သိုၵ်းမၢၼ်ႈယိုတ်းမိူင်း တီႉၺွပ်းၵူၼ်းၼွင်ႁၢႆးယႃႈ 4 ၵေႃႉပေႃႈမႄႈလုၵ်ႈ ၼႂ်းၼၼ်ႉ ၶိုၼ်းပွႆႇပၼ် ၸိူဝ်းပဵၼ်လုၵ်ႈလၢင်း 2 ၵေႃႉ ၵိုတ်းပေႃႈမႄႈတိုၵ်ႉၺႃး ၵူတ်ႇထတ်းထဵတ်ႈထၢမ် ၵုမ်းၶင် ဝၢႆးၼၼ်ႉ ယိုတ်းဢဝ်ႁိူၼ်းယေးပႃးထႅင်ႈ ။
ၵူၼ်းပိုၼ်ႉတီႈၼွင်ႁၢႆးယႃႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၶဝ်ပႆႇမႃးယိုတ်းၼၼ်ႉတႄႉ ၶဝ်ႁႂ်ႈဢဝ်ၶူဝ်းၶွင် ၼႂ်းႁိူၼ်းၼၼ်ႉဢွၵ်ႇ ၼႂ်းၶၢဝ်းတၢင်း 3 ဝၼ်းၼႆဢေႃႈ။ ၽိူဝ်ႇဝႃႈ သိမ်းၶူဝ်းယဝ်ႉၼႆၵေႃႈ သိုၵ်းမၢၼ်ႈၶဝ် မႃးပိၵ်ႉဢိုတ်းႁိူၼ်းတေႉဢေႃႈ။ လုၵ်ႈဢွၼ်ႇ 2 ၵေႃႉ ၼၼ်ႉတႄႉၵေႃႈ မိူဝ်းယူႇၸွမ်း ပေႃႈထဝ်ႈၶဝ်ယဝ်ႉ” – ဝႃႈၼႆ။
လင်ႁိူၼ်း ၵူၼ်းၼွင်ႁၢႆးယႃႈ 4 ၵေႃႉပေႃႈမႄႈလုၵ်ႈ ဢၼ်ၺႃးယိုတ်းၼႆႉ မီးၼႂ်းပွၵ်ႉ 3 ၊ ဝၢၼ်ႈသပျေႇတိတ်ႉ ထုင်ႉၼွင်ႁၢႆးယႃႈ ၸႄႈတွၼ်ႈတူၼ်ႈတီး။
ၵူၼ်းၼွင်ႁၢႆးယႃႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သွင်ၵေႃႉၽူဝ်မေးၼၼ်ႉတႄႉ ႁၼ်ၶဝ် ဢဝ်ၶိုၼ်ႈလုမ်းမိူဝ်ႈ ဝၼ်းတီႈ 21 ၼႆႉၵမ်းၼိုင်ႈ ။ ယဝ်ႉၵေႃႈ တေဢဝ်ၶိုၼ်ႈလုမ်းၼႂ်းဝၼ်းတီႈ 5 လိူၼ်ဢွၵ်ႊထူဝ်ႊပိူဝ်ႊၼႆႉထႅင်ႈၼႆဢေႃႈ ထိုင်မိူဝ်ႈလဵဝ် ပႆႇႁူႉဝႃႈ ၶဝ်တီႉၺွပ်းလူၺ်ႈမၢႆမီႈဢၼ်လႂ်တေႉတေႉ ” – ဝႃႈၼႆ။
ၵူၼ်းၼွင်ႁၢႆးယႃႈ 4 ၵေႃႉၼႆႉ ၺႃးသိုၵ်းမၢၼ်ႈမၢပ်ႇၼႄးဝႃႈ ၵွင်ႉၵၢႆႇၸွမ်း PDF ၼႆသေ တီႉၺွပ်းၵုမ်းၶင်ဝႆႉ မိူဝ်ႈဝၼ်းတီႈ 28/8/2023 ထိုင်မႃး ဝၼ်းတီႈ 27/9/2023 ၼႆႉ ၺႃးယိုတ်းႁိူၼ်းယေးယူႇသဝ်းထႅင်ႈ ႁဵတ်းႁႂ်ႈၵူၼ်းမိူင်း ႁိမ်းႁွမ်းတူၵ်းၸႂ်။
မိူဝ်ႈပူၼ်ႉမႃး လိူၼ်ၵျူၼ်ႊ ဝၼ်းတီႈ 19 ၼၼ်ႉၵေႃႈ မႅၼ်ႈဝၼ်းၵိူတ်ႇၼၢင်းဢွင်ႇသၢၼ်းၸူႉၵျီႇ ။ လုင်းၵူၼ်းၼွင်ႁၢႆးယႃႈ ဢႃယု 60 ပီ ၵေႃႉၼိုင်ႈၵေႃႈၺႃးသိုၵ်းမၢၼ်ႈမၢပ်ႇၼႄးဝႃႈတၢင်ႇႁၢင်ႈမွၵ်ႇမၼ်းမူၺ်ၼႆသေ သိုၵ်းမၢၼ်ႈၶဝ်ႈၺွပ်းထိုင် ၼႂ်းႁိူၼ်းၼႂ်းယေး ထိုင်မိူဝ်ႈလဵဝ် ပႆႇပွႆႇလွတ်ႈၶိုၼ်း။
ယုလၢႆႇတိၼ်း ၽူႈၸတ်းၵၢၼ် JMC- Innlay လၢတ်ႈတီႈၽူႈတွႆႇႁွၵ်ႈဝႃႈ – “ တီႈၼွင်ႁၢႆးယႃႈၼႆႉ ဢၼ်ၺႃးၺွပ်းၸိူင်ႉၼႆ ဢမ်ႇၵႃးၼႆႉၵူၺ်း။ မိူဝ်ႈပူၼ်ႉမႃးၵေႃႈ သိုၵ်းမၢၼ်ႈမၢပ်ႇၼႄးဝႃႈ တၢင်ႇၶႅပ်းႁၢင်ႈမွၵ်ႇမၼ်းမူၺ် (ၼိၼ်းသီႇ) ၼိူဝ်ၾဵတ်ႉသ်ပုၵ်ႉၼႆသေ ၵူၼ်းၼွင်ႁဝ်း ၺႃးပေႃႉထုပ်ႉလိူဝ်ႁႅင်း။ ၶဝ်ၶႂ်ႈႁဵတ်းသင်ၵေႃႈ ႁဵတ်းႁွတ်းလူင်ၵႂႃႇ။မိူဝ်ႈလဵဝ် ၵေႃႈ မၢပ်ႇၼႄးဝႃႈ ၵဵဝ်ႇၶွင်ႈၸွမ်း PDF ၼႆသေ ၺွပ်းၵႂႃႇ ” – ဝႃႈၼႆ။
သိုၵ်းမၢၼ်ႈယိုတ်းမိူင်း ပၼ်ႁႅင်းဢီး ႁႂ်ႈၵူၼ်းပိုၼ်ႉတီႈၼွင်ႁၢႆးယႃႈ ၸတ်းႁဵတ်း ပွႆးၽြႃးၸၢမ်ၵဝ်ႈတွၼ်ႈလူင်းမိူင်း ၼႂ်းဝၼ်းတီႈ 15/10/1023 မႅၼ်ႈဝၼ်းလိူၼ် 11 မႂ်ႇ ၼိုင်ႈၶမ်ႈ တေႃႇထိုင်ဝၼ်းတီႈ 15/11/2023 တႃႇၶၢဝ်းတၢင်း ၼိုင်ႈလိူၼ် ၼႆႉၵေႃႈၵူၼ်းမိူင်းၵူဝ် မီးပၼ်ႁႃၸုမ်းယိပ်းၵွင်ႈၵၢင်ႇသေ ၵူဝ်သုမ်းသၢႆၸႂ်ပႃး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ