ၶွမ်ႊပၼီႊ ၶုတ်းထၢၼ်ႇႁိၼ် တီႈဝဵင်းၵေးသီး တေႃႉထၢၼ်ႇႁိၼ်ဢွၵ်ႇၸူးတၢင်းဝဵင်းလႃႈသဵဝ်ႈၼၼ်ႉ ၼိုင်ႈဝၼ်း ၵႃးလူင်း 22 လေႃႉ မွၵ်ႇ 100 လမ်း သဵင်ၸၢၵ်ႈၵႃးၶိုၼ်ႈလူင်းမေႃးလင် တုမ်ႉတိူဝ်ႉၵူၼ်းပိုၼ်ႉတီႈ ဢမ်ႇၸၢင်ႈလပ်းၸၢင်ႈၼွၼ်း။

ၵႃးတၢင်ႇထၢၼ်ႇႁိၼ် လုၵ်ႉတီႈဢိူင်ႇမိူင်းၵၢဝ် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တေႃႉဢွၵ်ႇသူင်ႇၵႂႃႇတၢင်း ဝဵင်းလႃႈသဵဝ်ႈ တင်းဝၼ်းတင်းၶိုၼ်း ၼိုင်ႈဝၼ်းလႂ် ဢမ်ႇယွမ်း 100 လမ်း ႁဵတ်းႁႂ်ႈၵူၼ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ ဢမ်ႇလႆႈလိုဝ်ႈႁိူဝ်ႉ ၼွၼ်းလပ်းလီ ယွၼ်ႉသဵင်ၵႃးလင် ႁႅင်း။

ၵူၼ်းပိုၼ်ႉတီႈ ဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “ႁိူၼ်းယေး ၵူၼ်းဝၢၼ်ႈၸိူဝ်းယူႇသဝ်း ႁိမ်းတၢင်းၵႃးလူင် ၼၼ်ႉတႄႉ တိုၼ်းဝႃႈ ၼွၼ်းဢမ်ႇလပ်းလႆႈ။ သဵင်ၵႃးမေႃးႁႅင်းၼႃႇ။ ၵူၼ်းမိူင်းသမ်ႉ ၵၢင်ဝၼ်းလူဝ်ႇႁဵတ်းၵၢၼ် ႁႃၵိၼ်လဵင်ႉတွင်ႉ ၵၢင်ၶမ်ႈၵၢင်ၶိုၼ်းသမ်ႉ လူဝ်ႇလိုဝ်ႈႁိူဝ်ႉၼွၼ်းႁွမ်ႁႅင်း။ ၵႃးတၢင်ႇထၢၼ်ႇႁိၼ်သမ်ႉ တေႃႉထၢၼ်ႇႁိၼ်ၶိုၼ်ႈလူင်းတင်းဝၼ်းတင်းၶိုၼ်း။ ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်း ဢမ်ႇလႆႈ လပ်း လႆႈၼွၼ်း ”- ဝႃႈၼႆ။

ယၢမ်းလဵဝ် ၶွမ်ႊပၼီႊ ဢၼ်မႃးၶုတ်းထၢၼ်ႇႁိၼ်တီႈဝဵင်းၵေးသီးၼႆႉ ပဵၼ်ၶွမ်ႊပၼီႊႁိူဝ်ႈႁိူင်း ပူၼ်ႉမႃးၶၢဝ်းတၢင်း 2-3 ဝၼ်း ၼႆႉသမ်ႉ ၶွမ်ႊပၼီႊမႂ်ႇ ၶဝ်ႈမႃးထႅင်ႈ ဢၼ်ၼိုင်ႈ ယၢမ်းလဵဝ် တိုၵ်ႉတေႃႉဢဝ်ရူတ်ႉၵႃးၶဝ် မႃးဝႆႉတီႈႁိမ်းမေႃႇထၢၼ်ႇႁိၼ် ၼႂ်းဢိူင်ႇမိူင်းၵၢဝ် ၼၼ်ႉယူႇ ဝႃႈၼႆ။

“ၶွမ်ႊပၼီႊဢၼ်မႃးမႂ်ႇထႅင်ႈၼႆႉ ၸိုဝ်ႈဝႃႈႁိုဝ်ပႆႇႁူႉ တိုၵ်ႉမႃးလႆႈ 2-3 ဝၼ်းၵူၺ်း။ ယၢမ်းလဵဝ်တေႃႉဢဝ် ၶိူင်ႈၸၢၵ်ႈ ၵႃးၶဝ် ၸိူဝ်းၼႆႉ မႃးဝႆႉယဝ်ႉ။ တိုၵ်ႉႁဵတ်းသုမ်ႉႁဵတ်းသွင်း တႃႇၵူၼ်းႁဵတ်းၵၢၼ်ယူႇသဝ်းယူႇ။ ဢွင်ႈတီႈၶဝ်မႃးပၵ်းဝႆႉၼႆႉ တေယၢၼ်ၵၼ်တင်း ၶွမ်ႊပၼီႊႁိူဝ်ႈႁိူင်းၶုတ်းထၢၼ်ႇႁိၼ်ၼၼ်ႉ မွၵ်ႈ 1 လၵ်းၼႆႉၵူၺ်း”- ၵူၼ်းပိုၼ်ႉတီႈ ဝဵင်းၵေးသီး သိုပ်ႇ လၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈၶတ်းၸႂ်ၵပ်းသိုပ်ႇတူၺ်းတၢင်းၶွမ်ႊပၼီႊယူႇၵေႃႈ ၵပ်းသိုပ်ႇဢမ်ႇလႆႈ။

ၵူၼ်းပိုၼ်ႉတီႈ ဢွၼ်ၵၼ် မႆႈၸႂ် သင်ဝႃႈ ၶွမ်ႊပၼီႊ ဢွၼ်ၵၼ်ၶဝ်ႈမႃးၶုတ်းထၢၼ်ႇႁိၼ်ၼမ် တီႈဝဵင်းၵေးသီးၼႆႉၸိုင် တိုၼ်း တေမီးလွင်ႈတုမ်ႉတိူဝ်ႉ မႄႈၼမ်ႉ သိင်ႇဝႅတ်ႉလွမ်ႉလႄႈ လိၼ်သူၼ်ႁႆႈၼႃး ႁၢဝ်ႈႁႅင်း။

ၽူႈတူင်ႉၼိုင် တူင်ႇဝူင်းၵူၼ်း ဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ မၼ်းပဵၼ်ၶၢဝ်းၾူၼ်လႄႈ ၼမ်ႉၼႆႉ တိုၵ်ႉၼမ်ယူႇ သင်ဝႃႈ ၶၢဝ်းႁႅင်းမႃးတႄႉ ၼမ်ႉၼႆႉ တိုၼ်းတေႁဵတ်းၵမ်းလဵဝ်ယဝ်ႉ ယွၼ်ႉဝႃႈ ၶဝ်မႃးၶုတ်းထၢၼ်ႇႁိၼ်ၼႆႉ တိုၼ်းတေတုမ်ႉတိူဝ်ႉသၢႆၼမ်ႉၼၼ်ႉ ဢမ်ႇႁၢင်ႉ” – ဝႃႈၼႆ။

ၶွမ်ႊပၼီႊႁိူဝ်ႈႁိူင်း ဢၼ်ၶဝ်ႈမႃးၶုတ်းထၢၼ်ႇႁိၼ် တီႈဝဵင်းၵေးသီးၼႆႉသမ်ႉ ပဵၼ်တၢင်းၾၢႆႇတူၵ်း ဝၢၼ်ႈမႆႉႁူင်းလိူင် ၼႂ်းဢိူင်ႇ မိူင်းၵၢဝ်။ ဢွင်ႈတီႈၼၼ်ႉသမ်ႉ ယၢမ်းလဵဝ် သိုၵ်းမၢၼ်ႈတပ်ႉၶလယ 286 ဢဵၼ်ႁႅင်းမွၵ်ႈ 30-40 ၼႆႉ ဢဝ်ႁူမ်ႇလူမ်ႈဝႆႉပၼ် ၼႆ ယဝ်ႉ။

ထၢၼ်ႇႁိၼ် တီႈဢိူင်ႇမိူင်းၵၢဝ်ၼႆႉ ပေႃးဢဝ်ဢေႊၶိူဝ်ႊမၼ်းဝႃႈၸိုင် တေမီး 500 ဢေႊၶိူဝ်ႊပၢႆ။ ထၢၼ်ႇႁိၼ်ဢၼ်ၶုတ်းဢွၵ်ႇ ယၢမ်းလဵဝ်ၼႆႉသမ်ႉ ၵမ်ႈၼမ် တေႃႇသူင်ႇၸူးတၢင်းလႃႈသဵဝ်ႈ။ ၵေးသီး – လႃႈသဵဝ်ႈၼႆႉသမ်ႉ ယၢၼ်ၵၼ် မွၵ်ႈ 100 လၵ်း။ ပေႃး ပဵၼ်ၵႃးလူင် 22 လေႃႉသမ်ႉ တေၸႂ်ႉၶၢဝ်းယၢမ်းႁေႃႈ ႁိုင် မွၵ်ႈ 4 ၸူဝ်ႈမူင်း။ ပေႃးပဵၼ်ၵႃးဢွၼ်ႇ သုၼ်ႇတူဝ်သမ်ႉ တေႁိုင် မွၵ်ႈ 2 ၸူဝ်ႈမူင်းၶိုင်ႈ ၼႆယဝ်ႉ။

ထၢၼ်ႇႁိၼ်ၼႆႉ သင်ဝႃႈ သိုပ်ႇၶုတ်းၵႂႃႇထႅင်ႈၸိုင် တေတုမ်ႉတိူဝ်ႉ မႄႈၼမ်ႉႁႅၼ် ဢၼ်လေႃႇလဵင်ႉတူင်ႈႁႆႈၼႃး ၵူၼ်းမိူင်း ၼပ်ႉ ႁူဝ်ပၢၵ်ႇဢေႊၶိူဝ်ႊ တေလူႉၵွႆဢမ်ႇႁၢၼ်ႉ။  

မႄႈၼမ်ႉႁႅၼ်ၼႆႉ ပဵၼ်မႄႈၼမ်ႉ လေႃႇလဵင်ႉတူင်ႈၼႃး ၵူၼ်းမိူင်းၵေးသီးဝႆႉ ႁူဝ်မၼ်းမီးတီႈဝၢၼ်ႈၽိူင်း လႆလူင်းမႃးလဵင်ႉတူင်ႈ ၼႃး တၢင်းၼွင်သွမ်း – မိူင်းၵၢဝ် – သူၼ်မွၼ်း – ဢိူင်ႇမိူင်းၼိမ် – ၵေးသီး လႆလူင်းၵႂႃႇတၢင်း ဝၢၼ်ႈၽုၺ်း – ၼႃးလွႆ – ၶူဝ် လွင်း ၸိူဝ်းၼၼ်ႉ။

ၼင်ႇႁိုဝ် တေဢမ်ႇမီးမႃး လွင်ႈၶုတ်းထၢၼ်ႇႁိၼ်ၼႆႉ မိူဝ်ႈဝၼ်းတီႈ 6/11/2018 ၼၼ်ႉ ၵူၼ်းမိူင်းၵေးသီးတင်း ၽူႈယႂ်ႇၵူၼ်း လူင် ၽူႈမီးပုၼ်ႈၽွၼ်း မိူၼ်ၼင်ႇ ႁွင်ႈၵၢၼ်လူင်ပွင်ၸိုင်ႈ ၾၢႆႇၽူႈၵွၼ်းၸႄႈဝဵင်းၵေးသီး၊ ႁွင်ႈၵၢၼ်ၾၢႆႇတႅၵ်ႈၼႃႈလိၼ်၊ ႁွင်ႈၵၢၼ်ၾၢႆႇၽုၵ်ႇသွမ်ႈ၊ ႁွင်ႈၵၢၼ်ၾၢႆႇပႃႇမႆႉ၊ ႁွင်ႈၵၢၼ်ၾၢႆႇလိူမ်ႈလႆႇလႄႈ ၶွမ်ႊမတီႊၾၢႆႇၵူတ်ႇထတ်း ၸိူဝ်းၼႆႉ ႁူပ်ႉထူပ်း ဢုပ်ႇဢူဝ်းၵၼ် တီႈဝတ်ႉဝိႁၢရ်လူင် မိူင်းၵၢဝ်သေ ၵူၼ်းမိူင်းႁူမ်ႈၵၼ် တုၵ်းယွၼ်း ဢဝ်ၶိုၼ်းတီႈလိၼ်ၼႆႉ ဝႃႈၼႆ။