လွင်ႈသိုၵ်းမၢၼ်ႈယိုတ်းမိူင်းၼႆႉၵူၼ်းမိူင်းတင်းၸိုင်ႈမိူင်း (ၸိူဝ်းဢမ်ႇၸႂ်ႈ ၶိူဝ်းသိုၵ်းမၢၼ်ႈၼၼ်ႉ) ဢမ်ႇယွမ်းႁပ်ႉ ဢမ်ႇလႆႈၸႂ်ၸဝ်ႈဢႃႇၼႃႇသိုၵ်းလႄႈ ဢွၼ်ၵၼ်သၢၼ်ၶတ်းသိုၵ်းမၢၼ်ႈလူၺ်ႈလၢႆးၽႂ်မၼ်း ၵမ်ႈၽွင်ႈယိပ်းၵွင်ႈၵၢင်ႇ တိုၵ်းယိုဝ်း ၵမ်ႈၽွင်ႈသမ်ႉ ႁႃငိုၼ်းၵမ်ႉၸွႆႈ ၵမ်ႈၽွင်ႈသမ်ႉ တႅမ်ႈလွင်ႈသိုၵ်းမၢၼ်ႈဢမ်ႇလီသေ တၢင်ႇဢွၼ်ႊလၢႆႊ၊ ၼႂ်းလိူၼ်ၼႆႉၵူၺ်းသိုၵ်းမၢၼ်ႈတီႉၺွပ်းၵူၼ်းတႅမ်ႈတၢင်ႇဢွၼ်ႊလၢႆႊ ဢမ်ႇယွမ်း 30 ၵေႃႉယဝ်ႉ ႁွင်ႈၵၢၼ်ၾၢႆႇ ပိုၼ်ၽၢဝ်ႇ သိုၵ်းမၢၼ်ႈ ဢွၵ်ႇဝႆႉၼင်ႇၼႆ။
ႁွင်ႈၵၢၼ်ၶၢဝ်ႇ မျႅၼ်ႇမႃႉဢလိၼ်း ၶွင်ၸုမ်းသိုၵ်းမၢၼ်ႈ ပိုၼ်ၽၢဝ်ႇဝႆႉဝႃႈ – “ ၼႂ်းလိူၼ် သႅပ်ႊထိမ်ႊပိူဝ်ႊၼႆႉ တီႉၺွပ်း ၵုမ်းၶင်ၵူၼ်းမိူင်းၸိူဝ်းယူႇၼႂ်း တိူင်းတႃႈၵုင်ႈ ၊ တိူင်းဢေႊရႃႊဝတီႊ ၊ တိူင်းမၼ်းတလေး ၊ တိူင်းၸႄႈၵႅင်း ၊ ၸႄႈမိူင်းမွၼ်း ၊ ၸႄႈမိူင်းရၶႅင်ႇလႄႈ မိူင်းတႆး တင်းသဵင်ႈႁူဝ်ၵူၼ်း 30 ပၢႆ ၼႂ်းၼၼ်ႉ ၵူၼ်းမိူင်းတႆး ပႃးၵေႃႉၼိုင်ႈ ”- ဝႃႈၼႆဝႆႉ။
မိူဝ်ႈဝၼ်းတီႈ 19 လိူၼ်ၵျုၼ်ႊပူၼ်ႉမႃးၼႆႉၵေႃႈ မႅၼ်ႈဝၼ်းၵိူတ်ႇၼၢင်းဢွင်ႇသၢၼ်းၸူႉၵျီႇ ၵူၼ်းၸၢႆး ၸၢဝ်းၼွင်ၵေႃႉၼိုင်ႈ တီႈထုင်ႉၼွင်ႁၢႆးယႃႈ တၢင်ႇႁၢင်ႈမွၵ်ႇမၼ်းမူၺ် ၼိူဝ်ဢွၼ်ႊလၢႆႊၼႆသေ သိုၵ်းမၢၼ်ႈၶဝ်ႈတီႉၺွပ်း မၼ်းၸၢႆး ထိုင်ၼႂ်းႁိူၼ်းၼႂ်းယေး။
ၵူၼ်းၼႂ်းပိုၼ်ႉတီႈၼွင်ႁၢႆးယႃႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၶဝ်ၼႄးဝႃႈ မၼ်းတၢင်ႇႁၢင်ႈမွၵ်ႇ ၼႂ်းဝၼ်းၵိူတ်ႇၼၢင်းဢွင်ႇသၢၼ်းၸူႉၵျီႇၼႆလႄႈ မႃးၺွပ်းၼႆဢေႃႈ ။ ထိုင်မိူဝ်ႈလဵဝ် ပႆႇပွႆႇပၼ်ၶိုၼ်း ” – ဝႃႈၼႆ။
ၵူၼ်းၸၢႆးဢၼ်ၺႃးၺွပ်းၼႆႉ မိူဝ်ႈလဵဝ်မီးဝႆႉတီႈ လုမ်းပလိၵ်ႈၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး။
ၼႂ်းၶေႃႈပိုၼ်ၽၢဝ်ႇသိုၵ်းမၢၼ်ႈဢွၵ်ႇဝႆႉဝႃႈ – “ ၵူၼ်းၸိူဝ်းဢၼ် တႅမ်ႈတၢင်ႇလွင်ႈၵၢၼ်မိူင်း၊ လွင်ႈသိုၵ်းမၢၼ်ႈဢမ်ႇလီ ၊ ၵူၼ်းၸိူဝ်း တႅမ်ႈ ၊ လၢတ်ႈ သေႃႇသူၼ်းႁႂ်ႈဝၢၼ်ႈမိူင်းသုၵ်းယုင်ႈၼႆႉ ၽိတ်းပၵ်းပိူင် မတ်ႉတႃ 52 (ၵ) ၊ (ရာဇသတ်ကြီး ) မတ်ႉတႃ 124 လႄႈ မတ်ႉတႃ 505 – ၵ ၸိူဝ်းၼႆႉ ၊ လိူဝ်ၼၼ်ႉ ၽိတ်းမၢႆမီႈဢီႊလႅၵ်ႊထရေႃႊၼိတ်ႊ (အီလက်ထရောနစ် ဆက်သွယ်ဆောင်ရွက်ရေး) မတ်ႉတႃ 33 (ၵ) ၸဵမ်ၸိူဝ်းၼႆႉ ” ၼႆ လွၵ်ႇငိုတ်ႈဝႆႉၸိူင်ႉၼႆ။
တႄႇဢဝ် ဝၼ်းတီႈ 1 လိူၼ်ၾႅပ်ႊပိဝ်ႊရီႊ ပီ 2021 ၼၼ်ႉမႃး သိုၵ်းမၢၼ်ႈယိုတ်းမိူင်း တီႉၺွပ်းၵုမ်းၶင်ၵူၼ်းမိူင်းဝႆႉ 24,832 ၵေႃႉ ။ ၵူၼ်းၸိူဝ်းၺႃးၶႃႈတၢႆ 4,100 ၊ ၸိူဝ်းၺႃးၵုမ်းၶင်ဝႆႉမီး 19,260 ၵေႃႉ ၼႆ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း AAPP ပိုၼ်ၽၢဝ်ႇဝႆႉၼင်ႇၼႆ။
