉ ပေႃးဢဝ်ၸိုဝ်ႈႁဝ်း မႃးယွၼ်းၼႆ ၵူၼ်းမိူင်း ဢမ်ႇလူဝ်ႇပၼ် ” – ဝႃႈၼႆ။

ၸိုင်ႈတႆးပွတ်းႁွင်ႇၼႆႉ ၵမ်ႈၼမ် ၵူၼ်းမိူင်းၺႃးၸုမ်းယိပ်းၵွင်ႈၵၢင်ႇ ၵဵပ်းယွၼ်းၶွၼ်ႇ ပေႃးၵူၼ်းမိူင်းဢမ်ႇပၼ်ၵေႃႈ မီးလွင်ႈလွၵ်ႇငိုတ်ႈႁၢဝ်ႈႁႅင်း မၢင်တီႈၺႃးပိုတ်းယိုဝ်းတီႈယူႇတၼ်းသဝ်း ။ ဝၼ်းတီႈ 16/10/2023 ယၢမ်းၶမ်ႈၼၼ်ႉၵေႃႈ မၢၵ်ႇတႅၵ်ႇ တီႈၼႃႈႁၢၼ်ႉလၢင်ႉရူတ်ႉၵႃး (အမိအိမ် ရေဆေးခုံ) ႁိမ်းသူၼ်မွၵ်ႇ ၵၢင်ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လုၵ်ႈၼိုင်ႈ ၊ ပဵၼ်ၼမ်ႉမိုဝ်းၽႂ်မႃးႁၢင်ႈၵၢင်ဝႆႉ ဢမ်ႇႁူႉ ႁၢၼ်ႉတေႃႇ ထိုင်ယၢမ်းလဵဝ် ပလိၵ်ႈ ပႆႇတီႉၺွပ်းလႆႈ။

လွင်ႈမၢၵ်ႇၵႆႉတႅၵ်ႇၼႆႉ ၵမ်ႈၼမ် ပဵၼ်ယွၼ်ႉၸုမ်းယိပ်းၵွင်ႈၵဵပ်းၶွၼ်ႇ လွၵ်ႇငိုတ်ႈၸဝ်ႈႁူင်းၵၢၼ်၊ ဢမ်ႇၼၼ် ၸုမ်းၶႂ်ႈသၢင်ႈပၼ်ႁႃ ၼႄၾၢင်ႁၢင်ႈဝႃႈ ဝၢၼ်ႈမိူင်းတိုၵ်ႉသုၵ်ႉယုင်ႈယူႇၼႆၼၼ်ႉၵွႆး ၵူၼ်းပိုၼ်ႉတီႈဝဵင်းလႃႈသဵဝ်ႈ လၢတ်ႈၼင်ႇၼႆ။