ၽွင်းၶွမ်ႊမသျိၼ်ႊငမ်းယဵၼ်ၵႂႃႇ ႁူပ်ႉၽူႈယႂ်ႇၵူၼ်းလူင်ဝၢၼ်ႈႁႆးၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇ တိုၵ်းတပ်ႉ SSPP/SSA ၼႂ်းၵျွၵ်ႉမႄး သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း။
ဝၼ်းတီႈ 02/05/2018 ၶၢဝ်းယၢမ်းၵၢင်ၼႂ် တင်ႈတႄႇ 11:00 မူင်း သိုၵ်းလူင်ပွင်ၸိုင်ႈမၢၼ်ႈ တပ်ႉမ 77 ႁႅင်းၵူၼ်းႁိမ်း 300 ၶိုၼ်ႈလေႃႇတိုၵ်း ပၢင်သဝ်းၸူဝ်ႈၶၢဝ်း ၶွင် ပႃႇတီႇမႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA တီႈ လွႆယဵၼ် သွင်ၾၢႆႇပဵၼ်ပၢင်တိုၵ်းၵၼ် ႁိမ်းသွင်ၸူဝ်ႈမူင်း။
ၽွင်းၶၢဝ်းသိုၵ်းလူင်ပွင်ၸိုင်ႈမၢၼ်ႈလေႃႇတိုၵ်း တပ်ႉသိုၵ်းၸိုင်ႈတႆး SSPP ၼၼ်ႉ ၶွမ်ႊမသျိၼ်ႊငမ်းယဵၼ် (မၢၼ်ႈ) ဢၼ်ဢူးတဵင်းၸေႃႇတင်း ၸွမ်သိုၵ်းၶိၼ်ႇၸေႃႇဢူး ဢွၼ်ႁူဝ် ၵႂႃႇမီးဝႆႉယူႇတီႇဝဵင်းမႂ်ႇဝၢၼ်ႈႁႆးသေ ဢုပ်ႇ ဢူဝ်း ၽူႈယႂ်ႇၵူၼ်းလူင် SSPP ဝႆႉ ၊ လွင်ႈၼႆႉ ႁဵတ်းႁႂ်ႈၽူႈယႂ်ႇၵူၼ်းလူင်ၵမ်ႈၽွင်ႈၸၢင်ၸႂ် ၼိူဝ်ၵၢၼ်သၢင်ႈလွင်ႈယုမ်ႇယမ်ၵၼ် ။
လွႆယဵၼ်ၼႆႉ မီးၾၢႆႇႁွင်ႇဝၢၼ်ႈတေႃႉသၢင်ႇ ယၢၼ်ၵႆတေႃႉသၢင်ႇမွၵ်ႈ 3 လၵ်း။ သိုၵ်းမၢၼ်ႈဢဝ်ၶိူင်ႈလူင် မိူၼ်ၼင်ႇ 79mm – 60mm – 81 mm ယိုဝ်းသႂ်ႇတပ်ႉပၢင်သဝ်း သိုၵ်း SSPP/SSA – ၼႆ ၽူႈမီးၸၼ်ႉ ဢၼ်တူင်ႉၼိုင် ၼႂ်းၸႄႈဝဵင်းၵျွၵ်ႉမႄး ၸဝ်ႈၼိုင်ႈလၢတ်ႈ ။
“ၵူၼ်းတၢႆ ဢၼ်မႃးၾင်ႁိမ်းတေႃႉသၢင်ႇမီး 2 ၶုမ် ၊ ၵူၼ်းမၢတ်ႇၵေႃႇမီးဢေႃႈ၊ လၢႆၵေႃႉတႄႉဢမ်ႇႁူႉ၊ ပဵၼ်ပၢင်တိုၵ်းၵၼ် ယဝ်ႉ ယၢမ်းဝၢႆးဝၼ်း သိုၵ်းလူင်ပွင်ၸိုင်ႈမၢၼ်ႈထွႆၶဝ်ႈမႃးၼႂ်းတေႃႉသၢင်ႇၶိုၼ်းလႄႈ လႆႈႁူႉဢေႃႈ” – ၵူၼ်း တေႃႉသၢင်ႇ လၢတ်ႈ။
သိုၵ်းလူင်ပွင်ၸိုင်ႈ တပ်ႉမ 77 ၸႅၵ်ႇႁဵတ်း 2 ၸုမ်း၊ ငႃးသိုၵ်းဢၼ်ၼိုင်ႈ ၶိုၼ်ႈလေႃႇ တပ်ႉပႃႇတီႇမႂ်ႇသုင်ၸိုင်ႈတႆး၊ ထႅင်ႈ ငႃးၼိုင်ႈသမ်ႉ ၶိုၼ်ႈလေႃႇ တပ်ႉလွႆ TNLA – ဝႃႈၼႆ။
ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႆႉ ပဵၼ်လုၵ်ႈၸုမ်း ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး CSSU ဢၼ်မီးပႃႇတီႇ တပ်ႉသိုၵ်း တူင်ႇဝူင်းတႆး ၶဝ်ႈႁူမ်ႈဝႆႉ 10 ၸုမ်းပၢႆ။ ၾၢႆႇၼိုင်ႈသမ်ႉ ပဵၼ်ဢူၺ်းလီၸုမ်းသိုၵ်းပွတ်းႁွင်ႇ FPNCC ဢၼ်ဝႃႉ UWSA ဢွၼ်ႁူဝ်။ FPNCC ၼႆႉ ဢမ်ႇႁပ်ႉသဵၼ်ႈတၢင်းၵိုတ်းတိုၵ်းတူဝ်ႈမိူင်း NCA ၊ မီးၵၢင်ၸႂ်ႁႃသဵၼ်ႈ တၢင်းမႂ်ႇ တႃႇဢုပ်ႇဢူဝ်းၵၢၼ်မိူင်း ၵမ်းသိုဝ်ႈ ဢၼ်ၽူႈထုၵ်ႇၶဝ်ႈႁူမ်ႈလႆႈၶဝ်ႈပႃးၵူႈမူႇၵူႈၸုမ်း။
