ပၢင်တိုၵ်း တီႈဝဵင်းၵူတ်ႉၶၢႆ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း ၼႂ်းဢိူင်ႇၼမ်ႉၽၵ်းၵႃ ႁဵတ်းႁႂ်ႈၵူၼ်းပိုၼ်ႉတီႈ မီးလွင်ႈမၢတ်ႇ ၸဵပ်းလူႉတၢႆၸွမ်း ၵမ်ႈၽွင်ႈ။

ၼႂ်းလိူၼ်သႅပ်ႊထႅမ်ႊပိူဝ်ႊ 2023 မႃးၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်း TNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၸႄႈဝဵင်းၵူတ်ႉၶၢႆတင်း ၸႄႈဝဵင်းမူႇၸေႊသေ ၸၢၵ်ႇမၢၵ်ႇတိူဝ်ႉသႂ်ႇၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ ၸႄႈဝဵင်း ၵူတ်ႉၶၢႆ ၸိုင်ႈတႆး ပွတ်းႁွင်ႇ လူႉတၢႆ 6 ၵေႃႉ မၢတ်ႇၸဵပ်း 10 ပၢႆ ၼႆယဝ်ႉ။

ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းလိူၼ်ၼႆႉၵူၺ်း ၵူၼ်းၼႂ်းဢိူင်ႇၼမ်ႉၽၵ်းၵႃ ႁဝ်းၶႃႈ ၺႃးၸၢၵ်ႇမၢၵ်ႇ သိုၵ်းမၢၼ်ႈ – သိုၵ်းလွႆ ယိုဝ်းမႃးၼၼ်ႉ တိူဝ်ႉသႂ်ႇ လူႉတၢႆၵႂႃႇ 6 ၵေႃႉယဝ်ႉ မၢတ်ႇၸဵပ်း ဢမ်ႇယွမ်း 10 ယဝ်ႉ။ ၼႂ်းၼၼ်ႉ တႃႇၵေႃႉ ၼိုင်ႈ တိူဝ်ႉၺႃးမၢတ်ႇၸဵပ်းႁႅင်း။ ယဝ်ႉၵေႃႈ ၽူႈၸၢႆး ၸၢဝ်းၶႄႇ ဢႃယု 40 ပၢႆ ၵေႃႉၼိုင်ႈ ၵႂႃႇၽႃႇၺႃးမၢၵ်ႇမႅင်း တီႈႁိမ်းတပ်ႉ ၵဝ်ႇ သိုၵ်းမၢၼ်ႈ မၢႆ 45 တီႈၼမ်ႉၽၵ်းၵႃၼႆႉ လႆႈတိူဝ်ႉမၢတ်ႇၸဵပ်းဝႆႉ။ ၸွမ်းၼင်ႇ ဢၼ်ႁဝ်းၶႃႈ လႆႈႁပ်ႉႁူႉၶေႃႈမုလ်းဝႆႉတႄႉ ၵမ်ႈ ၼမ် တေပဵၼ်မၢၵ်ႇသိုၵ်းမၢၼ်ႈ ယိုဝ်းသႂ်ႇ”- ဝႃႈၼႆ။

ဝၼ်းတီႈ 26 ယၢမ်းၵၢင်ဝၼ်း 12 မူင်းထိုင် 4 မူင်းဝၢႆးဝၼ်းၼႆႉ သိုၵ်းမၢၼ်ႈ တပ်ႉၶလယ 123 တင်း သိုၵ်း TNLA ပဵၼ်ပၢင် တိုၵ်းၵၼ်ထႅင်ႈ တၢင်းၾၢႆႇတူၵ်းဢိူင်ႇၼမ်ႉၽၵ်းၵႃ သွင်ၾၢႆႇၸႂ်ႉၵွင်ႈလူင် ပိုတ်းယိုဝ်းၵၼ် ႁၢဝ်ႈႁႅင်း။

“မိူဝ်ႈဝႃးၼႆႉ သိုၵ်းလွႆ ယူႇၼႂ်းထိူၼ်ႇတၢင်းၾၢႆႇတူၵ်းၼမ်ႉၽၵ်းၵႃသေ ပွႆႇမၢၵ်ႇလူင်ၸူးသိုၵ်းမၢၼ်ႈ တီႈတပ်ႉ 123 ၼႆႉ မၢၵ်ႇလူင် ၶဝ်မႃးတူၵ်းႁိမ်းႁိူၼ်းၶႃႈၼႆႉ 2 လုၵ်ႈ ၸၢၵ်ႇမၢၵ်ႇသဵၼ်မႃးၽႅဝ်ၼႂ်းဝၢင်းႁိူၼ်းၶႃႈၼႆႉဢေႃႈ။ လိူဝ်ၼၼ်ႉ သိုၵ်းမၢၼ်ႈၼႆႉ လုၵ်ႉတီႈ တပ်ႉၶဝ်ၼႆႉသေ ပွႆႇမၢၵ်ႇၸူးသိုၵ်းလွႆၶဝ် ၵႂႃႇၵူႈႁူးၵူႈတၢင်းၶႃႈယဝ်ႉ။ ၵူၼ်းပိုၼ်ႉတီႈ မႆႈၸႂ်ၵူဝ်သေ ဢွၼ်ၵၼ်ပၢႆႈၶဝ်ႈၼႂ်းလုၵ်း လိၼ်/ လုၵ်းပႅမ်ႇၵၼ် ဝၢၼ်ႈပေႃးႁၢမ်းၶႃႈဢေႃႈ။ သႅင်ၶၢႆႇၶူဝ်းၸိူဝ်းၼႆႉၵေႃႈ ပိၵ်ႉဢိုတ်းမူတ်းၶႃႈ”-  ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ သိုပ်ႇလၢတ်ႈၼႄၼင်ႇၼႆ။

ၼႂ်းဝၼ်းတီႈ 26 ယၢမ်းဝၢႆးဝၼ်းၼႆႉ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ ၽူႈၸၢႆး ဢႃယု 35 ပီ ၵေႃႉ ၼိုင်ႈ (ၸၢဝ်းၶၢင်) ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃၵူတ်ႉၶၢႆ ၼႆယဝ်ႉ။

“မိူဝ်ႈၼႆႉတႄႉ ယဵၼ်ဝႆႉၶႃႈဢေႃႈ တီႈဢိူင်ႇၼမ်ႉၽၵ်းၵႃၼႆႉ။ ၵူၼ်းမိူင်းတႄႉ ၵႂႃႇမႃးၵၼ်ဢိတ်းဢွတ်းယူႇ ယွၼ်ႉလူဝ်ႇႁႃၵိၼ်လဵင်ႉ တွင်ႈၶႃႈလူး။ လွင်ႈၶဵင်ႈၶႅင်ၵၢၼ်သိုၵ်းၶဝ်တႄႉ တိုၵ်ႉမီးယူႇၶႃႈ”-  ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်း ၵႃ သိုပ်ႇလၢတ်ႈၼႄၼင်ႇ ၼႆ။

ပူၼ်ႉမႃး မိူဝ်ႈဝၼ်းတီႈ 25 ယၢမ်းၵၢင်ၶိုၼ်းမွၵ်ႈ 11 မူင်းၼၼ်ႉ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း လမ်းၼိုင်ႈ မႃး ပိုတ်းယိုဝ်း သိုၵ်း TNLA တၢင်းႁိမ်းဝၢၼ်ႈၶူဝ်မုင်း ၸႄႈဝဵင်းၵူတ်ႉၶၢႆ ယဝ်ႉၵေႃႈ တၢင်းဢိူင်ႇၸေႊလၢၼ်ႉလႄႈ ဢိူင်ႇမေႃႈတွင်း ၼႂ်းၸႄႈဝဵင်းမူႇၸေႊ ၸိူဝ်းၼၼ်ႉထႅင်ႈ။

တႄႇဢဝ် ဝၼ်းတီႈ 23/7/2023 ၼၼ်ႉမႃးသေ သိုၵ်းမၢၼ်ႈတင်း သိုၵ်း TNLA ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်း ၸႄႈဝဵင်းမူႇၸေႊ၊ ၵူတ်ႉၶၢႆလႄႈ မိူင်းၵုတ်ႈ ၸိူဝ်းၼႆႉ ဢမ်ႇယွမ်း 50 ပွၵ်ႈယဝ်ႉ ႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်း TNLA ဢွၵ်ႇဝႆႉ ၼင်ႇၼႆ။