ၸၢႆးပီး ဢႃယု 35 ပီၵူၼ်းၼႂ်းဢိူင်ႇမိူင်းၶိူဝ်း ၸႄႈဝဵင်းသီႇပေႃႉ ၵႂႃႇၶၢႆရူတ်ႉၶိူင်ႈတေႃႇၵူၼ်းၼႂ်းဢိူင်ႇလဵဝ်ၵၼ်၊ ၵၼ်ႉၸၼ်လူလၢႆလုၵ်ႈဢွၼ်ႇၵေႃႉတေသိုဝ်ႉရူတ်ႉၼၼ်ႉ၊ ယၢမ်းလဵဝ်ထုၵ်ႇၸဝ်ႈၼႃႈတီႈ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ တီႉၺွပ်းၵုမ်းၶင်ဝႆႉတႃႇပၼ်တူတ်ႈတၢမ်ႇ။
ၵူၼ်းမိူင်းၶိူဝ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵေႃႉၵၼ်ႉၸၼ်လုၵ်ႈဢွၼ်ႇၼႆႉ ၸိုဝ်ႈႁွင်ႉၸၢႆးပီး။ မၼ်းဢၢၼ်းၵႂႃႇၶၢႆရူတ်ႉၶိူင်ႈပၼ်ပေႃႈလုၵ်ႈဢွၼ်ႇ၊ ပေႃႈလုၵ်ႈဢွၼ်ႇသမ်ႉၵႂႃႇႁႆႈလႄႈ ၸၢႆးပီးၸင်ႇႁႂ်ႈလုၵ်ႈဢွၼ်ႇယိင်းၼၼ်ႉ ၵႂႃႇသူင်ႇတီႈႁႆႈ၊ ႁဵတ်းၼၼ်သေမၼ်းၸၢႆးၶျေႃးလုၵ်ႈဢွၼ်ႇၼၼ်ႉ ၵၼ်ႉၸၼ်ၼႂ်းယုမ်း ၶၢင်ႈတၢင်း ၵွၼ်ႇထိုင်တီႈႁႆႈ။ လုၵ်ႈဢွၼ်ႇၵေႃႈဢမ်ႇပေႉႁႅင်းၵူၼ်းလူင်ဢမ်ႇၸၢင်ႈလႅၼ်ႈပၢႆႈ။ ၸွမ်းတူဝ်ၸွမ်းၶိင်းပဵၼ်ႁွႆးၸဵပ်းႁွႆးမၢၼ်ႉၵႂႃႇမူတ်း။ ” -ဝႃႈၼႆ။
ယၢမ်းလဵဝ်ၸဝ်ႈၼႃႈတီႈ SSPP ဢၼ်ၵုမ်းၼႂ်းပိုၼ်ႉတီႈ တီႉၺွပ်းၽူႈပူၼ်ႈပႅၼ်ဝႆႉတီႈဝၢၼ်ႈၼႃးမၢၵ်ႇၶၢမ် တႃႈၵူတ်ႇထတ်းပၼ်တူတ်ႈတၢမ်ႇ ။ ၵူၼ်းပိုၼ်ႉတီႈတႄႉလၢတ်ႈဝႃႈ ထုၵ်ႇပၼ်တူတ်ႈတၢမ်ႇႁႂ်ႈပေႃးလၢပ်ႇၵူဝ်၊ ၼင်ႇႁိုဝ်တေဢမ်ႇမီးလွင်ႈႁုၵ်ႉႁၢႆႉၸိူင်ႉၼႆထႅင်ႈမိူဝ်းၼႃႈ ဝႃႈၼႆ။
လုၵ်ႈဢွၼ်ႇယိင်းၼၼ်ႉတႄႉ တိုၵ်ႉမီးၼႂ်းမိုဝ်းၵေႃႉပဵၼ်ပေႃႈၵူၺ်း။ ပႆႇလႆႈတၢင်းၸွႆႈထႅမ်ယူတ်းယႃၸႂ်တီႈၽႂ်ၸုမ်းလႂ် လႆႈႁူႉၼင်ႇၼႆ။
ၸူဝ်ႈသိုၵ်းမၢၼ်ႈယိုတ်းမိူင်းမႃးၼႆႉ ဝၢၼ်ႈမိူင်းဢမ်ႇမီးၶွပ်ႇမီးပိူင် ။ ပၵ်းပိူင်မၢႆမီႈဝၢၼ်ႈမိူင်း ဢမ်ႇႁူမ်ႇငမ်း ပၼ်ၵူၼ်းမိူင်းလႆႈ ။ ၽူႈလၵ်ႉၸၵ်ႉၶုတ်ႈ ၊ ၵူၼ်းသူႇသမ်းၵိၼ်ယႃႈ ၊ ၵူၼ်းၵေႃႇၵၢၼ်ႁၢႆႉၸိူဝ်းၼႆႉၵေႃႈ ၼမ်ၶိုၼ်ႈမႃးၵူႉမိုဝ်းၵူႈဝၼ်း။ ၼၢင်းယိင်းလႄႈလုၵ်ႈဢွၼ်ႇ ဢမ်ႇမီးလွင်ႈႁူမ်ႇလူမ်ႈ။
ဝၼ်းတီႈ 3/8/2023 ယၢမ်းၶမ်ႈၼၼ်ႉၵေႃႈ ဢွၼ်ႇယိင်း ဢႃယု 20 ပၢႆ ၵေႃႉၼိုင်ႈ ၵႂႃႇႁေႃႈၵႂၢႆးတၢင်း ၼွၵ်ႈဝၢၼ်ႈသေ တေပွၵ်ႈႁိူၼ်းၼၼ်ႉ ထုၵ်ႇၽူႈၸၢႆး ဢမ်ႇႁူႉၾၢႆႇ ပူၵ်ႉၼႃႈပူၵ်ႉတႃၵေႃႉၼိုင်ႈ ဢဝ်မိတ်ႈငႃမၼ်းၼၢင်းသေ လၢၵ်ႈၵၼ်ႉၸၼ် ႁိမ်းတၢင်း ၼႂ်းၵႄႈပၢင်းတရႃႉ – ယႂႃႇငၢၼ်ႇ တီႈဢိူင်ႇၵျုင်းယႂႃႇ (ကျုံးရွာအုပ်စု) ၼႂ်းၸႄႈဝဵင်းပၢင်းတရႃႉ ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ