မိူဝ်ႈၼႆႉ ဝၼ်းတီႈ 22/9/2023 ယၢမ်းၵၢင်ဝၼ်းမွၵ်ႈ 11 မူင်း ပလိၵ်ႈမၢၼ်ႈ ၾၢႆႇၵူတ်ႇထတ်းရူတ်ႉၵႃး ၵေႃႉၼိုင်ႈ ထုၵ်ႇယိုဝ်း တၢႆထင်တီႈ ႁိမ်းဝတ်ႉပုၵ်ႉတယူင်ႇ ပွၵ်ႉ 4 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ပလိၵ်ႈမၢၼ်ႈ ၾၢႆႇၵူတ်ႇထတ်းရူတ်ႉၵႃးၶႃႈဢေႃႈ ၺႃးယိုဝ်း တၢႆထင်တီႈ မၢၵ်ႇၵွင်ႈယိုဝ်းတိူဝ်ႉသႂ်ႇၼႃးဢူၵ်းမၼ်း 2 လုၵ်ႈ တီႈပွၵ်ႉ 4 ၼႆႉၶႃႈ။ ဢၢႆႈပလိၵ်ႈၵေႃႉၼႆႉ မၼ်းတိုၼ်းၸွမ်းလမ်း တီႉၺွပ်းပိူၼ်ႈသေႇသေႇ ၶႃႈယဝ်ႉ ပေႃးပိူၼ်ႈႁေႃႈၵႃးၶၢမ်ႈၾႆးလႅင် ၸိူင်ႉၼႆ။ ၼႆႉၵေႃႈ ၵႃးလမ်းၼိုင်ႈ ၶၢမ်ႈၾႆးလႅင်ၵႂႃႇ မၼ်းသမ်ႉ လမ်းၸွမ်း ၵႂႃႇယွမ်းငိုၼ်းပိူၼ်ႈ ၸိူင်ႉၼႆသေ လႅပ်ႈမၼ်းတေယွၼ်းငိုၼ်းၼမ်လႄႈ ၶဝ်တေငူပ်ႉငီႉၵၼ် ဢမ်ႇလႆႈလႄႈ မၼ်း တေႁဵတ်းႁႂ်ႈပိူၼ်ႈၸႂ်လမ်သေ ဢဝ်ၵွင်ႈယိုဝ်းသႂ်ႇပၼ်မၼ်းၸိူင်ႉၶႃႈဢေႃႈ”- ဝႃႈၼႆ။

ယၢမ်းလဵဝ် ၶၢပ်ႈတူဝ်တၢႆ ပလိၵ်ႈမၢၼ်ႈ ၾၢႆႇၵူတ်ႇထတ်းရူတ်ႉၵႃးၼၼ်ႉ လႆႈသူင်ႇဝႆႉတီႈႁူင်းယႃလူင် ဝဵင်းလႃႈသဵဝ်ႈဝႆႉယဝ်ႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 19/9/2023 ယၢမ်းႁူဝ်ၶမ်ႈ 5 မူင်းၶိုင်ႈ မၢၵ်ႇတႅၵ်ႇ တီႈၼႃႈႁူင်းႁႅမ်း CS Hotel ပွၵ်ႉ 2 ႁိမ်းၵၢတ်ႇ လူင်လွႆယဵဝ်ႈ ဝဵင်းလႃႈသဵဝ်ႈ လုၵ်ႈၼိုင်ႈ ၼၼ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းႁိမ်းႁွမ်းၼၼ်ႉ လူႉတၢႆထင်တီႈ 1 ၵေႃႉ ၼိုင်ႈ ပဵၼ်ၽူႈၸၢႆး လိူဝ်ၼၼ်ႉ မၢတ်ႇၸဵပ်း 4 ၵေႃႉ။ ၼႂ်းၼၼ်ႉ တေႃႇဢမ်းပလုတ်ႉ ဢႃယု 45 ပီ(ယိင်း) မၢတ်ႇၸဵပ်းႁၢဝ်ႈႁႅင်း ထိုင်မႃး ဝၼ်းတီႈ 20/9/2023 ယၢမ်းႁူဝ်ၶမ်ႈ 5 မူင်းပၢႆ တၢႆၵႂႃႇထႅင်ႈတီႈႁူင်းယႃလူင်ဝဵင်းလႃႈသဵဝ်ႈ ဝႃႈၼႆ။

ပၼ်ႁႃၼၼ်ႉၵေႃႈ ႁၢၼ်ႉတေႃႇထိုင်ယၢမ်းလဵဝ် ပလိၵ်ႈသိုၵ်းမၢၼ်ႈ ယင်းပႆႇတီႉၺွပ်းလႆႈ ၵူၼ်းမႃးႁၢင်ႈၵၢင်မၢၵ်ႇ တီႈႁူင်းႁႅမ်း ၼၼ်ႉ ပဵၼ်ၼမ်ႉမိုဝ်းၽႂ် ၸုမ်းလႂ် ၸိူဝ်းၼႆႉ။