ၼႂ်းဝူင်ႈၼႆႉ ပိဝ်ႇၸေႃးထီး လုၵ်ႈၸုမ်းသိုၵ်းမၢၼ်ႈယိုတ်းမိူင်း တင်ႈလၢၼ်ႇပႂ်ႉၵဵတ်ႉ ၵူတ်ႇထတ်း ၵဵပ်းၶွၼ်ႇ ၵူၼ်းမိူင်း ၸွမ်းဢွင်ႈတီႈၵိုၵ်းပိုၼ်း ၽြႃးသူၺ်ႇဢိၼ်းတဵင်ႇ ၸႄႈဝဵင်းယွင်ႁူၺ်ႈ ႁဵတ်းႁႂ်ႈၵူၼ်းမိူင်းဢမ်ႇထၢင်ႇႁၢင်ႈၵႂႃႇမႃး။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၵူႈပွၵ်ႈတႄႉ PNO ၶဝ်သင်ၶဝ် ပႂ်ႉၵဵပ်းယူႇၸွမ်းၸိူဝ်းၼၼ်ႉ။ ၵူၺ်းၼႃႇ ဢမ်ႇၵဵပ်းလူင်ၵႂႃႇၵူႈၵေႃႉႁဵတ်းၼႆ။ မိူဝ်ႈလဵဝ် တူၵ်းပၢၼ်ပိဝ်ႇၸေႃးထီးၶဝ်မႃးၵဵပ်းၼႆႉ ၽႂ်ႁိုၵ်ႉသႂ်ႇၵေႃႈ ၺႃးၵူႈၵမ်းယဝ်ႉ မိူၼ်ၼင်ႇ ၵႃးတၢင်ႇမူၼႆ လႆႈပၼ်ၼိုင်ႈလမ်းလႂ် 3 မိုၼ်ႇပျႃး ၊ ပေႃးပဵၼ်ၵႃးတၢင်ႇဝူဝ်းသမ်ႉ ၼိုင်ႈလမ်းလႂ် 8 မိုၼ်ႇပျႃးၼႆဢေႃႈ ” – ဝႃႈၼႆ။
သိုၵ်းမၢၼ်ႈ ၵဵပ်းငိုၼ်းၵူၼ်းမိူင်း ၸွမ်းသဵၼ်ႈတႃႈသၢႆတၢင်းၸိူင်ႉၼႆ ႁဵတ်းႁႂ်ႈၵူၼ်းမိူင်းၵႂႃႇမႃးဢမ်ႇမီးလွင်ႈႁူမ်ႇလူမ်ႈ ၵူၼ်းပိုၼ်ႉတီႈၶၢင်းပွင်ႉၼင်ႇၼႆ။
ၽူႈၶဝ်ႈၸုမ်းၽွမ်ႉႁူမ်ႈၼၢင်းယိင်းၼွင်ႁၢႆးယႃႈၵေႃႉၼိုင်ႈလၢတ်ႈတီႈတွႆႇႁွၵ်ႈဝႃႈ – “ ၶဝ်ၸိူဝ်းၼႆႉ ၼႄၶေႃႈဢၢင်ႈလၢႆမဵဝ်းသေ တီႉၺွပ်းၵူတ်ႇထတ်း ယွၼ်းငိုၼ်း ႁဵတ်းယူႇၵူႈလွၵ်းၵူႈလၢႆး ယဝ်ႉ။ ၵူၼ်းၺႃးတီႉၸိူဝ်းၼၼ်ႉၵမ်ႈၽွင်ႈၵေႃႈပွႆႇ ပၼ်ၶိုၼ်း ၵမ်ႈၽွင်ႈၵေႃႈ ဢမ်ႇပွႆႇ ” – ဝႃႈၼႆ။
ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းမိူင်းယွင်ႁူၺ်ႈ လႄႈ ထုင်ႉႁၢႆးယႃႈၸိူဝ်းၼႆႉ ဢမ်ႇမီးလွင်ႈႁူမ်ႇလူမ်ႈ မၢင်ၸိူဝ်းထုၵ်ႇတီႉၺွပ်းၵုမ်းၶင် မၢင်ၸိူဝ်းၺႃးထုပ်ႉပေႃႉၶႃႈႁႅမ်။
ဝၼ်းတီႈ 28/8/2023 ၼၼ်ႉၵေႃႈ ၵူၼ်းၼွင်ႁၢႆးယႃႈ 4 ၵေႃႉပေႃႈမႄႈလုၵ်ႈ ယူႇပွၵ်ႉ 3 ၊ ဝၢၼ်ႈသပျေႇတိတ်ႉ ထုင်ႉၼွင်ႁၢႆးယႃႈ၊ ၺႃးသိုၵ်းမၢၼ်ႈ ၶဝ်ႈထိုင်ၼႂ်းႁိူၼ်းသေ တီႉၺွပ်းဢဝ်ၵႂႃႇၵုမ်းၶင်။ ဝၢႆးၼၼ်ႉၶိုၼ်းမႃးယိုတ်းဢဝ်ႁိူၼ်းယေးၶဝ်ထႅင်ႈလႄႈ လုၵ်ႈဢွၼ်ႇဢမ်ႇမီးတီႈယူႇတီႈသဝ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ