မိူဝ်ႈၼႆႉ ဝၼ်းတီႈ 7/10/2023 ယၢမ်းၵၢင်ၼႂ် 11 မူင်း သိုၵ်းမၢၼ်ႈ ဢၼ်ပၵ်းယူႇတီႈၽြႃးမုင်ႈမိူင်းၼၼ်ႉသေ ယိုဝ်းၵွင်ႈလူင်း သႂ်ႇ သိုၵ်းၶၢင် KIA ဢၼ်ပႂ်ႉၵဵပ်းၶွၼ်ႇၾၢႆႇၼႃႈဝတ်ႉမုၼ်ၸဝ်ႈ ဝၢၼ်ႈၵုၼ်ၵွၵ်ႇ ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇၼၼ်ႉ မၢၵ်ႇလူင်သိုၵ်းမၢၼ်ႈ မႃးတူၵ်းသႂ်ႇၼႂ်းဝၢင်းဝတ်ႉ တႅၵ်ႇတိူဝ်ႉသႂ်ႇ ႁွင်ႈၼွၼ်းၸဝ်ႈသၢင်ႇလႄႈ လဵၵ်း မုင်း ၸိူဝ်းၼႆႉ ပွင်ႇၵႂႃႇ ယၢမ်းလဵဝ် လႆႈၶၢႆႉၸဝ်ႈသၢင်ႇ မႃးယူႇဝႆႉတီႈဝတ်ႉႁူဝ်မိူင်း မူတ်းယဝ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ ယိုဝ်းမႃးၶႃႈဢေႃႈ မၢႆတပ်ႉၶဝ်တႄႉ ဢမ်ႇလႆႈႁူႉၶႃႈ မႃးတူၵ်းၼႂ်းဝၢင်းဝတ်ႉၵုၼ်ၵွၵ်ႇသေ တိူဝ်ႉသႂ်ႇ တီႈၼွၼ်းၸဝ်ႈသၢင်ႇၶဝ်။ ယဝ်ႉၵေႃႈ ၵျွင်းသုင်းသွမ်းၵဝ်ႇ ၸိူဝ်းၼႆႉထႅင်ႈ ၸၢၵ်ႇ မၢၵ်ႇတိူဝ်ႉပႃးထႅင်ႈ ရူတ်ႉၶိူင်ႈ ၊ လင်ၶႃးလဵၵ်းမုင်းႁိူၼ်းၸိူဝ်းၼႆႉလူႉၵွႆပွင်ႇၼမ်ဢေႃႈ။ ၵတ်းၵႃႈ ဢမ်ႇတိူဝ်ႉသႂ်ႇၸဝ်ႈသၢင်ႇ ၶဝ်ၵွၼ်ႇၶႃႈဢေႃႈ ၼၼ်ႉ”- ဝႃႈၼႆ။
တွၼ်ႈၵၢင်ၼႂ်ၼႆႉ သိုၵ်းၶၢင် KIA ပွႆႇမၢၵ်ႇလူင်ၸူးသိုၵ်းမၢၼ်ႈ ဢၼ်မီးဝႆႉတီႈႁူင်းႁဵၼ်း ဝၢၼ်ႈပၢင်ၼႃးၼၼ်ႉ ၾၢႆႇသိုၵ်းမၢၼ်ႈ မၢတ်ႇၸဵပ်း 3 ၵေႃႉ။ ၼႂ်း 3 ၵေႃႉၼၼ်ႉ ယွၼ်ႉမၢတ်ႇၸဵပ်းႁၢဝ်ႈႁႅင်းလႄႈ လႆႈတေႃႉသူင်ႇယူတ်းယႃ တီႈဝဵင်းသႅၼ်ဝီ ၼႂ်းၼၼ်ႉ တႃႇၵေႃႉၼိုင်ႈ လႆႈလူႉတၢႆ ၸွမ်းတၢင်း တီႈတူဝ်းၵဵၵ်ႉ ႁိမ်းဝၢၼ်ႈပၢင်လေႃႉၼၼ်ႉ ဝႃႈၼႆ။
“မၢၵ်ႇသိုၵ်းၶၢင် ဢၼ်ပွႆႇသႂ်ႇသိုၵ်းမၢၼ်ႈၼၼ်ႉ ၶဝ်ဢဝ်ၻူၼ်းသေ ပွႆႇသႂ်ႇႁႃႉ ဢမ်ႇၼၼ် ယိုဝ်းသႂ်ႇႁႃႉ လွင်ႈၼႆႉ ပဵၼ်တႅတ်ႈ တေႃးလီၶႃႈ လွင်ႈၵူၼ်းသိုၵ်းၶဝ် မၢတ်ႇၸဵပ်းသေ လူႉတၢႆၼၼ်ႉတႄႉ ၸႂ်ႈဢေႃႈ”- ၽူႈတူင်ႉၼိုင် သၢႆသိုၵ်းတၢင်းပွတ်းသႅၼ်ဝီ လၢတ်ႈတီႈၽူႈတွႆႇႁွၵ်ႈၼင်ႇၼႆ။
မိူဝ်ႈၼႆႉ ယၢမ်းၵၢင်ၼႂ် ၼင်ႇၵဝ်ႇ သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇထႅင်ႈ ၼႂ်းမူႇဝၢၼ်ႈႁူဝ်တၢင်းသိုဝ်ႈလႄႈ သူၼ်ၵူၼ်းဝၢၼ်ႈထႅင်ႈ 3 လုၵ်ႈ လွင်ႈတုမ်ႉတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆတႄႉ ပႆႇႁူႉ။
ယၢမ်းလဵဝ် ၵူၼ်းဝၢၼ်ႈ ၼႂ်းဢိူင်ႇၵုၼ်ၵွၵ်ႇ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉႁူဝ်မိူင်း ၵူၼ်းလူင် 70 ပၢႆလႄႈ လုၵ်ႈဢွၼ်ႇ 30 ပၢႆ။ ယဝ်ႉၵေႃႈ တီႈဝတ်ႉၽၢႆၶမ်းထႅင်ႈ 300 ပၢႆ ။
ပူၼ်ႉမႃး မိူဝ်ႈဝၼ်းတီႈ 5/10/2023 ယၢမ်းၵၢင်ၼႂ် 10:50 မူင်း တေႃႇထိုင် 12:30 မူင်းၵၢင်ဝၼ်း သိုၵ်းမၢၼ်ႈ ဢဵၼ်ႁႅင်း 50 ၵေႃႉ ယူႇတီႈတိုင်းလူမ်းသေ ယိုဝ်းမၢၵ်ႇလူင်သႂ်ႇသိုၵ်းၶၢင် KIA ဢၼ်ၵဵပ်းၶွၼ်ႇတီႈဝၢၼ်ႈၵုၼ်ၵွၵ်ႇ တင်းမူတ်း 6 လုၵ်ႈ။ တႃႇလုၵ်ႈ 1 တူၵ်းသႂ်ႇၼႂ်းသူၼ်ထူဝ်ႇလိၼ်လႄႈ ၸၢၵ်ႇမၢၵ်ႇတိူဝ်ႉသႂ်ႇ သိုင်ႇၾႆး၊ ၶဵင်ႇၽြႃးလႄႈ လဵၵ်းမုင်းႁိူၼ်း တီႈႁိူၼ်းယေး လုင်းမွင်ႇ – ပႃႈဢွင်ႇ ၸိူဝ်းၼႆႉ လူႉၵွႆၼမ်။ ယဝ်ႉၵေႃႈ ၸၢၵ်ႇမၢၵ်ႇသဵၼ်တိူဝ်ႉသႂ်ႇထႅင်ႈ လဵၵ်းမုင်းႁိူၼ်း ပူႇလွႆၸၢႆး – ၼၢင်းသွႆႈသူၺ်ႇ ပွင်ႇၸွမ်းထႅင်ႈ 5 ၶႅပ်း။
လိူဝ်ထႅင်ႈ 5 လုၵ်ႈၼၼ်ႉသမ်ႉ တူၵ်းသႂ်ႇၸွမ်းႁိမ်း တီႈသိုၵ်းၶၢင်ၶဝ်ယူႇဝႆႉ ၾၢႆႇၼိူဝ် ဝၢၼ်ႈၵုၼ်ၵွၵ်ႇ ၸွမ်းႁိမ်းၵွင်းမူး ၸိူဝ်း ၼၼ်ႉ။
ထိုင်မႃး ယၢမ်းၵၢင်ၶမ်ႈ 7 မူင်းထိုင် 11 မူင်းၶိုင်ႈၼၼ်ႉ ၾၢႆႇသိုၵ်းမၢၼ်ႈ ယိုဝ်းမၢၵ်ႇလူင်သႂ်ႇထႅင်ႈ 2 လုၵ်ႈ ၵႂႃႇတူၵ်း ၼႂ်းၼႃး ၾၢႆႇႁွင်ႇဝၢၼ်ႈၵုင်းၺွင်ႇ ၾၢႆႇသိုၵ်းၶၢင် KIA သမ်ႉ ၶိုၼ်းယိုဝ်းတွပ်ႇ သိုၵ်းမၢၼ်ႈၶိုၼ်း တႃႇ 3 လုၵ်ႈ ၼႆယဝ်ႉ။
