မိူဝ်ႈၼႆႉ ဝၼ်းတီႈ 9/10/2023 ယၢမ်းၵၢင်ၼႂ်မွၵ်ႈ 8:20 မူင်း မီးၵူၼ်းႁၢႆႉ 5 ၵေႃႉ ၶီႇၵႃး (Crown) သီသွမ်ႇ လမ်းၼိုင်ႈ မႃး ၸၵ်ႉၸၼ်ဢဝ်ဢွၼ်ႇၸၢႆး ဢႃယုမွၵ်ႈ 4 ၶူပ်ႇ ၵေႃႉၼိုင်ႈ ၼႂ်းမိုဝ်းပေႃႈမႄႈလုၵ်ႈဢွၼ်ႇ ၽွင်းၵႂႃႇသူင်ႇတီႈႁူင်းႁဵၼ်း ၸၼ်ႉဢွၼ် (မူကြို) တီႈပွၵ်ႉၸရေးတၢၼ်း ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်ၵူၼ်းႁၢႆႉ 5 ၵေႃႉ မႃးႁိမ်ဢဝ် လုၵ်ႈဢွၼ်ႇ ၼႂ်းမိုဝ်းပေႃႈမႄႈ ၵႂႃႇ ၵမ်းလဵဝ် တီႈပွၵ်ႉၸရေးတၢၼ်း ၽွင်းတိုၵ်ႉသူင်ႇလုၵ်ႈဢွၼ်ႇၵႂႃႇႁူင်းႁဵၼ်းၶႃႈဢေႃႈ။ ဝၢႆးၶဝ်ႁိမ်ၵႂႃႇယဝ်ႉ တီႈၼႂ်းပွၵ်ႉၼၼ်ႉ ထုၵ်ႇသင်ႇပိၵ်ႉ သဵၼ်ႈတႃႈသၢႆတၢင်း တၢင်းမူတ်းသေပႂ်ႉထတ်းသွၵ်ႈရူတ်ႉ/ၵူၼ်းၵႂႃႇမႃး။ ၽိူဝ်ႇဝႃႈ ၵူၼ်းႁၢႆႉ ဢဝ်လုၵ်ႈဢွၼ်ႇပၢႆႈၵႂႃႇထိုင်တီႈဝၢၼ်ႈ ဢၼ်မီး 13 လၵ်း တၢင်းၽႄ ၼမ်ႉၶမ်း-ၼမ်ႉၽၵ်းၵႃၼၼ်ႉ ၺႃးပျီႇတူႉၸိတ်ႉတီႈဝၢၼ်ႈၼၼ်ႉသိုဝ်းယႂ်ႇလႄႈ ပဵၼ်ပၢင်ပိုတ်းယိုဝ်းၵၼ်။ ၾၢႆႇၵူၼ်းႁၢႆႉ တၢႆထင် တီႈ ၵေႃႉၼိုင်ႈ တီႉလႆႈ 2 ၵေႃႉ” – ဝႃႈၼႆ။

လုၵ်ႈဢွၼ်ႇ ဢႃယု 4 ၶူပ်ႇဢၼ်မီးၼႂ်းၵႃးၼၼ်ႉၵေႃႈ လႆႈတိူဝ်ႉမၢၵ်ႇၵွင်ႈမၢတ်ႇၸဵပ်းၸွမ်းသေ သူင်ႇယူတ်းယႃတူဝ်ဝႆႉတီႈ ႁူင်းယႃလူင်ဝဵင်းမိူင်းမၢဝ်း ၸိုင်ႈမိူင်းၶႄႇ ဝႆႉယဝ်ႉ ။

ၵူၼ်းႁၢႆႉၼၼ်ႉ တင်းမူတ်း မီးဢဵၼ်ႁႅင်း 5 ၵေႃႉ ၵႃးသွင်လမ်း တႃႇလမ်းၼိုင်ႈသမ်ႉ ပၢႆႈလွတ်ႈဝႆႉ။ ၼႂ်းၵႃး ဢၼ်မီးလုၵ်ႈဢွၼ်ႇၼၼ်ႉ တင်းမူတ်းမီး 4 ၵေႃႉ ပဵၼ်ၵူၼ်းႁၢႆႉ 3 ၵေႃႉလႄႈ လုၵ်ႈဢွၼ်ႇ ဢႃယု 4 ၶူပ်ႇၼႆႉ ၵေႃႉၼိုင်ႈ ၼႆယဝ်ႉ။

ယၢမ်းလဵဝ် တူဝ်ၵူၼ်းႁၢႆႉၼၼ်ႉ ယူႇတီႈ ၸုမ်းပျီႇတူႉၸိတ်ႉၶဝ် လႆႈဢဝ်သူင်ႇဢၢပ်ႈပၼ် တီႈပလိၵ်ႈမၢၼ်ႈ ဝဵင်းၼမ်ႉၶမ်းဝႆႉယဝ်ႉ  တႃႇတေသိုပ်ႇဢဝ်လိူင်ႈပၼ်တူတ်ႈတၢမ်ႇၵႂႃႇ ဝႃႈၼႆ။

ၵူၼ်းႁၢႆႉ ဢၼ်ႁိမ်းဢဝ်လုၵ်ႈဢွၼ်ႇပၢႆႈၼႆႉ ပဵၼ်ၸၢဝ်းၶႄႇ ယဝ်ႉၵေႃႈ ပႃးၵူၼ်းမိူင်းၶႄႇၸွမ်းထႅင်ႈ 1 ၵေႃႉ လုၵ်ႈဢွၼ်ႇ ၼၼ်ႉၵေႃႈ ပဵၼ်ၸၢဝ်းၶႄႇၼင်ႇၵၼ် ၼႆယဝ်ႉ။