မိူဝ်ႈၼႆႉ ဝၼ်းတီႈ 5/10/2023 ယၢမ်းဝၢႆးဝၼ်း 1 မူင်းပၢႆ ငႃးသိုၵ်းမၢၼ်ႈ ၶဝ်ႈၸူး ၼႂ်းၼႃႈလိၼ် တပ်ႉသိုၵ်း SSPP/ SSA လႄႈ သွင်ၾၢႆႇ ပဵၼ်ပၢင်တိုၵ်းၵၼ် ၼႂ်းဢိူင်ႇၵုၼ်ၵွၵ်ႇ ၸႄႈဝဵင်းသႅၼ်ဝီ။
မိူဝ်ႈၼႆႉ ယၢမ်းၵၢင်ၼႂ် 10 မူင်း သိုၵ်းမၢၼ်ႈ ႁႅင်းၵူၼ်းမွၵ်ႈ 30 ၵေႃႉ၊ ၶၢမ်ႈၶူဝ်ၼမ်ႉတူႈ တီႈဝၢၼ်ႈၵုင်းၺွင်ႇ၊ ဢိူင်ႇၵုၼ် ၵွၵ်ႇသေ ၵႂႃႇၸွမ်းတၢပ်ႈလွႆ ၾၢႆႇၸၢၼ်းၼမ်ႉတူႈ၊ ယိုဝ်းၵွင်ႈလူင် ၵႂႃႇတၢင်းၾၢႆႇသိုၵ်းၶၢင်ယူႇ။ ဝၢႆးၼမ်ႉ ႁွၼ်ႇထဝ်ႇတူင်ႉ ၼိုင် ၵႂႃႇတၢင်း ပိုၼ်ႉတီႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ပၵ်းသဝ်း လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်။
ၵူၼ်းဝၢၼ်ႈ ၼႂ်းဢိူင်ႇၵုၼ်ၵွၵ်ႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းတႆး လၢတ်ႈၶဝ်ယူႇ ယႃႇမႃး တၢင်းၾၢႆႇ ၸၢၼ်းၼမ်ႉတူႈၼႆႉ သိုၵ်းမၢၼ်ႈသမ်ႉ ႁဵတ်းႁိုဝ် ဢမ်ႇႁူႉ သမ်ႉၶၢမ်ႈၼမ်ႉတူႈၵႂႃႇၵေႃႈ သွင်ၾၢႆႇ ယိုဝ်းၵၼ်ၼၼ်ႉ ၶႃႈ ၼႃႇ၊ ပၢင်တိုၵ်းဢမ်ႇပေႃးႁိုင်ၵႃႈႁိုဝ်ၼင်ႇၵဝ်ႇၶႃႈ မွၵ်ႈ 10 မိၼိတ်ႉၼႆႉၵႂႃႈ” – ဝႃႈၼႆ။
ယွၼ်ႉပၢင်တိုၵ်းသေ တင်းသွင်ၾၢႆႇ မီးလွင်ႈလူႉတၢႆမၢတ်ႇၸဵပ်း ၸိူင်ႉႁိုဝ် ပႆႇလႆႈႁူႉ သေတႃႉ ၸုမ်း သိုၵ်းမၢၼ်ႈ ပွႆႇမၢၵ်ႇလူင် တူၵ်းသႂ်ႇ ၼႂ်းသူၼ်ၵူၼ်းဝၢၼ်ႈ ၵူၼ်းဝၢၼ်ႈၵုၼ်ႇၵွၵ်ႇ လုၵ်ႈၼိုင်ႈ၊ လွင်ႈတိူဝ်ႉ သၢႆၸႂ် ႁိူၼ်းယေး ၵူၼ်းဝၢၼ်ႈ တႄႉဢမ်ႇမီး – ၵူၼ်းဝၢၼ်ႈ ၼႂ်းဢိူင်ႇၵုၼ်ၵွၵ်ႇ ၵေႃႉၼိုင်ႈလၢတ်ႈၼင်ႇၼႆ။
ၸႄႈဝဵင်းသႅၼ်ဝီ ၼႂ်းဢိူင်ႇၵုၼ်ၵွၵ်ႇၼႆႉ သိုၵ်းၶၢင် KIA ၼႆႉ ပၵ်းယူႇဝႆႉ တီႈသၼ်လွႆ ၼႂ်းၵႄႈဝၢၼ်ႈပၢင်ၼႃး – ဝၢၼ်ႈ ၵုၼ်ၵွၵ်ႈ မႃးၶၢဝ်းတၢင်းႁိမ်းလိူၼ်သေ ၵဵပ်းၶွၼ်ႇ ရူတ်ႉၵႃး ၵူႈဝၼ်း။ လိူဝ်ၼၼ်ႉၵေႃႈ ယင်းမီး သိုၵ်းလွႆ TNLA MNDAA သိုၵ်းၶႄႇၵဝ်ႈၵၢင်ႉ ၵေႃႈၵႂႃႇမႃးတူင်ႉၼိုင်သေ ယူႇယူႇၵႆႉပဵၼ် ပၢင်တိုၵ်း တင်း ၸုမ်းသိုၵ်းမၢၼ်ႈ။ ဢၼ်ပဵၼ်ပၢင်တိုၵ်းၵၼ်တင်း သိုၵ်း SSPP/SSA တိုၵ်ႉမီးပွၵ်ႈၼႆႉ။