မိူဝ်ႈၼႆႉ ဝၼ်းတီႈ 9/10/2023 ယၢမ်းၵၢင်ၼႂ် 10:45 မူင်း သိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင်မႃးတူၵ်းတႅၵ်ႇ ၼႂ်း ဝၢၼ်ႈ ၵွင်းၶဵဝ် ဢိူင်ႇၵုၼ်ၵွၵ်ႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ လုၵ်ႈၼိုင်ႈ ၸၢၵ်ႇမၢၵ်ႇတိူဝ်ႉသႂ်ႇ မႄႈ ႁိူၼ်းၼုမ်ႇ ဢႃယု 25 ပီ (မႄႈမၢၼ်း) ၵေႃႉၼိုင်ႈ လႆႈတိူဝ်ႉမၢတ်ႇၸဵပ်း ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃလူင် သႅၼ်ဝီယဝ်ႉ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင်ၼႆႉ လုၵ်ႉတၢင်းဝၢၼ်ႈၼႃးၵူင်းသေ ယိုဝ်းမႃးတူၵ်းသႂ်ႇ ၼႂ်းဝၢၼ်ႈၵွင်းၶဵဝ် လုၵ်ႈၼိုင်ႈ ယၢၼ်ႁိူၼ်းၵူၼ်းဝၢၼ်ႈ ၸၢႆးမိၼ်ႉ – ၼၢင်းသႅင် မွၵ်ႈ 30 ထတ်း/ ပေႇၼႆႉ ၸၢၵ်ႇမၢၵ်ႇတိူဝ်ႉသႂ်ႇ ၼၢင်းသႅင် (မႄႈမၢၼ်း) ၽွင်းတိူဝ်ႉၼွၼ်းဝႆႉၼႂ်းႁိူၼ်း ၸၢၵ်ႇမၢၵ်ႇၼၼ်ႉ တိူဝ်ႉသႂ်ႇတီႈၵွင်းလၢင်မၼ်းၼၢင်း ၾၢႆႇၶႂႃ ၶမ်ဝႆႉသေ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်ယႃသႅၼ်ဝီယဝ်ႉၶႃႈ။ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ်သင်ၼင်ႇၵဝ်ႇ။ ႁိူၼ်းမၼ်း ၼၢင်းသမ်ႉ ဢမ်ႇၸႂ်ႈႁိူၼ်းတိူၵ်ႈဢုတ်ႇ ပဵၼ်ႁိူၼ်းမႆႉၵူၺ်းလႄႈ ၸၢၵ်ႇမၢၵ်ႇၼၼ်ႉ သဵၼ်ၶဝ်ႈမႃးတိူဝ်ႉသႂ်ႇ”- ဝႃႈၼႆ။

မၢၵ်ႇလူင် ဢၼ်လုၵ်ႉတီႈ ဝၢၼ်ႈၼႃးၵူင်းၼၼ်ႉသေ ယိုဝ်းမႃးၼၼ်ႉ ပဵၼ်မၢၵ်ႇသိုၵ်းမၢၼ်ႈ ၶဝ်တေဢၢၼ်းယိုဝ်းၵႂႃႇ တၢင်း ဝၢၼ်ႈၵုၼ်ၵွၵ်ႇ ယွၼ်ႉဝႃႈ မီးသိုၵ်းၶၢင် KIA ၵဵပ်းၶွၼ်ႇရူတ်ႉၵႃးလူင် ယူႇဝႆႉတီႈဝၢၼ်ႈ ဝႃႈၼႆ။

“ပဵၼ်မၢၵ်ႇၽႂ်ယိုဝ်းမႃးတႄႉတႄႉ ဢၼ်ဝႃႈၼၼ်ႉ ႁဝ်းၶႃႈ ပႆႇႁူႉလီလီ ယွၼ်ႉဝႃႈ မၢၵ်ႇဢၼ်မႃးတူၵ်းတႅၵ်ႇၼႆႉသမ်ႉ လုၵ်ႉတၢင်း ဝၢၼ်ႈၼႃးၵူင်းၼၼ်ႉသေ ယိုဝ်းမႃး တၢင်းသၢႆၼၼ်ႉ မီးသိုၵ်းမၢၼ်ႈ ထႅမ်ႁႅင်းသိုၵ်း တူင်ႉၼိုင်ၶဝ်ႈမႃးၼမ်။ ၶဝ်လုၵ်ႉတၢင်းပုၼ်ႉ သေ ယိုဝ်းမႃးတၢင်းၵုၼ်ၵွၵ်ႇ တွၼ်ႈၵၢင်ၼႂ်ၼႆႉ မွၵ်ႈ 3 လုၵ်ႈယဝ်ႉ။ ၵမ်းၼႆႉ တၢင်းသိုၵ်းၶၢင် လုၵ်ႉတၢင်းဝၢၼ်ႈၵုၼ်ၵွၵ်ႇၼၼ်ႉ သေ ယိုဝ်းမႃးထႅင်ႈလၢႆလုၵ်ႈ။ ၼၼ်ႉတႄႉ ဢမ်ႇတူၵ်းသႂ်ႇၼႂ်းဝၢၼ်ႈ။ ၵမ်ႈၼမ် တူၵ်းသႂ်ႇၸွမ်းၼႂ်းၼႃး၊ ၼႂ်းသူၼ် ၸိူဝ်းၼႆႉ ၵူၺ်း”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းဝၢၼ်ႈၵွင်းၶဵဝ် ဢွၼ်ၵၼ်ပၢႆႈၽေးသိုၵ်းဝႆႉမူတ်းယဝ်ႉ ။ ဢၼ်ၵိုတ်းဝႆႉသမ်ႉ ပဵၼ်ၵူၼ်းပႂ်ႉႁိူၼ်း ဢိတ်းဢွတ်းၵူၺ်း။ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉၽၢႆၶမ်းၼၼ်ႉၵေႃႈ ဢွၼ် ၵၼ်သိုပ်ႇပၢႆႈၽေး သိုၵ်းထႅင်ႈ ယူႇတီႈ မုၼ်ၸဝ်ႈၶဝ် လႆႈၶၢႆႉၸဝ်ႈသၢင်ႇဢွၼ်ႇ ၸိူဝ်းၼႆႉ ပၢႆႈၵႂႃႇသွၼ်ႈဝႆႉတီႈ ဝတ်ႉႁူဝ်မိူင်း ၼႆယဝ်ႉ။

ယၢမ်းလဵဝ် သိုၵ်းၶၢင် KIA သမ်ႉ ထႅမ်ႁႅင်းတူင်ႉၼိုင် ယူႇဝႆႉတၢင်းဝၢၼ်ႈတၢင်ႉၶၢၼ်လႄႈ ဝၢၼ်ႈၵုၼ်ၵွၵ်ႇ ယဝ်ႉၵေႃႈ ပႂ်ႉၵဵပ်းၶွၼ်ႇ ဝႆႉတီႈဝၢၼ်ႈၵုၼ်ၵွၵ်ႇမႃး မီးၶၢဝ်းတၢင်း 7-8 ဝၼ်းယဝ်ႉ။ လိူဝ်ၼၼ်ႉ သိုၵ်းမၢၼ်ႈ ၸိူဝ်းၼၼ်ႉၵေႃႈ ထႅမ်ႁႅင်းသိုၵ်းမႃးထႅင်ႈ တင်း ၼမ် ၼႆယဝ်ႉ။

ပူၼ်ႉမႃး ဝၼ်းတီႈ 7 ၼႆႉ ယွၼ်ႉသိုၵ်းမၢၼ်ႈတင်း သိုၵ်းၶၢင် KIA ယိုဝ်းၵၼ်ႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းပိုၼ်ႉတီႈ လႆႈပၢႆႈၽေး သိုၵ်း မိူၼ်ၼင်ႇ – ဝၢၼ်ႈၵုၼ်ၵွၵ်ႇ ၸၢႆး 60 ၵေႃႉ ယိင်း 120 ၵေႃႉ။ ၵူၼ်းဝၢၼ်ႈပဵင်းႁူင်း ၸၢႆး 5 ၵေႃႉ ယိင်း 7 ၵေႃႉ။ ၵူၼ်း ဝၢၼ်ႈႁေႈ ၸၢႆး 10 ၵေႃႉ ယိင်း 25 ၵေႃႉ။ တင်းမူတ်း ၸၢႆး 75 ၵေႃႉ ယိင်း 152 ၵေႃႉ ႁူမ်ႈတင်းမူတ်း 227 ၵေႃႉ ၼႂ်းဢိူင်ႇၼမ်ႉၸလၢပ်ႈ ၼႆယဝ်ႉ။