တႄႇဢဝ် ဝၼ်းတီႈ 18-20 /11/2025 ၶၢဝ်းတၢင်း 3 ဝၼ်း တပ်ႉပႂ်ႉလႅၼ်လိၼ် ၶဝ်ႈၵူတ်ႇထတ်း ႁူင်းၵေႃႇၵၢႆႇ ၼႂ်းဝဵင်းမႂ်ႇ သူၺ်ႇၵူၵ်ႉၵူဝ်ႇ တီႈမျႃႉဝတီႇ ၼႂ်းၸေႈမိူင်းယၢင်းၽိူၵ်ႇ ႁဵတ်းႁႂ်ႈ ၵူၼ်းႁဵတ်းၵၢၼ်ၵျႃႊၽျႅၼ်ႉ ၽူင်ႉပၢႆႈၵူႈႁူးၵူႈတၢင်း။ မၢင်ၸိူဝ်းၵေႃႈ တၼ်းလႆႈပၢႆႈလီလီ မၢင်ၸိူဝ်းၵေႃႈ ၵၢၼ်ႁၢင်ႈႁႅၼ်းဢမ်ႇမီး။ သင်ဝႃႈ ပၢႆႈလႄႈ မေႃသဵင်ႈမေႃမူတ်း တင်းၶႅၼ်း။ ၵူဝ်ၶၢႆႉတီႈၼိုင်ႈၵႂႃႇမီးတီႈၼိုင်ႈ။ ၵႂႃႇမီးတီႈလႂ်ၵေႃႈ ႁိုဝ်တေလီ။ ၵူၼ်းမိူင်းတႆးၵေႃႈ ၵူဝ်ၸုမ်းၵျႃႊၽျႅၼ်ႉ မႃးၶွၼ်ႈယူႇၼႂ်းပိုၼ်ႉတီႈၼမ်ထႅင်ႈ ။

ၼႂ်းၶၢဝ်း တၢင်း 3 ဝၼ်းၵူၺ်း တီႉၺွပ်းလႆႈ ၵူၼ်းၼွၵ်ႈမိူင်း 1800 ၵေႃႉ ၼႆ သိုၵ်းမၢၼ်ႈပိုၼ်ၽၢဝ်ႇလၢတ်ႈ ။ လိူဝ်ၼၼ်ႉ တပ်ႉပႂ်ႉလႅၼ်လိၼ်ၶဝ် ဢွၼ်ၵၼ်ၶဝ်ႈသွၵ်ႈ တိုၵ်းလူင် ဢၼ်သၢင်ႈဝႆႉ လူၺ်ႈဢမ်ႇၸႂ်ႈတၢင်းၵၢၼ် 6 လင် ယိုတ်းလႆႈပႃး ၶွမ်ႊ 2653 ဢၼ် လႄႈ ၾူၼ်း 21750 လုၵ်ႈ ။

ၾူၼ်းလႄႈ ၶွမ်ႊ ၸိူဝ်းၼၼ်ႉ ပဵၼ်ဢၼ် ၵူၼ်းႁဵတ်းၵၢၼ်ၵျႃႊၽျႅၼ်ႉၶဝ် ၸႂ်ႉၼႂ်းၵၢၼ်လွၵ်ႇလႅၼ်ၵိၼ်ၼိူဝ်ဢွၼ်ႊလၢႆႊ ၸိူဝ်းၼၼ်ႉဝႃႈၼႆ။
ၵွၼ်ႇၼႃႈၼၼ်ႉ တပ်ႉပႂ်ႉလႅၼ်လိၼ်ၶဝ် ဢွၼ်ၽဵဝ်ႈလၢင်ႉ ဢွင်ႈတီႈ KK Park ဢၼ်ဢမ်ႇပေႃး ယၢၼ်ၵႆၵၼ်တင်း သူၺ်ၵူၵ်ႉၵူဝ်ႇၼႆႉ။ ၼၼ်ႉၵေႃႈ သိုၵ်းမၢၼ်ႈလႄႈ တပ်ႉပႂ်ႉလႅၼ်လိၼ် ဢၼ်ယူႇတႂ်ႈသိုၵ်းမၢၼ်ႈၼၼ်ႉ ၸင်ႇႁူမ်ႈၵၼ် ယႃႉလူႉၵူၼ်ႇပင်းတိုၵ်း 100 ပၢႆႈ။

ၵူၼ်းၸိူဝ်းဢၼ်ႁူႉၼွၵ်ႈႁၼ်ၼႂ်းၶဝ် လၢတ်ႈတီႈသိုဝ်ႇၶၢဝ်ႇလူင်လၢႆဢၼ်ဝႆႉတႄႉ – KK Park ၼႆႉ ပဵၼ် KNU ၶဝ် ပၼ်ၶႂၢင်ႉသၢင်ႈဝႆႉ တႃႇႁႂ်ႈၵူၼ်းတၢင်ႇတီႈသီႇလႅၼ်မႃးၶၢတ်ႈယူႇ ၊ ယွၼ်ႉၼၼ်လႄႈ ၶဝ်ယႃႉၵူၼ်ႇပင်းပႃး ၊ သူၺ်ႇၵူၵ်ႉၵူဝ်ႇၼၼ်ႉသမ်ႉ ပဵၼ် တပ်ႉပႂ်ႉလႅၼ်လိၼ် BGF ၶဝ်ၵူၺ်း ဢၼ်ပၼ်ၶႂၢင်ႉသၢင်ႈဝႆႉလႄႈ ၸင်ႇဝႃႈ ဢမ်ႇယႃႉလူႉသင် တေႃႉတႄႉ ယိုတ်းသိမ်းဢဝ်ၶိူင်ႈၸႂ်ႉၶူဝ်းသွႆၵၢၼ်ၵျႃႊၽျႅၼ်ႉၸိူဝ်းၼၼ်ႉၵူၺ်း ။ ပေႃးလၢတ်ႈသိုဝ်ႈၵေႃႈ ၶဝ်တင်းသွင်ၸုမ်းယဝ်ႉ ဢၼ်လႆႈၸႂ်ၵၼ်သေ ပၼ်ၶႂၢင်ႉပိူၼ်ႈမႃးပူၵ်းမႃးသၢင်ႈတိုၵ်းၸိူဝ်းၼႆႉ ယဝ်ႉၵေႃႈ ပႂ်ႉၵဵပ်းၵိၼ်ၶွၼ်ႇ ” – ဝႃႈၼႆ။

ဝၢႆးသေ မိူင်းဢဵၼ်ႁႅင်းယႂ်ႇၶဝ် ၸီႉၸမ်ႈ ပၼ်ႁႅင်းႁိပ်ႇမႃးလၢႆၵမ်းယဝ်ႉ တပ်ႉပႂ်ႉလႅၼ်လိၼ်လႄႈ တပ်ႉၸိူဝ်းၵဵဝ်ႇၶွင်ႈၶဝ် ၸင်ႇဢီးတၢင်းၽိတ်းသႂ်ႇၵၼ် ။ ၵမ်းလိုၼ်း ထိုင်တီႈလႆႈ ၵႂၢတ်ႇလၢင်ႉၽဵဝ်ႈသိမ်း။

ဢၼ်လီမႆႈၸႂ် သမ်ႉ ၵူၼ်းႁဵတ်းၵၢၼ်ၵျႃႊၽျႅၼ်ႉၸိူဝ်းၼႆႉ ပၢႆႈၵႂႃႇၵူႈႁူးၵူႈတၢင်း။ မၢင်ၸိူဝ်း ၸိူဝ်းပဵၼ်ႁူဝ်ပဵၼ်တီး ဢၼ်မီးငိုၼ်းမီးၶမ်းဝႆႉၼမ်ၵေႃႈ ဢဝ်ငိုၼ်းမွၼ်သေ လႆႈပၢႆႈတၢင်းလီတၢင်းငၢမ်းသေတႃႉ ၸိူဝ်းထုၵ်ႇလွၵ်ႇလႅၼ်လႄႈသင် ၸိူဝ်းထူပ်းၽေးၵူၼ်းၵႃႉၶၢႆၵူၼ်းသေ ႁွတ်ႈမႃးတီႈမျႃႉဝတီႇၼႆႉတႄႉ ႁိုဝ်မီးသုၼ်ႇတိုဝ်ႉတၢင်းလီသင် ယူႇၵေႃႈဢမ်ႇလွတ်ႈ ပၢႆႈၵေႃႈ ဢမ်ႇပူၼ်ႉ။

ၵူၼ်းႁဵတ်းၵၢၼ်ၵျႃႊၽျႅၼ်ႉၸိူဝ်းၼႆႉ လႅၼ်ႈၸူးမိူင်းထႆးၵေႃႈ မီးတင်းၼမ်တင်းလၢႆသေ ၸိူဝ်းၽူင်ႉပၢႆႈၶဝ်ႈသွၼ်ႈဝႆႉ ၼႂ်းလႅၼ်လိၼ်မိူင်းၽႃဢၢင်ႇလႄႈသင် ၸိူဝ်းပၢႆႈၵႂႃႇယူႇတၢင်ႇဝၢၼ်ႈတၢင်ႇဝဵင်းၼႂ်းပတ်းပိုၼ်ႉမိူင်းႁူမ်ႈတုမ်မၢၼ်ႈၵေႃႈမီး။
ပိူင်လူင်မၼ်း ႁူဝ်ၼႃႈၸုမ်းၵျႃႊၽျႅၼ်ႉဢၼ်မီးႁႅင်းငိုၼ်းၼမ်ၸိူဝ်းၼႆႉ တေဢဝ်ငိုၼ်းမွၼ်သေ ပိုင်ႈယူႇၸွမ်းၸုမ်းဢၼ်မီးဢႃႇၼႃႇၼႂ်းပိုၼ်ႉတီႈ တီႈလႂ်တီႈၼၼ်ႈ ႁူဝ်ယွႆႈတႄႉ ဢမ်ႇႁူႉလႆႈငၢႆႈငၢႆႈၼႆ ၽူႈပၵ်းတႃပႂ်ႉတူၺ်းၶၢဝ်ႇၶဝ် ထတ်းသၢင်ၼင်ႇၼႆ။

မိူဝ်ႈ ပၢင်ယၼ်ႇသိုၵ်း 1027 ၼၼ်ႉတႄႉ ၵျႃႊၽျႅၼ်ႉဢၼ်ထင်ယူႇၼႂ်းမိူင်းတႆးပွတ်းႁွင်ႇ ၽူင်ႉပၢႆႈတင်းၼမ်တင်းလၢႆ ။ ၸိူဝ်းၶိုၼ်းၵႂႃႇၶွၼ်ႈ တီႈမျႃႉဝတီႇၵေႃႈမီး ။ ၵမ်းၼႆႉတႄႉ ဢမ်ႇႁူႉတေၵႂႃႇၶွၼ်ႈတီႈလႂ်ထႅင်ႈ ။

တေႃႈၼင်ႈ ပွတ်းတၢင်း မိူင်းၼွင် ၊ မိူင်းသူႈ ၊ လၢႆးၶႃႈ ၊ ၶူဝ်လမ် ၊ ၵုၼ်ႁဵင် ၊ တႃႈၶီႈလဵၵ်း ၸိူဝ်းၼႆႉၵေႃႈ ၸုမ်းၵျႃႊၽျႅၼ်ႉမႃးမူၵ်းယူႇဝႆႉ ၸဵမ်မိူဝ်ႈ လိူၼ်ဢေႊပရိူဝ်ႊလ်ပူၼ်ႉမႃးၼၼ်ႉ ။ ဢၼ်မူၵ်းယူႇၼႂ်းၵႄႈ ဢိူင်ႇ မိူင်းလိုမ်း လႄႈ ၼွင်တဝ်း ၸိူဝ်းၼႆႉၵေႃႈ မီး ။ ဢမ်ႇႁူႉႁူဝ်ၼပ်ႉတႅတ်ႈတေႃး ၸိူဝ်းဢၼ် ပႂ်ႉဢဝ်လွင်ႈႁူမ်ႇလူမ်ႈပၼ်ၶဝ်ၵေႃႈ ပဵၼ်ၸုမ်းဢၼ်ႁူမ်ႈႁွမ်းတင်းသိုၵ်းမၢၼ်ႈၵူၺ်းၼႆ ၵူၼ်းပိုၼ်ႉတီႈလၢတ်ႈ။

ဢၼ်ၾၢင်ႉမႅၼ်ႈတႄႉ ပေႃးၶဝ် ဢွၵ်ႇမိူင်းလိုမ်းမႃးႁႃသိုဝ်ႉ တၢင်းၵိၼ်တၢင်းယမ်ႉ ၼႂ်းဝၢၼ်ႈၼႂ်းဝဵင်းၼႆ သမ်ႉၶီႇၵႃး သႅၼ်းဢၼ်ၵႃႈၶၼ်ယႂ်ႇ ဢၼ်ၶိုၵ်ႉဢၼ်ၶႅမ်ႉၵမ်ႈၼမ် ။ မၢင်ပွၵ်ႈၵေႃႈ ၶဝ်သင်ႇၵိၼ်ၵူၺ်း တၢမ်တူဝ်ၶဝ်ဢမ်ႇဢွၵ်ႇမႃး ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ပွတ်းတၢင်း မိူင်းတႆးပွတ်းဢွၵ်ႇၸိူဝ်းၼႆႉၵေႃႈ ၸုမ်းၵျႃႊၽျႅၼ်ႉ တိုၵ်ႉလိူင်ႇၽႄႈဝႆႉ။ၼႆႉၵေႃႈ ၸုမ်းပျီႇတူႉၸိတ်ႉၶဝ် ဢဝ်ႁူမ်ႇလူမ်ႈပၼ်ၶဝ်ၵူၺ်းၼင်ႇၵဝ်ႇ ၼႆ ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈၼႄဝႆႉၼင်ႇၼႆ –
“ ၵူၼ်းတေႃႉသူင်ႇၸိူဝ်းၼႆႉ ပဵၼ်ပျီႇတူႉၸိတ်ႉလၢႆလၢႆယဝ်ႉ ။ ပျီႇတူႉၸိတ်ႉမိူင်းလဵၼ်း ဢၼ်ပႂ်ႉယူႇၸွမ်းသၢပ်ႇၼမ်ႉမူၺ်ၸိူဝ်းၼႆႉ ဢၼ်ၵိၼ်ၸၢင်ႈတေႃႉၶႄႇ ၼႆႉ ပဵၼ်ၶဝ်ၸိူဝ်းၼႆႉ ။ ဢၼ်တေႃႉၸွမ်း ပႃႇလဵဝ်း ၵဵင်းလၢပ်ႈ ၸိူဝ်းၼႆႉ။ မိူဝ်ႈၶၢဝ်း ဢၼ်ၶဝ်ၽဵဝ်ႈတီႈတႃႈၶီႈလဵၵ်းၼၼ်ႉ ဢၼ်ႁပ်ႉၶၢမ်ႇသေ ဢဝ်ၵႂႃႇလဵင်ႉဝႆႉၼၼ်ႉ ပဵၼ်ပျီႇတူႉၸိတ်ႉၾၢင်မိၼ် တီႈမၢၵ်ႇယၢင်း တီႈတႃႈၶီႈလဵၵ်းၼၼ်ႉၵူၺ်းၼႃႇ။ ဢဝ်ဝႆႉၸွမ်းၼႂ်းထိူၼ်ႇသေ ဢဝ်ႁူမ်ႇလူမ်ႈပၼ်ၸိူဝ်းၼႆႉၼၼ်ႉၼႃႇ ” – ဝႃႈၼႆ

ၸုမ်းၵျႃႊၽျႅၼ်ႉဢၼ်ဝႃႈၼႆႉ မၼ်းၵဵဝ်ႇၶွင်ႈၵၼ်လူင်ၵႂႃႇလၢႆလၢႆမိူင်းလႄႈ တေႁႂ်ႈမိူင်းႁူမ်ႈတုမ်မၢၼ်ႈၵႂၢတ်ႇလၢင်ႉၵူၺ်းတႄႉ တေဢမ်ႇမူတ်းဢမ်ႇသဵင်ႈလႆႈ ။ ၼႂ်းမိူင်းႁူမ်ႈတုမ်မၢၼ်ႈသမ်ႉ မႅၼ်ႈၽွင်းမိူင်းယုင်ႈလႄႈ ဢၼ်ၵိၼ်သူးၵိၼ်လၢပ်ႈၵၼ်ၵေႃႈၼမ်။ ၸင်ႇၼၼ်လႄႈ ၵူၼ်းႁဵတ်းၵၢၼ်ၵျႃႊၽျႅၼ်ႉ ၸိူဝ်းၼႆႉၵေႃႈ ဢမ်ႇတီႈၼိုင်ႈၵေႃႈ တီႈၼိုင်ႈ တိုၼ်းယူႇလွတ်ႈဝႆႉယူႇ ၼႆ ၵူၼ်းၼုမ်ႇၸၢႆး ႁဵတ်းၵၢၼ်တူင်ႇၵၢၼ်ၵေႃႉၼိုင်ႈလၢတ်ႈတၢင်းႁၼ်ထိုင်ၼင်ႇၼႆ။