ႁႅင်းၵၢၼ်ၵူၼ်းမိူင်းႁူမ်ႈတုမ်ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇၽၼ်းတၢႆ

ႁႅင်းၵၢၼ်ၵူၼ်းမိူင်းႁူမ်ႈတုမ်ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ၽၼ်းတၢႆ တီႈၸႄႈတွၼ်ႊသမုတ်ႊသႃႊၶွၼ်ႊ ၸိုင်ႈထႆး။

ဝၼ်းတီႈ 26/9/2023 ယၢမ်းၶိုၼ်းလိုၵ်း 1 မူင်းၼၼ်ႉ ႁႅင်းၵၢၼ်ၵူၼ်းမိူင်းႁူမ်ႈတုမ်ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ၽၼ်း  တၢင်းၼႃႈႁၢၼ်ႉသၵ်ႉၽႃႈ ႁိမ်းဝတ်ႉသီသုတ်ႊထႃႊရၢမ်ႊ ၼႂ်းဢိူင်ႇပၢင်ယႃႈၽႅၵ်ႈ (บางหญ้าแพรก)ၸႄႈတွၼ်ႊသမုတ်ႊသႃႊၶွၼ်ႊ ၸိုင်ႈထႆး။

သိုဝ်ႇ MahachaicableTV ႁၢႆးငၢၼ်းဝႆႉဝႃႈ – “ ႁႅင်းၵၢၼ်မိူင်းႁူမ်ႈတုမ်မၢၼ်ႈၵေႃႉၼိုင်ႈ မိူဝ်ႈၵႂႃႇတၢင်းၼွၵ်ႈ ပွၵ်ႈၶိုၼ်းတီႈယူႇ ၊ မိူဝ်ႈၸမ်ထိုင်ႁွင်ႈသဝ်းၼၼ်ႉ ၺႃးၸုမ်းဢမ်ႇႁူႉၾၢႆႇ 4 ၵေႃႉ တိုဝ်းမၢၵ်ႇႁူဝ်ၵၼ်ႊၼွၵ်ႉ ၶီႇရူတ်ႉၶိူင်ႈမႃးၵိုတ်း ႁႄႉတၢင်းၼႃႈတၢင်းလင်သေ ၽၼ်း။ ၵေႃႉၺႃးၽၼ်း မၢတ်ႇၸဵပ်းၸွမ်းတူဝ်ၶိင်းလႄႈ သၼ်လင်ၸိူဝ်းၼႆႉသေ ထိုင်တီႈလူႉတၢႆ ” – ဝႃႈၼႆဝႆႉ။

ႁႅင်းၵၢၼ်ၵေႃႉဢၼ်ၺႃးၽၼ်းတၢႆၼႆႉ ၸိုဝ်ႈ ၸၢႆးၵဝ်ႉ ဢႃယု 20 ပီ ပဵၼ်ႁႅင်းၵၢၼ်ၵူၼ်းမိူင်းႁူမ်ႈတုမ်။ ၸုမ်းၸွႆႈတူင်ႇၵူၼ်း သူင်ႇတူဝ်ယူတ်းယႃတီႈႁူင်းယႃလူင်သမုတ်ႊသႃႊၶွၼ်ႊသေတႃႉ လိူတ်ႈဢွၵ်ႇၼမ်လႄႈ ဢမ်ႇၶိုတ်းသၢႆၸႂ် ။

ၼႂ်းၸိုင်ႈထႆးၼႆႉ ၵူၼ်းတၢင်ႇတီႈသီႇလႅၼ်ၶဝ်ႈမႃး ႁဵတ်းၵၢၼ်ႁႃၵိၼ်လဵင်ႉတွင်ႉၼမ်ႁႅင်း မိူၼ်ၼင်ႇ ႁႅင်းၵၢၼ်ၵူၼ်းမိူင်းတႆးၵေႃႈ မႃးထင်ယူႇသဝ်းၼမ် ၵမ်ႈၽွင်ႈၵေႃႈ မီးၵၢၼ်လီ လႆႈလွတ်ႈၽေးယူႇသေတႃႉ ၵမ်ႈၽွင်ႈၵေႃႈ ယူႇဢမ်ႇမႅၼ်ႈတီႈမႅၼ်ႈတၢင်းသေ မီးၽေးထိုင်သၢႆၸႂ်။ မၢင်တီႈ ႁႅင်းၵၢၼ်ယၢၼ်မိူင်း သႅၼ်းၵူၼ်းၼုမ်ႇၶဝ် ၵႆႉမီးလွင်ႈၽိတ်းမေႃးၵၼ်သေ ၶႃႈၵၼ်လူႉတၢႆၵေႃႈ မီးမႃးၼမ်။

ပူၼ်ႉမႃး မိူဝ်ႈဝၼ်းတီႈ 11/5/2023 ၼၼ်ႉၵေႃႈ ၸၢႆးဢုင်း ဢႃယု 44 ပီ ဢဝ်မိတ်ႈတႅင်း ၼၢင်းၵျႃႇယူင်ႇ (ႁွင်ႉ) ဢႅမ်း ဢႃယု 30 ပၢႆ တီႈဝဵင်းႁၢင်လူင် (ႁၢင်ၻူင်း)ၸႄႈတွၼ်ႈၵဵင်းမႆႇ ၸိုင်ႈထႆး။ မၼ်းၼၢင်းထုၵ်ႇမိတ်ႈတႅင်းသႂ်ႇ တီႈပုမ်ႁွႆးၼိုင်ႈ လႆႈတိူဝ်ႉ မၢတ်ႇၸဵပ်းႁၢဝ်ႈႁႅင်း။