ပေႃးထိုင်မႃး 2/10/2023 ၼႆႉ သိုၵ်းမၢၼ်ႈ  ၸႂ်ႉၵူၼ်းမိူင်း ၸိူဝ်းႁဵတ်းၵၢၼ်ဢွၼ်ႊလၢႆႊ တၢင်ႇမၢႆၾၢင် Register  တႃႇၵဵပ်းၶွၼ်ႇငၢႆႈ ဝႃႈၼႆ ။

သိုၵ်းမၢၼ်ႈ ပိုၼ်ၽၢဝ်ႇ ဝႆႉဝႃႈ – “ ၵူၼ်းၸိူဝ်းၶၢႆၶူဝ်းၶွင်တၢင်းဢွၼ်ႊလၢႆႊလႄႈ ၵူၼ်းၸိူဝ်းမီးလၢႆးလႆႈ ငိုၼ်းၼိူဝ်ဢွၼ်ႊလၢႆႊ မိူၼ်ၼင်ႇ ၾဵတ်ႉပုၵ်ႉ ၊ ယူႊၵျုပ်ႉ ၸိူဝ်းၼႆႉတၢင်းသဵင်ႈ တၵ်းတေလႆႈတၢင်ႇမၢႆၾၢင် ။ ပေႃးၽႂ်ဢမ်ႇႁဵတ်းၸွမ်း တေၺႃးဢဝ်လိူင်ႈ။လိူၼ်ဢွၵ်ႊထူဝ်ႊပိူဝ်ႊ ဝၼ်းတီႈ 2 ၼႆႉ ႁႂ်ႈတႄႇတၢင်ႇမၢႆၾၢင်ၵၼ် ” -ဝႃႈၼႆဝႆႉ။

ၵူၼ်းႁဵတ်းၵၢၼ်ပၢႆးမၢၵ်ႈမီး ဢၼ်ၵွင်ႉၵၢႆႇၸွမ်းဢွၼ်ႊလၢႆႊတင်းသဵင်ႈ မိူၼ်ၼင်ႇ ၶွမ်ႊမၼီႊ၊ ၵူၼ်းႁဵတ်းၵၢၼ် သုၼ်ႇတူဝ် ႁင်းၵူၺ်းၸိူဝ်းၼႆႉ တၵ်းတေလႆႈတၢင်ႇမၢႆၾၢင် လိူဝ်ၼၼ်ႉ မိူၼ်ၼင်ႇ ၵူၼ်းၸိူဝ်းႁဵတ်းၵၢၼ်သွၼ်လိၵ်ႈ သွၼ်လၢႆး(ပညာရေး) ၊ ၵၢၼ်ႁွင်ႉႁူၺ်းၵူၼ်းဢႅဝ်ႇလႄႇ ၽၢၼ်ႇတၢင်းဢွၼ်ႊလၢႆႊ ၊ ၵၢၼ်ပၢႆးယူႇလီဢွၼ်ႊလၢႆႊလႄႈ ၵၢၼ်ၶၢႆၶွင်ၵိၼ်ယႅမ်ႉ ၼိူဝ်ဢွၼ်ႊလၢႆႊၸိူဝ်းၼႆႉ တၵ်းလႆႈတၢင်ႇမၢႆၾၢင်ၼႆယဝ်ႉ။

ၵူၼ်းမိူင်းၵေႃႉၼိုင်ႈလၢတ်ႈတီႈ VOA ဝႃႈ – “ လွင်ႈဢၼ်ၸႂ်ႉတၢင်ႇမၢႆၾၢင်ၵၢၼ်ဢွၼ်ႊလၢႆႊၼႆႉ ၵူၼ်းၵေႃႉၼိုင်ႈလႄႈၵေႃႉၼိုင်ႈ ႁၼ်ထိုင်ဢမ်ႇမိူၼ်ၵၼ် ။မၢင်ၵေႃႉၵေႃႈဝႃႈ  ပေႃးတၢင်ႇမၢႆၾၢင်ၼႆ ၵူၼ်းၸိူဝ်းႁဵတ်းၽိတ်းပၵ်းပိူင်ၸိူဝ်းၼႆႉ တေယွမ်းလူင်း ၵွပ်ႈၼႆလႄႈ တေယွမ်းတၢင်ႇမၢႆၾၢင်ယူႇၼႆဢေႃႈ။ ၵမ်ႈၽွင်ႈၵေႃႈ ဝႃႈတေႃႉတႄႉ ႁဵတ်းႁႃလၢႆးလႆႈဢိတ်းဢွတ်းၵွႆး ဢမ်ႇလႆႈငိုၼ်းၼမ် ၶဝ်ႈၸိုဝ်ႈဝႃႈ ၵၢၼ်သိုဝ်ႉၶၢႆၼိူဝ်ဢွၼ်ႊလၢႆႊၵွႆးဝႃႈၼႆသေတႃႉၵေႃႈ ဢမ်ႇမီးငိုၼ်းၶဝ်ႈၼမ် ယွၼ်ႉၼၼ် ဢမ်ႇၶႂ်ႈတၢင်ႇမၢႆၾၢင်” – ဝႃႈၼႆ။

မိူင်းႁူမ်ႈတုမ်ၼႆႉ တိုၵ်ႉႁႃတေၶိုၼ်ႈယႂ်ႇၵူၺ်း ယဝ်ႉၵေႃႈ ပၢႆးမၢၵ်ႈမီးၵူၼ်းမိူင်းၵေႃႈ ပႆႇပၼ်ႇလႆႈလီလီ ယွၼ်ႉၼၼ် တေဢၢၼ်းၵဵပ်းၶွၼ်ႇ ၵၢၼ်ဢွၼ်ႊလၢႆႊၼႆ ပႆႇၸႂ်ႈၶၢဝ်းယၢမ်းမၼ်းၼႆ ၽူႈမီးပုၼ်ႈၽွၼ်း ၼႂ်းၸုမ်းၵႅတ်ႇၵင်ႈသုၼ်ႇလႆႈ ၵူၼ်းသိုဝ်ႉၵိၼ်   ၵေႃႉၼိုင်ႈလၢတ်ႈၼင်ႇၼႆ။

ႁွင်ႈၵၢၼ်ၾၢႆႇပၢႆးမၢၵ်ႈမီးလႄႈၵၢၼ်ၵႃႉၶၢႆ ဢၼ်ယူႇတႂ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇမၢႆမီႈမႂ်ႇ ႁႂ်ႈၵူၼ်းၵႃႉၶၢႆၼိူဝ်ဢွၼ်ႊလၢႆႊ သႂ်ႇၶွၼ်ႇလႄႈ တၢင်ႇမၢႆၾၢင်ၼႆႉ ၸဵမ်မိူဝ်ႈႁၢင်လိူၼ်ၵျူႊလၢႆႊ ပီ 2023 ၼႆႉမႃးသေ ပႆႇလူင်းမိုဝ်းႁဵတ်းသင်။လိူၼ်ၼႃႈ တေႁႂ်ႈတၢင်ႇမၢႆၾၢင်တေႉယဝ်ႉၼႆလႄႈ ႁဵတ်းႁႂ်ႈၵူၼ်းၵႃႉၶၢႆ ၼိူဝ်ဢွၼ်ႊလၢႆႊ တူင်ႉတိုၼ်ႇၵၼ်။