ဝၼ်းတီႈ 27/09/2023 မိူဝ်ႈၼႆႉယၢမ်းဝၢႆးဝၼ်း 4 မူင်း 55 မိၼိတ်ႉ မၢၵ်ႇတႅၵ်ႇတီႈ ပၢမ်ႉၼမ်ႉမၼ်း ၻႅင်ႊၵူဝ်ႉ DENKO ဢၼ်မီးတၢင်းၼွၵ်ႈဝဵင်းလႃႈသဵဝ်ႈ ၊ တုမ်ႉတိူဝ်ႉရူတ်ႉၵႃးလူႉၵွႆလၢႆလမ်း၊ ၵူၼ်းမၢတ်ႇၸဵပ်းလူႉတၢႆၵေႃႈမီး။
ၵူၼ်းယူႇႁိမ်းပၢမ်ႉၼမ်ႉမၼ်း လၢတ်ႈတီႈၽူႈတွႆႇႁွၵ်ႈဝႃႈ -“လႆႈငိၼ်းသဵင်တႅၵ်ႇလင်ဝႃႈလင်။ ဝၢႆးၼၼ်ႉၾႆးလုၵ်ႉမႆႈ ၊ ၵူၼ်းဢွၼ်ၵၼ်လႅၼ်ႈလႅၼ်ႈပၢႆႈပၢႆႈ သမ်ႉပေႃးသုၵ်ႉၵႂႃႇမူတ်း။ ၵမ်ႈၽွင်ႈ ဢၢၼ်းၶႄၾႆးယူႇၵေႃႈမီး။ ၵူၺ်းၵႃႈ ပဵဝ်ၾႆးႁႅင်းၼႃႇလႄႈဢမ်ႇၸၢင်ႈၶႄ”- ဝႃႈၼႆ။
ယွၼ်ႉသင်လႄႈပဵၼ်ၼမ်ႉမိုဝ်းၽႂ်ၸုမ်းလႂ်တႄႉဢမ်ႇပႆႇလႆႈႁူႉ။ ရူတ်ႉၶႄၾႆး မႃးၸွႆႈႁူတ်း/ၶႄၾႆးႁိုင်မွၵ်ႈ ၸူဝ်ႈမူင်းၸင်ႇၶႄၾႆးလႆႈ ဝႃႈၼႆ။
ယွၼ်ႉမၢၵ်ႇတႅၵ်ႇတီႈပၢမ်ႉၼမ်ႉမၼ်းၼႆႉသေ ၸၢၵ်ႇမၢၵ်ႇတိူဝ်ႉသႂ်ႇၵူၼ်းမၢတ်ႇၸဵပ်း 10 ၵေႃႉ။ ၼႂ်းၼၼ်ႉ တၢႆ 2 ၵေႃႉ – ၸုမ်းၸွႆႈထႅမ်(ပရႁိတ) လၢတ်ႈတီႈၽူႈတွႆႇႁွၵ်ႈၼင်ႇၼႆ။
“ဢၼ်ႁဝ်းၶႃႈၸၢင်ႈယိုၼ်ယၼ်လၢတ်ႈလႆႈၶၢဝ်းၼႆႉတႄႉ ဢၼ်တိူဝ်ႉမၢတ်ႇၸဵပ်းႁႅင်းပဵၼ် ၸၢႆး 8 ၵေႃႉ ယိင်း 4 ၵေႃႉ။ သူင်ႇႁူင်းယႃဝႆႉယဝ်ႉ။ ၼႂ်းၼၼ်ႉမၢတ်ႇၸဵပ်းႁႅင်းသေတၢႆ 2 ၵေႃႉၼၼ်ႉပဵၼ်ၽူႈၸၢႆး။ ရူတ်ႉၵႃးၵေႃႈၺႃးမၢၵ်ႇတႅၵ်ႇ ၾႆးမႆႈ 2 လမ်း ရူတ်ႉၶိူင်ႈလမ်းၼိုင်ႈ ၾႆးမႆႈၵွႆမူတ်း ”- ဝႃႈၼႆ။
ဢၼ်မၢၵ်ႇတႅၵ်ႇ ၾႆးမႆႈၵႂႃႇၼၼ်ႉပဵၼ်ၵႃးတၢင်ႇၵူၼ်း တိတ်ႉၸႃႇသျိၼ်ႇ ဢဵၵ်ႉသ်ပရႅတ်ႉသ် လမ်းၼိုင်ႈ၊ ၵႃးသႅၼ်း ႁၢႆႊၵျႅတ်ႉ (ၵူၼ်းတင်းၼမ်ႁူႉၸၵ်းဝႃႈ ၶူၺ်းပလူး) ၼၼ်ႉလမ်းၼိုင်ႈ လႄႈရူတ်ႉၶိူင်ႈလမ်းၼိုင်ႈ။ ဝၢႆးမၢၵ်ႇတႅၵ်ႇၾႆးမႆႈယဝ်ႉ ပလိၵ်ႈလႄႈ သိုၵ်းမၢၼ်ႈမႃးၵူတ်ႇထတ်းပိုၼ်ႉတီႈ ထဵတ်ႈထၢမ်ၵူၼ်းႁိမ်းႁွမ်းၼၼ်ႉယူႇ ၵူၼ်းၸိူဝ်းယူႇႁိမ်းၸမ်ပၢမ်ႉၼမ်ႉမၼ်းၼၼ်ႉလၢတ်ႈၼင်ႇၼႆ။
တီႈဝဵင်းလႃႈသဵဝ်ႈၼႆႉ မိူဝ်ႈဝူင်ႈပူၼ်ႉ ဝၼ်းတီႈ 22/09/2023 ၼၼ်ႉၵေႃႉ ပလိၵ်ႈၵုမ်းရူတ်ႉၵႃးၵေႃႉၼိုင်ႈၺႃးယိုဝ်း၊ ဝၼ်းတီႈ 19/09/2023 သမ်ႉ မၢၵ်ႇတႅၵ်ႇတီႈႁိမ်းႁူင်းႁႅမ်း CS Hotel ၵူၼ်းမၢတ်ႇၸဵပ်း 4 ၵေႃႉ တၢႆ 2 ၵေႃႉ။
ၼႂ်းပီၼႆႉမႃး တီႈဝဵင်းလႃႈသဵဝ်ႈၼႆႉ မၢၵ်ႇၵႆႉတႅၵ်ႇ ၊ ၵႆႉမီးလွင်ႈပိုတ်းယိုဝ်းၵၼ်၊ ၵူၼ်းပိုၼ်ႉတီႈလႄႈ လၢတ်ႈဝႃႈ ၸုမ်းယိပ်းၵွင်ႈၵၢင်ႇ ၵဵပ်းၶွၼ်ႇ၊ ၸဝ်ႈၶွင်ၵၢၼ်ငၢၼ်းသမ်ႉဢမ်ႇၶႂ်ႈပၼ်လႄႈ ၸင်ႇမီးလွင်ႈႁၢင်ႈၵၢင်မၢၵ်ႇတေႃႇၵၼ်ဝႃႈၼႆ။ ၾၢႆႇၼိုင်ႈ ႁူင်းပလိၵ်ႈ ၊ ၵဵတ်ႉ/လၢၼ်ႇတီႈသိုၵ်းမၢၼ်ႈပႂ်ႉ ၸိူဝ်းၼႆႉၵေႃႈၵႆႉမီးလွင်ႈငွႆးယိုဝ်း၊ ပွႆႇမၢၵ်ႇ ။
 လၢတ်ႈတီႈၽူႈတွႆႇႁွၵ်ႈၼင်ႇၼႆ။){kind=link}