ၵူၼ်းမိူင်းဝဵင်းၾၢႆၶုၼ် ၸဵမ်လုၵ်ႈဢွၼ်ႇလႄႈၵူၼ်းလူင် ၸပ်းတၢင်းပဵၼ်ၶူမ်းယဵၼ်းဢွၵ်ႇတုမ်ႇၸွမ်းတူဝ်ၸွမ်းၶိင်း ။

တႄႇဢဝ်လိူၼ်မေႊ ပီ 2023 ၼၼ်ႉမႃး ၵူၼ်းမိူင်းတီႈဝၢၼ်ႈသီႇၵိပ်ႇ(တိကျိတ်ကျေးရွာ) ၸႄႈဝဵင်းၾၢႆၶုၼ် လႅၼ်လိၼ်တႆး – ယၢင်းလႅင် ဢွၼ်ၵၼ်ၸပ်းတၢင်းပဵၼ်ၶူမ်းယဵၼ်း ထိုင်မိူဝ်ႈလဵဝ်ပႆႇၸိုၼ်ႈၶႅၼ်းၼႆယဝ်ႉ။

ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်မႃး လႆႈ 5-6 လိူၼ်ယဝ်ႉဢေႃႈၼႆႉ။မၢင်ၵေႃႉၵေႃႈ ၶႅၼ်းၵႂႃႇယူႇ။ မၢင်ၵေႃႉ တိုၵ်ႉသိုပ်ႇပဵၼ်ထႅင်ႈယူႇ။ဢၼ်ပဵၼ်တႄႉ ပဵၼ်ၶူမ်းပဵၼ်ယဵၼ်းၸွမ်းၽိဝ်ၼင်ၸိူဝ်းၼႆႉဢေႃႈ ။မၢင်ၵေႃႉၵေႃႈ ၸဵပ်းယဵၼ်းမီးတုမ်ႇၼွင်ဝႆႉ ဢေႃႈ ” –  ဝႃႈၼႆ။

ၵူၼ်းၸပ်းတၢင်းပဵၼ်ၶူမ်းယဵၼ်းၼႆႉ တင်းသဵင်ႈမီး 720 ၵေႃႉ ။ တၢင်းပဵၼ်ၼႆႉ ၸပ်းၵၼ်ငၢႆႈ ၸပ်းၵေႃႉၼိုင်ႈယဝ်ႉၵေႃႉၼိုင်ႈၸင်ႇဝႃႈၼႂ်းၶၢဝ်းတၢင်းသိပ်းသၢဝ်းဝၼ်းၵူၺ်း ဢွၼ်ၵၼ်ၸပ်းတၢင်းပဵၼ်ၶူမ်းယဵၼ်းၵႂႃႇမူတ်း။   လိူဝ်ၼၼ်ႉ ၵူၼ်းၸိူဝ်း ၸပ်းတၢင်းပဵၼ်ၶႆၼၢဝ်ၸိူဝ်းၼႆႉၵေႃႈမီး။ ဝၢၼ်ႈသီႇၵိပ်ႇ ၼႆႉယၢၼ်ၵႆၵၼ်တင်းဝဵင်းၾၢႆၶုၼ်မွၵ်ႈ 7 လၵ်း ။

ၼၢင်းယိင်းၵူၼ်းပၢႆႈၽေးၾၢႆၶုၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တၢင်းႁဝ်းၼႆႉၵေႃႈ ၸဵမ်လုၵ်ႈဢွၼ်ႇၵူၼ်းလူင် ပဵၼ်ၶႆႈပဵၼ်ၼၢဝ်ဝႆႉ။ပိူင်လူင်မၼ်းတႄႉၵေႃႈ ဢမ်ႇၸၢင်ႈႁဵတ်းလွင်ႈမူတ်းသႂ်တူဝ်လီလီၼၼ်ႉၶႃႈဢေႃႈ။ၵွပ်ႈဝႃႈ လႆႈၸႂ်ႉ ၼမ်ႉႁူၺ်ႈၼမ်ႉႁွင်ႈ ဢွၼ်ႇၵူၺ်းၼႃႇ ” –  ဝႃႈၼႆ။

တၢင်းပဵၼ်ၶူမ်းယဵၼ်းလႄႈ တၢင်းပဵၼ်ၶႆႈၼၢဝ်ၸိူဝ်းၼႆႉ ၵမ်ႈၼမ်ပဵၼ်ယွၼ်ႉလွင်ႈယူႇလွင်ႈၵိၼ်ဢမ်ႇမူတ်းသႂ် ၼႆယဝ်ႉ။

ဢိင်ၼိူဝ်လွင်ႈၼႆႉ မေႃယႃဢၼ်ယၢမ်ႈၸွႆႈထႅမ် ၵူၼ်းပၢႆႈၽေးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶႃႈဝူၼ်ႉမႅၼ်ႈတႄႉ ယွၼ်ႉဝႃႈ ၶဝ် ဢမ်ႇမီးလွင်ႈမူတ်းသႂ်ၼၼ်ႉၶႃႈဢေႃႈ။ တၢင်ႇဝၢၼ်ႈၵေႃႈ ၶႃႈယၢမ်ႈၵႂႃႇယူတ်းယႃမႃးယူႇၶႃႈ။ ၶဝ်လူဝ်ႇယႃႈယႃထႅင်ႈဢေႃႈ။ မိူဝ်ႈလဵဝ်သမ်ႉ ႁဝ်းၶႃႈၵေႃႈ တႃႇတေတေႃႉယႃ သိုဝ်ႉယႃ မၼ်းဢမ်ႇငၢႆႈၶႃႈ ဢမ်ႇထၢင်ႇႁၢင်ႈယဝ်ႉ ယွၼ်ႉဝႃႈ ဢမ်ႇမီးလွင်ႈႁူမ်ႇလူမ်ႈ ” – ဝႃႈၼႆ။

တႃႇၸွႆႈထႅမ်ယူတ်းယႃပၼ် ၵူၼ်းတိတ်ၸပ်းတၢင်းပဵၼ် တီႈလႅၼ်လိၼ်တႆး-ယၢင်းလႅင်ၸိူဝ်းၼႆႉ ယူႇတီႈၸုမ်း Kayan Women’s Organization ပိုၼ်ၽၢဝ်ႇတိုၵ်းသူၼ်းဝႆႉၵေႃႈမီး။