ဢေႇၵျႅၼ်ႇသီႇၾၢႆႇတူင်ႉၼိုင်ၼႂ်း ဢႃႇၵႃႇသ လိူၼ်လၢဝ်လႄႈၵၢင်ႁၢဝ် မိူင်းဢမေႊရိၵၼ်ႊ NASA ပိုၼ်ၽၢဝ်ႇဝႃႈ ၶိူင်ႈမိၼ်ၼႂ်း ဢႃႇၵႃႇသ ၶွင် NASA လမ်းၼိုင်ႈ တေႃႉဢဝ် လၢဝ်ထဵမ်းလၢဝ်ပွမ်ဢၼ်မီးဢႃယုသၢၵ်ႈတၢမ်း 4500 လၢၼ်ႉပီၼၼ်ႉ လူင်းမႃးထိုင်ၶိုၼ်းၼိူဝ်လိၼ်ယဝ်ႉဝႃႈၼႆ။
ယူႇတီႈ NASA သေ လႆႈပွႆႇၶိူင်ႈမိၼ်ဢႃႇၵႃႇသသေလဵပ်ႈႁဵၼ်းလၢဝ်ပွမ်ဢၼ်မီးၸိုဝ်ႈ Bennu ၼႆၼၼ်ႉၶၢဝ်းတၢင်းႁိုင်ၼၢၼ်း 7 ပီ။
ဝၼ်းတီႈ 25 သႅပ်ႉထႅမ်ႇပိူဝ်ႇၼႆႉ NASA ပိုၼ်ၽၢဝ်ႇဝႃႈ ဢုပ်းမိၼ်ဢွၼ်ႇ ဢၼ်လုၵ်ႉတီႈၶိူင်ႈမိၼ်ဢႃႇၵႃႇသ ဢၼ်ယႂ်ႇၸိုဝ်ႈႁွင်ႉဝႃႈ Osiris – Rex ၼၼ်ႉ တေႃႉဢဝ်ၸၢၵ်ႇ လၢဝ်ပွမ် ဢၼ်မီးၼမ်ႉၼၵ်းမွၵ်ႈ 250 ၵရမ်ႇ သေ လုၵ်ႉတီႈၵၢင်ႁၢဝ်ဢၼ်မီးတၢင်းသုင်မွၵ်ႈ 63000 လၵ်းၼၼ်ႉမိၼ် လူင်းမႃး သူႇပိုၼ်ႉလိၼ် ၼႂ်းႁၢတ်ႇသၢႆးလူင်ဢၼ်မီးၼႂ်း ၸႄႈမိူင်း ဢူႇတႃႇ Utah ၸိုင်ႈမိူင်းဢမေႇရိၵၼ်ႇၶိုၼ်းယဝ်ႉဝႃႈၼႆ။
ၵွၼ်ႈလၢဝ်ပွမ်ၼၼ်ႉ ပဵၼ်ၼႂ်းမုၵ်ႇမူႇလုၵ်ႈၵၢင်ဝၼ်း၊ လၢမ်းၶၢတ်ႈဝႃႈ ဢႃယုၵွၼ်ႈလၢဝ်ပွမ်တေမီးမွၵ်ႈ 4500 လၢၼ်ႉပီယဝ်ႉ၊ ယူႇတီႈ NASA သေတေၵူတ်ႇထတ်းတူၺ်းၵွၼ်ႈႁိၼ် လၢဝ်ပွမ်ၼၼ်ႉထႅင်ႈလီငၢမ်းသေဢမ်ႇၵႃး ယူႇတီႈ Osiris – Rex ၵေႃႈ တေသိုပ်ႇလဵပ်ႈႁဵၼ်း ၵွၼ်ႈလၢဝ်ပွမ်ထႅင်ႈလုၵ်ႈၼိုင်ႈ ဝႃႈၼႆ။
