ၸုမ်းဢူၺ်းလီပွတ်းႁွင်ႇ ပိုတ်းယိုဝ်းၵၼ်ၶိုၼ်း တီႈဝဵင်းၵူတ်ႉၶၢႆ

မိူဝ်ႈၼႆႉ ဝၼ်းတီႈ 23/9/2023 ယၢမ်းဝၢႆးဝၼ်းမွၵ်ႈ 1 မူင်းၶိုင်ႈ TNLA တင်း SSPP ပိုတ်းယိုဝ်းၵၼ် တၢင်း ၾၢႆႇႁွင်ႇဝၢၼ်ႈၽႃပႅၼ်ႈ ဢိူင်ႇမိူင်းယူႉ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တင်းသွင်ၾၢႆႇ မီးလွင်ႈ မၢတ်ႇၸဵပ်း ၼင်ႇၵၼ်။

ၽူႈမီးပုၼ်ႈၽွၼ်းတင်းသၢႆထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတၢင်းမၼ်းပဵၼ်ၼႆ ၵူၼ်းႁဝ်း လတ်း ၵႂႃႇတၢင်းပုၼ်ႉ ။ သိုၵ်းလွႆပႂ်ႉယိုဝ်း သၢႆသိုၵ်းႁဝ်းလႄႈ သွင်ၾၢႆႇလႆႈပိုတ်းယိုဝ်းၵၼ်ၶႃႈဢေႃႈ။ တင်းၾၢႆႇႁဝ်းလႆႈတိူဝ်ႉမၢတ်ႇၸဵပ်း 2 ၵေႃႉ ဢမ်ႇထိုင်တီႈလႆႈမႆႈၸႂ် ။ တၢင်းၾၢႆႇၶဝ်ၵေႃႈ မီးလွင်ႈမၢတ်ႇၸဵပ်း လူႉတၢႆ ။ ၵူၺ်းၵႃႈ ပႆႇႁူႉႁူဝ်ၼပ်ႉတႅတ်ႈတေႃး ။ တိုၵ်ႉၵဵပ်းၶေႃႈ မုလ်းယူႇ”- ဝႃႈၼႆ။

မိူဝ်ႈဝႃး ဝၼ်းတီႈ 22 သိုၵ်း TNLA တပ်ႉၸုမ်း 5 မႃးၼွၼ်းတီႈဝၢၼ်ႈပၢင်ႇ ဝဵင်းၵူတ်ႉၶၢႆ ။ ထိုင်မႃး မိူဝ်ႈၼႆႉ ဝၼ်းတီႈ 23 တင်းသွင်ၾၢႆႇ ပဵၼ်ပၢင်တိုၵ်းၵၼ်မႃး တၢင်းၾၢႆႇႁွင်ႇဝၢၼ်ႈၽႃပႅၼ်ႈလႄႈ ၾၢႆႇၸၢၼ်းဝၢၼ်ႈပၢင်ႇ ၼႂ်းဢိူင်ႇမိူင်းယူႉ ၸႄႈဝဵင်းၵူတ်ႉၶၢႆ။

သိုၵ်း TNLA တင်း SSPP ၼႆႉ ပဵၼ်ၸုမ်းဢူၺ်းလီၵၼ် ။ ပဵၼ်လုၵ်ႈၸုမ်း ၼႂ်း FPNCC ဢၼ်တပ်ႉသိုၵ်းဝႃႉ UWSA ဢွၼ်ႁူဝ်ဝႆႉ ၼင်ႇၵၼ်။ လုၵ်ႈၸုမ်း FPNCC ပဵၼ် သိုၵ်း SSPP ၊ မိူင်းလႃး NDAA ၊ ဝႃႉ UWSA ၊ ၵူဝ်းၵၢင်ႉ MNDAA ၊ ၶၢင် KIA ၊ လွႆတဢၢင်း TNLA လႄႈ ရၶၢႆႇ AA ၸိူဝ်းၼႆႉ။

လိူဝ်ၼၼ်ႉ တႄႇဢဝ် ဝၼ်းတီႈ 17/9/2023 ၼႆႉမႃး သိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉ ႁူမ်ႈၵၼ် ပဵၼ်ပၢင်တိုၵ်း တင်း သိုၵ်း TNLA မႃးႁၢဝ်ႈႁႅင်း တီႈဢိူင်ႇၸေႊလၢၼ်ႉတင်း ဢိူင်ႇတိုင်းလူင် ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ် လိၼ်တႆး – ၶႄႇ ႁဵတ်းႁႂ်ႈၵူၼ်းမိူင်းပၢႆႈၽေးသိုၵ်း ၼပ်ႉႁူဝ်ပၢၵ်ႇ ၼႆယဝ်ႉ။