သိုၵ်းမၢၼ်ႈ ယိုဝ်းၵွင်ႈလူင် သႂ်ႇၼႂ်းဝၢၼ်ႈ တီႈဝဵင်း ၾၢႆၶုၼ်

သိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင် သႂ်ႇၼႂ်းဝၢၼ်ႈၵူၼ်းမိူင်း တီႈဝဵင်းၾၢႆၶုၼ် ၼႂ်းလိူၼ်လဵဝ် ဢမ်ႇယွမ်း 10 ပွၵ်ႈ ႁဵတ်းႁႂ်ႈႁိူၼ်းယေးၵူၼ်းဝၢၼ်ႈလႄႈ သူၼ်ႁႆႈၼႃး ၵူၼ်းမိူင်း ၸိူဝ်းၼႆႉ လူႉၵွႆသုမ်းၼမ်။

ၼႂ်းလိူၼ်သႅပ်ႊထႅမ်ႊပိူဝ်ႊ 2023 ပူၼ်ႉမႃးၼႆႉ သိုၵ်းမၢၼ်ႈ ယိုတ်းမိူင်း ၸႂ်ႉၵွင်ႈလူင် ယိုဝ်းသႂ်ႇ ၼႂ်းဝၢၼ်ႈသူၼ်ႁႆႈၼႃး ၵူၼ်း မိူင်း ၼႂ်းဢိူင်ႇလွႆပဝ်း ၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းႁွင်ႇ မႃးၶိူဝ်းယႂ်း ၼႆယဝ်ႉ။  

ၵူၼ်းပိုၼ်ႉတီႈ ဝဵင်းၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ – “ႁိမ်းၶႅပ်ႇဝဵင်းၾၢႆၶုၼ်လႄႈ တၢင်းမိူင်းပၢႆး ၸိူဝ်းၼႆႉ သိုၵ်းမၢၼ်ႈ တိုၵ်ႉယိုဝ်းမၢၵ်ႇလူင်တူၵ်းသႂ်ႇယူႇၶႃႈ။ ၼႂ်းလိူၼ်သႅပ်ႊထႅမ်ႊပိူဝ်ႊပူၼ်ႉမႃးၼႆႉ ၶဝ်ယိုဝ်းမၢၵ်ႇလူင်မႃး ဢမ်ႇယွမ်း 10 ၵမ်းၼႆႉ။ မၢၵ်ႇလူင် ဢၼ်ၶဝ်ယိုဝ်းသႂ်ႇၼၼ်ႉသမ်ႉ ပဵၼ်ဝၢၼ်ႈၼမ်ႉသူမ်ႈ၊ ဝၢၼ်ႈလိၼ်ပူၵ်ႇလူင် ၼႂ်းဢိူင်ႇလွႆပဝ်း ၶႃႈ။ မၢၵ်ႇလူင်တူၵ်း သႂ်ႇႁိူၼ်းယေး ၵူၼ်းဝၢၼ်ႈ ၵွႆ 3 လင် ပဵၼ်ဝၢၼ်ႈတႆးလၢႆလၢႆၶႃႈဢေႃႈ။ ယဝ်ႉၵေႃႈ တူၵ်းသႂ်ႇသူၼ်ႁႆႈၼႃး ၸိူဝ်းၼႆႉ လူႉၵွႆ သုမ်းၼမ်”- ဝႃႈၼႆ။

လွင်ႈသိုၵ်းမၢၼ်ႈ ယိုတ်းမိူင်း ယိုဝ်းမၢၵ်ႇလူင်သႂ်ႇၸိူင်ႉၼႆၼႆႉ ၵမ်ႈၼမ် တေယိုဝ်းၽွင်းၵၢင်ၶမ်ႈၵၢင်ၶိုၼ်း ၶၢဝ်းၵူၼ်းမိူင်း ၼွၼ်း လပ်းလိုဝ်ႈႁိူဝ်ႉၵၼ် ႁဵတ်းႁႂ်ႈၵူၼ်းမိူင်း ဢွၼ်ၵၼ်တူၵ်းၸႂ် ၵူဝ်။ မၢင်ၸိူဝ်း ဢမ်ႇႁတ်းၼွၼ်းတီႈႁိူၼ်းသေ ပၢႆႈ ၵႂႃႇၼွၼ်းၼႂ်း ထိူၼ်ႇၸိူဝ်းၼၼ်ႉၵေႃႈမီး ဝႃႈၼႆ။

“လွင်ႈသိုၵ်းမၢၼ်ႈ ယိုဝ်းၵွင်ႈလူင်သႂ်ႇၼႆႉ ၶဝ်ယူႇတၢင်းဝဵင်းၾၢႆၶုၼ်ၼၼ်ႉသေ ယိုဝ်းမႃးၶႃႈဢေႃႈ ၶဝ်တေထၢင်ႇသိုၵ်း ၵူၼ်းမိူင်း ၶဝ်တူင်ႉၼိုင်တၢင်းၼႆႉၶႃႈယူဝ်ႉ။ ထႅင်ႈလွင်ႈၼိုင်ႈ ပေႃးၵူၼ်းၶွၼ်ႈတုမ်ၵၼ်ၼမ်ၸိုင် ၶဝ်ယိုဝ်းမႃးသႂ်ႇၶႃႈ ဢေႃႈ။ ၵၢင်ၶမ်ႈ ၵၢင် ၶိုၼ်း ပေႃးၾႆးလႅင်း ၼႂ်းပႃႇၼႂ်းထိူၼ်ႇ ၸိူဝ်းၼႆႉၵေႃႈ ၶဝ်ယိုဝ်းသႂ်ႇၶႃႈဢေႃႈ။ ပေႃးပဵၼ်ၽွင်းမၢၵ်ႇတူၵ်းသႂ်ႇတႄႉ တေပၢႆႈၵႂႃႇ ၼွၼ်းၼႂ်းထိူၼ်ႇၵၼ်ၶႃႈ ပေႃးသဵင်မၢၵ်ႇယဵၼ် ၸင်ႇတေၶိုၼ်းမႃးၼွၼ်းၼႂ်းဝၢၼ်ႈ ၵူဝ်တႄႉ ၵူဝ်ၶႃႈဢေႃႈ ၼွၼ်းပေႃးဢမ်ႇ လပ်းၶႃႈယဝ်ႉ”- ၵူၼ်းပိုၼ်ႉတီႈ ဝဵင်းၾၢႆၶုၼ် သိုပ်ႇလၢတ်ႈၼႄၼင်ႇၼႆ။

တင်ႈတႄႇ ႁၢင်ႈပီ 2021 ၼၼ်ႉမႃး သိုၵ်းမၢၼ်ႈတင်း သိုၵ်း PDF ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ႁၢၼ်ႉတေႃႇထိုင်ယၢမ်း လဵဝ် ၶၢဝ်းတၢင်းမွၵ်ႈ 2 ပီယဝ်ႉ ပၢင်တိုၵ်းပႆႇယဵၼ်။ မၢင်ပွၵ်ႈ သိုၵ်းမၢၼ်ႈၼၼ်ႉ ၸႂ်ႉၵွင်ႈလူင် ယိုဝ်းသႂ်ႇၸွမ်းၼႂ်းဝၢၼ်ႈ၊ ၸွမ်းသူၼ် ၼႂ်းဢိူင်ႇလွႆပဝ်း တၢင်းဝၢၼ်ႈၺွင်ႇမူၼ်း၊ ဝၢၼ်ႈငႃးမူး၊ ဝၢၼ်ႈလိၼ်ပူၵ်ႇလူင်၊ ဝၢၼ်ႈၽြႃးလွႆလႄႈ ဝၢၼ်ႈၼမ်ႉသူမ်ႈ ၸိူဝ်းၼႆႉ။

ယွၼ်ႉမၢၵ်ႇလူင်တူၵ်းသႂ်ႇသေ ႁိူၼ်းယေးၵူၼ်းဝၢၼ်ႈ သူၼ်ႁႆႈၼႃး လႆႈလူႉၵွႆၵႂႃႇၼႆႉ ႁၢၼ်ႉတေႃႇထိုင်ယၢမ်းလဵဝ် ပႆႇမီးၸုမ်း သိုၵ်းလႂ် မႃးဢဝ်ပုၼ်ႈၽွၼ်း ပၼ်ၵူၼ်းမိူင်းသင်။ ၵူၺ်းၵႃႈ ဢၼ်တုမ်ႉတိူဝ်ႉႁႅင်းသမ်ႉ ပဵၼ်ၵူၼ်းမိူင်း။

တင်ႈတႄႇၼၼ်ႉမႃး ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၾၢႆၶုၼ်ၼႆႉ လႆႈငိၼ်းသဵင်ၵွင်ႈသဵင်မၢၵ်ႇ တႅၵ်ႇၵူႈဝၼ်းၵူႈလိူၼ် ႁၢၼ်ႉတေႃႇထိုင်ယၢမ်းလဵဝ်။ ဢၼ်လႆႈပၢႆႈၽေးပၢင်တိုၵ်းၼႆႉ ဢၢၼ်ႇပွၵ်ႈမၼ်း ဢမ်ႇလႆႈယဝ်ႉ ၵူၼ်းပိုၼ်ႉတီႈလၢတ်ႈ။