ၵူၼ်းမူႇၸေႊ ၵူဝ်ပၢင်တိုၵ်းပဵၼ်ၶၢဝ်းႁိုင် ႁၢင်ႈႁႅၼ်းၶူဝ်းၵိၼ်ယမ်ႉဝႆႉ

ၵူၼ်းမိူင်းမူႇၸေႊ ဢွၼ်ၵၼ်ႁၢင်ႈႁႅၼ်း သိုဝ်ႉၶွင်ၵိၼ်ယႅမ်ႉဝႆႉ ပေႃးပဵၼ်ပၢင်တိုၵ်းမႃးမိူဝ်ႈလႂ် ၼင်ႇႁိုဝ် ၶွင် ၵိၼ်ယႅမ်ႉ ပေႃးတေဢမ်ႇၶၢတ်ႇ။

တႄႇဢဝ် ဝၼ်းတီႈ 17-25/9/2023 ၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်း TNLA ပဵၼ်ပၢင်တိုၵ်းၵၼ်မႃး ၼႂ်းဢိူင်ႇ ၸေႊလၢၼ်ႉ၊ ဢိူင်ႇတိုင်းလူင်လႄႈ ဢိူင်ႇပၢင်ႇၶမ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ယိုဝ်းၸွႆႈၸိူဝ်းၼႆႉထႅင်ႈ ဝႃႈၼႆ။

ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵူႈပွၵ်ႈတႄႉ ၶွင်ၵိၼ်ယႅမ်ႉႁဝ်းၶႃႈၼႆႉ သိုဝ်ႉ ၵိၼ်ၸွမ်း ဝၼ်းလႂ်ဝၼ်းၼၼ်ႉဢဝ် တေႃႈလဵဝ် ဢမ်ႇၸႂ်ႈၸိူင်ႉၼၼ်ယဝ်ႉ ပေႃးဢွၵ်ႇႁိူၼ်းမႃးၸိုင် ၵႂႃႇသိုဝ်ႉဝႆႉ ၶွင် ၵိၼ်ယႅမ်ႉ ဢၼ်ႁႅင်ႈ မၼ်း တႃႇၶၢဝ်းတၢင်း 3-4 ဝၼ်းၵမ်းလဵဝ်။ ပေႃးၶဝ်ပဵၼ်ပၢင်တိုၵ်းမႃး ၼင်ႇႁိုဝ် ႁဝ်းၶႃႈ ပေႃးတေ ဢမ်ႇၶၢတ်ႇလွင်ႈၵိၼ် ယႅမ်ႉ ၸိူဝ်းၼႆႉဢေႃႈ။ ယဝ်ႉၵေႃႈ ၶဝ်ႈပိူၵ်ႇ ၸိူဝ်းၼႆႉၵေႃႈ တမ်ဝႆႉၶႃႈဢေႃႈ”- ဝႃႈၼႆ။

ၶွင်ၵိၼ်ယႅမ်ႉ ဢၼ်ၵူၼ်းမိူင်းမူႇၸေႊ ႁၢင်ႈႁႅၼ်းသိုဝ်ႉဝႆႉၼၼ်ႉသမ်ႉ တေပဵၼ်ၶွင်ၵိၼ်ယႅမ်ႉ (ဢၼ်ႁႅင်ႈ)၊ ၶွင်ၵိၼ်ယႅမ်ႉ ဢၼ် ဝႆႉႁိုင်လႆႈ မိူၼ်ၼင်ႇ ဢႃႇလူး၊ ထူဝ်ႇလိူင်၊ ႁူဝ်ၽိူၵ်ႇ၊ ၶႆႇၵႆႇ၊ သႆႈႁႅင်ႈ၊ သႆႈဝၢၼ်၊ ၶဝ်ႈပိူၵ်ႇ ၸိူဝ်းၼႆႉလႄႈ ၵိူဝ်၊ ၽွင်ဝၢၼ်လႄႈ ၼမ်ႉမၼ်း ၸိူဝ်းၼႆႉ။

မိူၼ်ၼင်ႇ မူႇဝၢၼ်ႈ ၸိူဝ်းယူႇႁိမ်းၸမ်လွႆ ဢွင်ႈတီႈႁိမ်းပၢင်တိုၵ်း ၸိူဝ်းၼၼ်ႉ ၵူၼ်းဝၢၼ်ႈပွတ်းထုင်ႉၼၼ်ႉ ၵမ်ႈၼမ် တေ ႁၢင်ႈႁႅၼ်းသိုဝ်ႉဝႆႉ ၶွင်ၵိၼ်ယႅမ်ႉၵၼ် ပေႃးပဵၼ်ပၢင်တိုၵ်း ၵူဝ်ဢမ်ႇၸၢင်ႈဢွၵ်ႇႁိူၼ်းလႄႈ ၵူဝ်ဢမ်ႇမီးသင်ၵိၼ် ၸိူဝ်းၼႆႉ။

မိူဝ်ႈဝၼ်းတီႈ 25 ယၢမ်းၵၢင်ၶိုၼ်းမွၵ်ႈ 10 မူင်းၶိုင်ႈၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ် 2 လမ်း မႃးပွႆႇမၢၵ်ႇသႂ်ႇ သိုၵ်း TNLA ႁိမ်းမၢၼ်ႈၵၢင်၊ မၢၼ်ႈၼမ်ႉငူး ၸိူဝ်းၼႆႉ 4 လုၵ်ႈ။ ယဝ်ႉၵေႃႈ ၵႂႃႇပွႆႇသႂ်ႇထႅင်ႈ တီႈတပ်ႉပၢင်သဝ်း သိုၵ်း TNLA တီႈလွႆမွၵ်ႇၼၼ်ႉ ထႅင်ႈ 2 လုၵ်ႈ။ မၢၵ်ႇလူင် သိုၵ်းမၢၼ်ႈ ဢၼ်မႃးပွႆႇသႂ်ႇၼၼ်ႉသမ်ႉ ၼိုင်ႈလုၵ်ႈလႂ် မီးၼမ်ႉၼၵ်း (500) ပွင်ႇ (ပေါင် ၅၀၀ ဗုံး သီး) ၼႆယဝ်ႉ။

“ပၢင်တိုၵ်းၶဝ် မိူဝ်ႈဝၼ်းတီႈ 25 ယၢမ်းၵၢင်ၶိုၼ်းၼၼ်ႉ သဵင်ၵွင်ႈလူင်ၶဝ် ႁႅင်းပေႇၸႂ်ၶႃႈယဝ်ႉ ႁိူၼ်းပေႃးသၼ်ႇ ၽၵ်းတူၼႆႉ ပေႃးမေႃးၵွၵ်းၵႅၵ်းၵွၵ်းၵႅၵ်း ။ ထၢင်ႇတႄႉ တေပဵၼ်မၢၵ်ႇဢၼ်ၶဝ်ယိုဝ်းၵၼ်ၼၼ်ႉ ႁႅင်းၶႃႈ ဢေႃႈ။ မိူဝ်ႈဝၼ်း ၼၼ်ႉ ႁဝ်းၶႃႈ ထွမ်ႇသဵင်မၼ်းဝႆႉၶႃႈဢေႃႈ သင်ဝႃႈ ငဝ်းလၢႆးမၼ်းဢမ်ႇလီမႃး သဵင်ၵွင်ႈလူင်ထပ်း ၵၼ်မႃးၸမ်ႁဝ်းၸိုင် ႁဝ်းၶႃႈ ႁၢင်ႈႁႅၼ်းဝႆႉ တႃႇတေၶၢႆႉတီႈၼၼ်ႉၶႃႈဢေႃႈ”- ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ သိုပ်ႇလၢတ်ႈၼႄၼင်ႇၼႆ။

ဝၢႆးသေ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ တီႈတပ်ႉပၢင်သဝ်း သိုၵ်း TNLA တီႈဝဵင်းမူႇၸေႊ ၼႆႉယဝ်ႉ ၶၢဝ်းတၢင်း 3-4 ဝၼ်းမႃးၼႆႉ သဵင်ၵွင်ႈတင်းသွင်ၾၢႆႇ ယဵၼ်လူင်းဝႆႉ ႁၢၼ်ႉတေႃႇထိုင်ယၢမ်းလဵဝ်။

ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၸေႊလၢၼ်ႉၼႆႉ သဵင်ၵွင်ႈယဵၼ်ဝႆႉ လႆႈငိၼ်း ၵွင်ႈဢွၼ်ႇတႄႉ ၼိုင်ႈၵမ်းၼိုင်ႈလႂ်ၼၼ်ႉၵူၺ်း ဝၢႆးသိုၵ်းမၢၼ်ႈ ဢဝ်ၶိူင်ႈမိၼ်မႃးတိုၵ်းၶဝ်ၼၼ်ႉ”- ဝႃႈၼႆ။

ယွၼ်ႉပၢင်တိုၵ်းၼႆႉသေ တုမ်ႉတိူဝ်ႉ ၵူၼ်းမိူင်း ၼႂ်းဢိူင်ႇၸေႊလၢၼ်ႉလႄႈ ဢိူင်ႇတိုင်းလူင် ၸိူဝ်းၼႆႉ ဢွၼ်ၵၼ်ပၢႆႈ ၽေးသိုၵ်း ၼပ်ႉႁူဝ်ပၢၵ်ႇ မၢင်ၸိူဝ်းပၢႆႈသွၼ်ႈဝႆႉၸွမ်း ႁိူၼ်းယေး ပီႈၼွင်ႉၽႂ်မၼ်း ၼႂ်းဝဵင်းမူႇၸေႊ ၸိူဝ်းၼႆႉ။

တႄႇဢဝ် ဝၼ်းတီႈ 23/7/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်းတင်း သိုၵ်း TNLA ပဵၼ်ပၢင် တိုၵ်းၵၼ်မႃး ႁၢဝ်ႈႁႅင်း ဢမ်ႇယွမ်း 50 ပွၵ်ႈ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်း TNLA ဢွၵ်ႇဝႆႉၼင်ႇၼႆ။