မီးလွင်ႈလူဝ်ႇတွင်ႈထၢမ်ၼႆသေ သိုၵ်းမၢၼ်ႈထၢၵ်ႈၵေႃႉၼိုင်ႈတီႈၼွင်ႁၢႆးယႃႈ ၺႃးတီႉၺွပ်းၵုမ်းၶင်ဝႆႉ တီႈႁူင်းပလိၵ်ႈယွင်ႁူၺ်ႈ ၸႄႈတွၼ်ႈတူၼ်ႈတီး မိူဝ်ႈဝၼ်းတီႈ 8/10/2023 ၼႆႉ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸၵၸၶဝ် (ၾၢႆႇၸွပ်ႇၶၢဝ်ႇသိုၵ်းမၼ်ႈ) မႃးၸူဝ်းမၼ်းၵႂႃႇတီႈလၢၼ်ႉၶၢႆၼမ်ႉၼဵင်ႈၸဵမ်းၼႆသေ တီႉၺွပ်းဢဝ်ၵႂႃႇတီႈႁူင်းပလိၵ်ႈယွင်ႁူၺ်ႈ တႄႇဢဝ် ၶၢဝ်းယၢမ်း 11 မူင်းထိုင် 3 မူင်းႁူဝ်ၶမ်ႈ။ႁွင်ႉမၼ်းၶဝ်ႈႁွင်ႈထဵတ်ႈထၢမ်ၵေႃႉလဵဝ်ၼႆဢေႃႈ။ ၸႂ်ႉၵူၼ်းၵႂႃႇၸွမ်း ပႂ်ႉဝႆႉတၢင်းၼွၵ်ႈၼႆဢေႃႈ။ ဝၢႆးၼၼ်ႉလၢတ်ႈဝႃႈ လူဝ်ႇၵုမ်းၶင်ဝႆႉၼႆသေ ၸႂ်ႉၵူၼ်းၵႂႃႇၸွမ်းၸိူဝ်းၼၼ်ႉ ပွၵ်ႈၶိုၼ်းဢေႃႈ ” – ဝႃႈၼႆ။

သိုၵ်းမၢၼ်ႈထၢၵ်ႈ ဢၼ်ၺႃးၺွပ်းၼႆႉ ၸိုဝ်ႈ ထႅတ်ႉဢွင်ႇ တႄႇၼႃႈႁိူၼ်းသေ မီးလုၵ်ႈဢွၼ်ႇၸၢႆး ဢႃယု 3 ၶူပ်ႇ ဝႆႉၵေႃႉၼိုင်ႈ ။ မိူဝ်ႈလဵဝ်လုၵ်ႈလၢင်းၼၢင်းမေး   ထူပ်းတၢင်းယၢပ်ႇၽိုတ်ႇဝႆႉၼႆယဝ်ႉ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းပိဝ်ႇၸေႃးထီးလႄႈပလိၵ်ႈၶဝ် မႃးတီႈႁိူၼ်းၼၼ်ႉသေ ႁွင်ႉၵႂႃႇ။ မိူဝ်ႈလဵဝ် တီႈႁိူၼ်းၼၼ်ႉ မေးမၼ်းလႄႈ လုၵ်ႈမၼ်း တေယူႇတေၵိၼ်ၸိူင်ႉႁိုဝ်ဢမ်ႇႁူႉ။ဢမ်ႇႁူႉလိူင်ႈႁူႉလၢဝ်းသင်သေ ၺႃးၺွပ်းၸိူင်ႉၼႆ ” – ဝႃႈၼႆ။

ထႅတ်ႉဢွင်ႇၼႆႉ ထွၼ်တူဝ်ဢွၵ်ႇတပ်ႉမႃး ၸဵမ်မိူဝ်ႈ ပီ 2019 ။ မိူဝ်ႈလဵဝ် ႁဵတ်းၵၢၼ်လဵင်ႉဝူဝ်းသေႁႃလဵင်ႉၼႃႈႁိူၼ်းဝႆႉ။ၵူၺ်းၵႃႈ မိူဝ်ႈလဵဝ် ထုၵ်ႇသူင်ႇၵုမ်းၶင်တူဝ်ဝႆႉတီႈ တပ်ႉတိူင်းသိုၵ်း ရပၶ ယဝ်ႉလႆႈႁူႉၼင်ႇၼႆ။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းမိူင်းထုင်ႉၼွင်ႁၢႆးယႃႈ ဢမ်ႇမီးလွင်ႈႁူမ်ႇလူမ်ႈ ထုၵ်ႇတီႉၺွပ်းၵုမ်းၶင် မၢင်ၸိူဝ်းၺႃးထုပ်ႉပေႃႉၶႃႈႁႅမ်။

မိူဝ်ႈဝၼ်းတီႈ 28/8/2023 ၼၼ်ႉၵေႃႈ ၵူၼ်းၼွင်ႁၢႆးယႃႈ 4 ၵေႃႉပေႃႈမႄႈလုၵ်ႈ ယူႇပွၵ်ႉ 3 ၊ ဝၢၼ်ႈသပျေႇတိတ်ႉ ထုင်ႉၼွင်ႁၢႆးယႃႈ၊  ၺႃးသိုၵ်းမၢၼ်ႈ ၶဝ်ႈထိုင်ၼႂ်းႁိူၼ်းသေ တီႉၺွပ်းဢဝ်ၵႂႃႇၵုမ်းၶင်။ ဝၢႆးၼၼ်ႉၶိုၼ်းမႃးယိုတ်းဢဝ်ႁိူၼ်းယေးၶဝ်ထႅင်ႈလႄႈ လုၵ်ႈဢွၼ်ႇဢမ်ႇမီးတီႈယူႇတီႈသဝ်း။