ၼႂ်းၶၢဝ်းၾူၼ် ပီ 2023 ၼႆႉ ၼူယႃႉတဝ်ၶူပ်းၵိၼ်ၶဝ်ႈၵၢပ်ႇၼႂ်းသူၼ် ၵူၼ်းမိူင်းၼမ်ႉလၼ်ႈ ၸဝ်ႈသူၼ်မႆႈၸႂ် ၵူဝ် ဢမ်ႇလႆႈၶိုၼ်းငိုၼ်းတိုၼ်း ဝႃႈၼႆ ။
ၸဝ်ႈသူၼ်ၶဝ်ႈၵၢပ်ႇ ၸႄႈဝဵင်းၼမ်ႉလၼ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “သူၼ်ၸွမ်းလွႆမိူၼ်ၼင်ႇ တၢင်းႁွင်ႇ လွႆၵူင်ၼၼ်ႉႁေ ပီၼွင်ႉဝၢၼ်ႈၶၢႆးၶဝ်ၸိူဝ်းၼႆႉဢေႃႈ ၺႃးၼူၶူပ်း ၵိၼ်ၵႂႃႇမူတ်းပိတ်းတင်းသူၼ်တႄႉၵေႃႈ ဢမ်ႇၸႂ်ႈ ၼင်ႇၵဝ်ႇ။ ၵူၺ်းၼႃႇၶဝ်ၵိၼ်ၵႂႃႇၸွမ်းလႅၼ်မၼ်းတိၵ်းတိၵ်း။ ၵႂႃႇလွၵ်ႇၵႂႃႇယႃႉယူႇၵေႃႈ သမ်ႉဢမ်ႇပၢႆႈ ” – ဝႃႈၼႆ။
ၵဵဝ်ႇၵပ်းလွင်ႈၼႆႉ ပႆႇမီးမူႇလႂ်ၸုမ်းလႂ် မႃးတူၺ်းထိုင်လူလွမ်ပၼ် ။ လိူင်ႈၼူယႃႉၶဝ်ႈၵၢပ်ႇ ၵူၼ်းဝၢၼ်ႈ ၵူၼ်းမိူင်း ပွတ်းထုင်ႉဝဵင်းၼမ်ႉလၼ်ႈၼႆႉ မီးၵူႈပီ ။ ပီၼႆႉသမ်ႉၶႅၼ်းၶူပ်းယႃႉၼမ်လိူဝ်တၢင်ႇပီလႄႈ ၶဝ်ႈၵၢပ်ႇလႅပ်ႈတေဢမ်ႇလႆႈ ပဵင်းၼင်ႇၸဝ်ႈသူၼ် ယိူင်းဢၢၼ်းဝႆႉသေ တေလူတ်းယွမ်းၵႂႃႇတိၵ်းတိၵ်းယဝ်ႉႁိုဝ်ဝႃႈၼႆ။
ၸဝ်ႈသူၼ်ၶဝ်ႈၵၢပ်ႇ ၸႄႈဝဵင်းၼမ်ႉလၼ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ဢဝ်မၢၵ်ႇဢၼ်မဵၼ်မဵၼ်ၼၼ်ႉ ၵႂႃႇထိုမ်ႈဝႆႉၵႂႃႇပႅတ်ႈဝႆႉၸွမ်း လႅၼ်မၼ်း ။ မၢင်တီႈၵေႃႈလႆႈဢဝ်ယႃမိူဝ်ႇလေႃးတၢင်းၵိၼ်သေ ၵႂႃႇဢွႆႇဝႆႉၸွမ်းလႅၼ်ႁႆႈ ၸိူင်ႉၼၼ်ၵွၼ်ႇ ၶဝ်ၸင်ႇၵွႆႈတေဢမ်ႇမႃးၵိၼ်ၶဝ်ႈၵၢပ်ႇ ။ ၵူႈပီၵေႃႈ ယၢမ်ႈလႆႈႁဵတ်းၸိူင်ႉၼၼ်မႃးၶႃႈဢေႃႈ ” – ဝႃႈၼႆ ။
ႁူင်းၶဝ်ႈၵၢပ်ႇ ယႂ်ႇမၢၵ်ႈလီ ၊ ထုၵ်ႇလႆႈၵႃႈၶၼ်သုင်ယူႇၵေႃႈ ယွၼ်ႉၼူသွၵ်ႈတဝ်ၶူပ်းၵိၼ်လႄႈ ဢမ်ႇလႆႈ၊ ၸိူဝ်းဢၼ် လူင်းတိုၼ်းလၢင်းၵူၺ်း ၽုၵ်ႇၵူၺ်းၵေႃႈ ၸၢင်ႈသုမ်းတိုၼ်းလၢင်းသေ ၸိူဝ်းလႆႈၵူႈယိမ်သေလူင်းတိုၼ်းလၢင်းဝႆႉၵေႃႈ လႆႈပဵၼ်ၼီႈပဵၼ်ၶွတ်ႇ။
ၼၢင်းယိင်းၸဝ်ႈသူၼ်ၶဝ်ႈၵၢပ်ႇ ၸႄႈဝဵင်းၼမ်ႉလၼ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မီးတိုၼ်းလၢင်းယူႇၵေႃႈ ပေႃးႁဵတ်းႁၢင်းၵူၺ်းတႄႉၵေႃႈ တၢၼ်ႇလႆႈၵိၼ်ၼမ်ၵေႃႈလႆႈၵိၼ်ၵႄႇၼၼ်ႉၼႃႇၼေႃႈ ။ ဢၼ်ႇလႆႈၵႂႃႇဢဝ်တီႈ ပေႃႈလဵင်ႉ သေမႃး ၽုၵ်ႇဝႃႈသင်ဝႃႇၸိူဝ်းၼႆႉတႄႉၵေႃႈ ၵမ်ႈၽွင်ႈၵေႃႈသၢႆႈလႆႈ ၵမ်ႈၽွင်ႈၵေႃႈဢမ်ႇသၢႆႈပေႇလႆႈ ၼၼ်ႉၶႃႈၼႃႇၼေႃႈ။ တၢင်းဢၼ်ႁဵတ်းယၢပ်ႇသေ တၢင်းဢၼ်လႆႈမႃး ၵေႃႈမၼ်းဢမ်ႇၵိုင်ႇၵၼ်ၼၼ်ႉၶႃႈၼႃႇ။ မၢင်ႁိူၼ်းၼႆၵေႃႈ မၼ်းဢမ်ႇၵိုင်ႇငၢမ်ႇၵၼ် လႆႈႁဵတ်း ဢဝ်လွင်ႈတၢင်းတုၵ်ႉၶမၼ်းၵူၺ်းၶႃႈ ” – ဝႃႈၼႆ။
သူၼ်ၶဝ်ႈၵၢပ်ႇပွတ်းထုင်ႉဝဵင်းၼမ်ႉလၼ်ႈၼႆႉ မီးဢမ်ႇယွမ်း 1000 ဢေႊၶိူဝ်ႊ ။ ဢၼ်ၺႃးၼႆႉ မိူၼ်ၼင်ႇ ႁိမ်းႁွမ်းၶႅပ်ႇဝဵင်းၼမ်ႉလၼ်ႈ ၸဵမ်ဢဝ် ဝၢၼ်ႈၼမ်ႉတွင်ၸိင် ၊ ဝၢၼ်ႈလီးသေႃး၊ ဝၢၼ်ႈၼွင်ဝူဝ်း ၊ ဝၢၼ်ႈၶၢႆး ၼႂ်းဢိူင်ႇမိူင်းၶိူဝ်းလႄႈ ဢိူင်ႇသီႇထွၵ်ႈၸိူဝ်းၼႆႉ ။
