သဵင်ၵွင်ႈလူင် တႅၵ်ႇတီႈဝဵင်းမူႇၸေႊ 2 လုၵ်ႈထပ်းၵၼ် ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢွၼ်ၵၼ်တူၵ်းၸႂ်တိုၼ်ႇ ဝႃႈ ၼႆ။
မိူဝ်ႈဝႃး ဝၼ်းတီႈ 3/10/2023 ယၢမ်းၵၢင်ၶိုၼ်းမွၵ်ႈ 10 မူင်း သဵင်ၵွင်ႈလူင် တႅၵ်ႇတီႈပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်သဵင်ၵွင်ႈလူင်တႅၵ်ႇ 2 ႁူၺ်ႇ သဵင်တႅၵ်ႇမၼ်း တေယၢၼ်ၵၼ်မွၵ်ႈ 10 ၸႅၵ်ႉၵၼ်ႉၼႆႉၵူၺ်း။ တႅၵ်ႇႁႅင်းၼႃႇၶႃႈ။ သဵင်ၵွင်ႈဢွၼ်ႇ ၵေႃႈတႅၵ်ႇပႃးထႅင်ႈ။ ဢွင်ႈတီႈမၢၵ်ႇတႅၵ်ႇ ၼၼ်ႉ တေပဵၼ်တီႈတၢင်းၾၢႆႇၸၢၼ်းဝဵင်း ပွၵ်ႉၵွင်းမူးတူင်ႈၼၼ်ႉၶႃႈဢေႃႈ။ ၵူၺ်းၵႃႈ ပဵၼ်ၸုမ်းလႂ် တင်းၸုမ်းလႂ် ယိုဝ်းၵၼ် တႄႉ ႁၢၼ်ႉတေႃႇထိုင်ယၢမ်းလဵဝ် ပႆႇႁူႉၶႃႈ”- ဝႃႈၼႆ။
လွင်ႈၼႆႉ သိုဝ်ႇၶၢဝ်ႇ ၼႂ်းပိုၼ်ႉတီႈဝဵင်းမူႇၸေႊတႄႉ တႅမ်ႈဢွၵ်ႇဝႆႉဝႃႈ ပဵၼ်ၸုမ်းပျီႇတူႉၸိတ်ႉ ၼႂ်းပိုၼ်ႉတီႈ ၼင်ႇ ၵၼ် ယိုဝ်းၵၼ်ၶိုၼ်း ဝႃႈၼႆ။
“ဢၼ် ယိုဝ်းၵၼ်မိူဝ်ႈဝႃးၼႆႉ ပဵၼ်ၸုမ်းလႂ် တင်းၸုမ်းလႂ်တႄႉ ဢမ်ႇႁူႉ ။ ၶၢဝ်ႇၼႂ်းပိုၼ်ႉတီႈ ဢွၵ်ႇဝႆႉတႄႉ ပဵၼ် ၸုမ်းပျီႇတူႉၸိတ်ႉ။ ၵူၺ်းၵႃႈ လွင်ႈၼႆႉ ႁဝ်းၶႃႈ လွင်ႈၼႆႉၽႂ်ၵေႃႈ ဢမ်ႇၸၢင်ႈယိုၼ်ယၼ်တႅတ်ႈတေႃး။ တီႈပွၵ်ႉ ၵွင်းမူးတူင်ႈၼၼ်ႉသမ်ႉ မီးၸုမ်းပျီႇတူႉၸိတ်ႉ ယူႇၼမ် ယဝ်ႉၵေႃႈ ပၢင်တေႃႇလွင်းၸိူဝ်းၼႆႉၵေႃႈ ၼမ် ”- ၵူၼ်းပိုၼ်ႉတီႈ မူႇ ၸေႊ သိုပ်ႇလၢတ်ႈၼႄၼင်ႇၼႆ။
ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်တႆး – ၶႄႇ ၊ ပဵၼ်ဝဵင်းၵႃႉၶၢႆ ၵေႃႈၸႂ်ႈ။ ၵွပ်ႈၼႆ ၸုမ်းယိပ်း ၵွင်ႈၵၢင်ႇ မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းလႄႈ ၸုမ်းပျီႇတူႉၸိတ်ႉ ၸိူဝ်းၼႆႉ ၵေႃႈ တူင်ႉၼိုင် ယူႇၼမ်။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီပၢႆၼႆႉ ပေႃႈလဵင်ႉၶႄႇလႄႈ ၸုမ်းပျီႇတူႉၸိတ်ႉ ၸိူဝ်းၼႆႉ ႁူမ်ႈၵၼ်သေ ပိုတ်ႇပၢင် တေႃႇလွင်း ၸိူဝ်းၼႆႉမႃးၵေႃႈၼမ် လိူဝ်ၼၼ်ႉ ၶွမ်ႊပၼီႊဢၼ်မႃးတင်ႈ တီႈဝဵင်းမူႇၸေႊၼႆႉသေ ယွၵ်ႇလႅၼ် ၵိၼ်ငိုၼ်းပိူၼ်ႈ ၸိူဝ်းၼႆႉၵေႃႈမႃးၵေႃႈၼမ် ၼႆယဝ်ႉ။
ၼွၵ်ႈလိူဝ်ၼၼ်ႉ လွင်ႈႁူမ်ႇလူမ်ႈ ၵူၼ်းပိုၼ်ႉတီႈၵေႃႈ ဢမ်ႇမီး မိူၼ်ၼင်ႇ လွင်ႈၽူႈလၵ်ႉၸၵ်ႉၶုတ်ႈ၊ ၶႃႈႁႅမ်ၵၼ် ၸိူဝ်း ၼႆႉ မီးမႃး ၶိူဝ်းယႂ်း။
ပူၼ်ႉမႃး မိူဝ်ႈဝၼ်းတီႈ 30/9/2023 ယၢမ်းဝၢႆးဝၼ်း 2 မူင်းၶိုင်ႈၼၼ်ႉ ၵူၼ်းၶၢႆၼမ်ႉၶႅင်လွတ်ႇၵေႃႉၼိုင်ႈ ၺႃးၸုမ်းဢမ်ႇ ႁူႉၾၢႆႇ ယိုဝ်းတၢႆထင်တီႈ ႁိမ်းဝၢၼ်ႈၵွင်းဝဵင်း ၸႄႊဝဵင်းမူႇၸေႊၼႆႉ။
မိူဝ်ႈဝၼ်းတီႈ 23/9/2023 ယၢမ်းၵၢင်ၼႂ် 8 မူင်းၼၼ်ႉၵေႃႈ ပလိၵ်ႈမၢၼ်ႈ လမ်းၵူၼ်းလၵ်ႉၵႃး တီႈပွၵ်ႉမၢၼ်ႈဝဵင်း ဝဵင်းမူႇၸေႊ မီးလွင်ႈပိုတ်းယိုဝ်းၵၼ် ၼႂ်းၵၢင်ဝဵင်း ၾၢႆႇၵူၼ်းလၵ်ႉ တၢႆ 2 ၵေႃႉ တီႉၺွပ်းလႆႈတူဝ် လိပ်း 2 ၵေႃႉ၊ ပလိၵ်ႈမၢၼ်ႈ ယိုဝ်းၺႃးၵၼ်ၶိုၼ်း မၢတ်ႇၸဵပ်းၵေႃႉၼိုင်ႈ။
