ဝၼ်းတီႈ 1 – 2 /5/2018 ၼႆႉ ဢူးတဵင်းၸေႃႇ ဢွၼ်ႁူဝ် ၸုမ်းၶွမ်ႊမသျိၼ်ႊ ငမ်းယဵၼ် သေ ၵႂႃႇ ၼွၼ်းတီႈ ငဝ်းငုၼ်းဝၢၼ်ႈႁႆးၶိုၼ်းၼိုင်ႈ။ သွင်ၾၢႆႇႁူပ်ႉဢုပ်ႇၵၼ်၊ ပႃႇတီႇမႂ်ႇသုင်ၸိုင်ႈတႆး တုၵ်းယွၼ်း တီႈပၢင်ၵုမ်ဝႃႈ ၼႂ်းၶၵ်ႉၵၢၼ်လွင်ႈငမ်းယဵၼ်ၼၼ်ႉ ႁႂ်ႈၵူႈမူႇၵူႈၸုမ်းလႆႈၶဝ်ႈႁူမ်ႈပႃး ဝႃႈၼႆ။
ၶၢဝ်းတၢင်းၼၼ်ႉ ၾၢႆႇဢူးတဵင်းၸေႃႇ ၵႅမ်ႁူဝ်ပဝ်ႈ ၶွမ်ႊမသျိၼ်ႊငမ်းယဵၼ် PC ဢုပ်ႇလၢတ်ႈ လွင်ႈ ၽွၼ်းလီ ဢၼ်လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း လႄႈ ဢၼ်ဢမ်ႇၵိုတ်းတိုၵ်း၊ ငဝ်းလၢႆး ၶၵ်ႉၵၢၼ်လွင်ႈငမ်းယဵၼ် ၸိူဝ်းၼႆႉ။ ၾၢႆႇပႃႇတီႇမႂ်ႇသုင်ၸိုင်ႈတႆးသမ်ႉ ၵႅမ်ႁူဝ်ပဝ်ႈ 2 ၸွမ်ႁၢၼ်ၶုၼ် သႅင် လၢတ်ႈၸူး ၶွမ်ႊမသျိၼ်ႊငမ်းယဵၼ် PC ဝႃႈ ႁႂ်ႈၵူႈမူႇၵူႈၸုမ်းလႆႈၶဝ်ႈႁူမ်ႈပႃးၼႂ်းၶၵ်ႉၵၢၼ် လွင်ႈငမ်းယဵၼ် သေ ဢမ်ႇၵႃး ႁႂ်ႈလူင်ပွင်ၸိုင်ႈ ၵမ်ႉထႅမ်ၸွႆႈ ၵၢၼ်ပူၵ်းပွင်ပိုၼ်ႉတီႈ ၶိုၼ်ႈယႂ်ႇမႂ်ႇသုင်။
ၵဵဝ်ႇၵပ်းပၢင်ႁူပ်ႉထူပ်းၼႆႉသေ ၽူႈၼမ်းၼႂ်း 2 ၊ ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး ၸဝ်ႈသိုၵ်းၸၢႆး သုလၢတ်ႈဝႃႈ – လွင်ႈႁူပ်ႉထူပ်းၵၼ်ၼႆႉ တေလႆႈဝႃႈ ၶႅမ်ႉလႅပ်ႈယူႇ၊ ၵဵဝ်ႇၵပ်း NCA ၵေႃႈ ႁႂ်ႈလႆႈၶဝ်ႈပႃးၵူႈ မူႇၵူႈၸုမ်းၼၼ်ႉၼႃႇ။ ၵဵဝ်ႇၵပ်း ပၼ်ႁႃၵၢၼ်မိူင်းၵေႃႈ ႁႂ်ႈလႆႈဢဝ်ၵၢၼ်မိူင်းသေ ၵႄႈလိတ်ႈ၊ ၵဵဝ်ႇၵပ်း ဢၼ် ဢဝ်ၵၢၼ်သိုၵ်းၵႄႈလိတ်ႈၸိူဝ်းၼႆႉ ယွၼ်ႇယၢၼ်းလႆႈၵႃႈႁိုဝ်ၵေႃႈ ႁႂ်ႈလႆႈယွၼ်ႇယၢၼ်း တင်းသွင် ၾၢႆႇ။ တႃႇတွပ်ႇတႅၼ်းၵုင်ႇမုၼ် ပေႃႈမႄႈၵူၼ်းမိူင်း သေ သၢင်ႈလွင်ႈ ၼႃႈလိၼ်ၶိုၼ်ႈယႂ်ႇၼၼ်ႉ သွင်ၾၢႆႇ ႁႂ်ႈၸၢင်ႈႁူမ်ႈႁွမ်းၵၼ် ပူၵ်းပွင် – ၸဵမ်ၸိူဝ်းၼႆႉ။
လိူဝ်ၼၼ်ႉ သွင်ၾၢႆႇ ယင်းလႆႈၸႂ် ႁၼ်လီ ဝႃႈ ႁႂ်ႈလႆႈ ၵႆႉမီး၊ ၵႆႉႁဵတ်းပၢင်ႁူပ်ႉထူပ်းၵၼ်ၵႂႃႇ ၶပ်ႉၶပ်ႉ တၢမ်း တၢမ်း – ဝႃႈၼႆ။
ယူႇတီႈၽူႈယူႇၵၢင် ၸွႆႈၶပ်းၶိုင်ပွင်ပဵၼ်ပၢင်ႁူပ်ႉထူပ်း ၵေႃႉပဵၼ်ႁူဝ်ပဝ်ႈ ပႃႇတီႇ သိူဝ်ၽိူၵ်ႇ လုင်းၸၢႆးဢၢႆႈ ပဝ်းၵေႃႈ ယင်းတုၵ်းယွၼ်းၼႂ်းပၢင်ၵုမ်ဝႃႈ – ႁႂ်ႈၶွမ်ႊမသျိၼ်ႊ ငမ်းယဵၼ် ၸွႆႈသၢင်ႈၶပ်းၶိုင်ပၼ် ဢၼ် ပႃႇတီႇမႂ်ႇသုင်ၸိုင်ႈတႆး တုၵ်းယွၼ်း၊ ပိူဝ်ႈတႃႇ ၵေႃႇသၢင်ႈလႆႈလွင်ႈယုမ်ႇယမ် ႁႂ်ႈပေႃး ပဵၼ်လွင်ႈ ၵမ်ႉထႅမ်ၵၢၼ်ငမ်းယဵၼ်ၵႂႃႇ – ဝႃႈၼႆ။
