မိူဝ်ႈၼႆႉ ဝၼ်းတီႈ 10/10/2023 ယၢမ်းဝၢႆးဝၼ်း 1 မူင်း သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA သိုပ်ႇပဵၼ်ပၢင်တိုၵ်း ၵၼ်ထႅင်ႈ တီႈဝၢၼ်ႈၵုၼ်ၵွၵ်ႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ သွင်ၾၢႆႇပွႆႇမၢၵ်ႇလူင်ၸူး ၵၼ် ဢမ်ႇယွမ်း 5 လုၵ်ႈ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶၢင်သမ်ႉ ယူႇတီႈၽြႃးမုင်ႈမိူင်းၼၼ်ႉသေ ပွႆႇမၢၵ်ႇၸူးသိုၵ်း မၢၼ်ႈ ဢွၼ်တၢင်း လုၵ်ႈၼိုင်ႈ တီႈၼႂ်းဝၢၼ်ႈၵုၼ်ၵွၵ်ႇ။ သိုၵ်းမၢၼ်ႈသမ်ႉ ယူႇတီႈ ၼႂ်းဝၢင်းဝတ်ႉၵုၼ်ၵွၵ်ႇသေ ယိုဝ်းမၢၵ်ႇလူင်သႂ်ႇ သိုၵ်းၶၢင် တီႈၽြႃးမုင်ႈမိူင်း ဢမ်ႇယွမ်း 4 လုၵ်ႈ။ ဢွင်ႈတီႈ ဢၼ်ၶဝ်ယိုဝ်းသႂ်ႇၵၼ်ၼႆႉ ပဵၼ်ဢွင်ႈတီႈ သႃႇသၼႃႇ။ လွင်ႈၼႆႉ ဢမ်ႇထုၵ်ႇလီပဵၼ် ”- ဝႃႈၼႆ။
ဢိင်ၼိူဝ် လွင်ႈၶဝ်ပိုတ်းယိုဝ်းၵၼ်ၼႆႉသေ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ပႆႇႁူႉ။ ယဝ်ႉၵေႃႈ လွင်ႈမၢၵ်ႇမႃး တူၵ်းတႅၵ်ႇၼႂ်းဝၢၼ်ႈၵုၼ်ၵွၼ်ႇ တုမ်ႉတိူဝ်ႉႁိူၼ်းယေး လူႉၵွႆ ၸိူဝ်းၼႆႉတႄႉ ပႆႇႁူႉႁူဝ်ယွႆႈမၼ်း ဝႃႈၼႆ။
“ဢမ်ႇမီးၽႂ် ႁတ်းၵႂႃႇတူၺ်းၶႃႈ လွင်ႈတုမ်ႉတိူဝ်ႉ ႁိူၼ်းယေး လူႉၵွႆ ၸိူဝ်းၼႆႉ။ ယွၼ်ႉဝႃႈ ၵူၼ်းဝၢၼ်ႈၵုၼ်ၵွၵ်ႇသမ်ႉ ဢွၼ်ၵၼ် ပၢႆႈၽေးသိုၵ်းဝႆႉမူတ်းယဝ်ႉ။ မိူဝ်ႈၵႆႈ ယၢမ်းၵၢင်ၼႂ် ႁၼ်သိုၵ်းမၢၼ်ႈ လုၵ်ႉတၢင်းၸေႈဢူ ထႅမ်ႁႅင်းသိုၵ်းပႆမႃးထႅင်ႈတင်းၼမ်”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 7/10/2023 ယၢမ်းၵၢင်ၼႂ် 11 မူင်း သိုၵ်းမၢၼ်ႈ ဢၼ်ပၵ်းယူႇတီႈၽြႃးမုင်ႈမိူင်းၼၼ်ႉသေ ယိုဝ်းၵွင်ႈ လူင်းသႂ်ႇ သိုၵ်းၶၢင် KIA ဢၼ်ပႂ်ႉၵဵပ်းၶွၼ်ႇၾၢႆႇၼႃႈဝတ်ႉမုၼ်ၸဝ်ႈ ဝၢၼ်ႈၵုၼ်ၵွၵ်ႇၼၼ်ႉ မၢၵ်ႇလူင် သိုၵ်းမၢၼ်ႈ မႃးတူၵ်းသႂ်ႇ ၼႂ်းဝၢင်းဝတ်ႉ တႅၵ်ႇတိူဝ်ႉသႂ်ႇ ႁွင်ႈၼွၼ်းၸဝ်ႈသၢင်ႇလႄႈ လဵၵ်းမုင်း ၸိူဝ်းၼႆႉ ပွင်ႇၵႂႃႇတင်းၼမ် ထိုင်တီႈပေႃးလႆႈၶၢႆႉ ၸဝ်ႈ သၢင်ႇ မႃးယူႇဝႆႉတီႈ ဝတ်ႉႁူဝ်မိူင်း ၼႂ်းဢိူင်ႇၸေႈဢူ ၼႆယဝ်ႉ။
