ဝၼ်းတီႈ 20/9/2023 ယၢမ်းၶမ်ႈ 7 မူင်းၼၼ်ႉ ၵႃးလမ်းၼိုင်ႈ တီႈဢွင်ႇပၢၼ်း ၽႃႇၺႃးၵူၼ်းၶၢမ်ႈတၢင်း ၾၢႆႇၼႃႈ ပၢမ်ႉၼမ်ႉမၼ်း Lucky 7 ဢၼ်မီးၼႂ်းၵႄႈ ဢွင်ႇပၢၼ်း – ၵၢတ်ႇလေႃႉ ၸိုင်ႈတႆးပွတ်းၸၢၼ်း ၵူၼ်းၶၢမ်ႈတၢင်းတၢႆထင်တီႈ ၸဝ်ႈၵႃးၼၼ်ႉႁေႃႈၵႃးပၢႆႈလွတ်ႈဝႆႉ ဢမ်ႇၸၢင်ႈဢဝ်တၢင်းၽိတ်းၽႂ် ၼႆယဝ်ႉ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းဢွင်ႇပၢၼ်းလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၵူၼ်းၸၢႆးၵေႃႉၼႆႉ တိုၵ်ႉၶၢမ်ႈတၢင်းယူႇၼၼ်ႉ ၺႃးၵႃးၽႃႇလႄႈ ၵူၼ်းႁိမ်းၼၼ်ႉထူဝ်းမႃးလၢတ်ႈဢေႃႈ။ပဵၼ်ပီႈၼွင်ႉၽႂ်ပႆႇႁူႉ ယွၼ်ႉၼၼ်လႄႈ တိုၵ်ႉၸွပ်ႇႁႃယူႇ” – ဝႃႈၼႆ။
ၵူၼ်းၸၢႆးၵေႃႉဢၼ်ၺႃးၵႃးၽႃႇတၢႆၼႆႉ ဢႃယု မီးမွၵ်ႈ 30 ပၢႆ ထိုင်မိူဝ်ႈလဵဝ်ပႆႇမီးပီႈၼွင်ႉမႃးၵပ်းသိုပ်ႇႁႃလႄႈ ပႆႇၸၢင်ႈပူၼ်ႉၶၢပ်ႈတူဝ် တိုၵ်ႉၵဵပ်းဝႆႉတီႈႁူင်းယႃလူင်ဝဵင်းၵၢတ်ႇလေႃႉ ၼႆယဝ်ႉ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းဢွင်ႇပၢၼ်းလၢတ်ႈတီႈၽူႈတွႆႇႁွၵ်ႈဝႃႈ – “ ၵႃးဢၼ်ၽႃႇမၼ်းၼၼ်ႉၵေႃႈ ၽႂ်ဢမ်ႇတၼ်းႁၼ်လႄႈ ဢမ်ႇၸၢင်ႈဢဝ်လိူင်ႈၽႂ်။ ၵူၼ်းတၢႆၼႆႉတႄႉ ပွတ်းတႂ်ႈမၼ်းၺႃးၵႃးယဵပ်ႇလႅဝ်ဝႆႉမူတ်း ” – ဝႃႈၼႆ။
မိူဝ်ႈဝၼ်းတီႈ 15/7/2023 ယၢမ်းၶမ်ႈၶိုၼ်းၼင်ႇၵဝ်ႇ ၵႃးတၢင်ႇၵုၼ်ႇလမ်းၼိုင်ႈ ၵွႆသေ ၵိုတ်းဝႆႉ ၼိူဝ်သဵၼ်ႈတၢင်းလူင်ပျီႇထွင်ႇၸု(သဵၼ်ႈတၢင်းၵႂႃႇမႃး ဢွင်ႇပၢၼ်း – တူၼ်ႈတီး) တၢင်းၶဝ်ႈဢွၵ်ႇဝဵင်း ႁိမ်းႁူင်းႁဵၼ်းပိတ်ႉၸုပၼ်ႇ (ပစ္စုပ္ပန်ကျောင်း) တီႈၸႄႈဝဵင်းဢွင်ႇပၢၼ်း သမ်ႉမီးရူတ်ႉၶိူင်ႈလမ်းၼိုင်ႈ ဢမ်ႇၾၢင်ႉမႅၼ်ႈ ႁေႃႈမႃးၽႃႇၺႃးၵႃး၊ ၵူၼ်းႁေႃႈလူႉတၢႆထင်တီႈ ၼႆယဝ်ႉ။