ဢူၺ်းၵေႃႉၵၼ် 2 ၵေႃႉ တီႈဢွင်ႇပၢၼ်း ယဝ်ႉယွၵ်ႇၵၼ် ထိုင်တီႈၸႂ်လမ်သေ တႅင်းၵၼ်တၢႆၵေႃႉၼိုင်ႈ။
မိူဝ်ႈဝၼ်းတီႈ 16/7/2023 ယၢမ်း 11 မူင်း ဢူၺ်းၵေႃႉၵၼ် 2 ၵေႃႉ တီႈပွၵ်ႉၺွင်ႇပိၼ်ႇထွင်ႇ ႁိမ်းၵၢတ်ႇပျီႇသႃႇယႃႇ(တႂ်ႈ) ၸႄႈဝဵင်းဢွင်ႇပၢၼ်း ၵိၼ်ၵျေႃႇယဝ်ႉယွၵ်ႇၵၼ် ထိုင်တီႈၸႂ်လမ်သေ တႅင်းၵၼ် တၢႆၵေႃႉၼိုင်ႈ။
ၸုမ်းၸွႆႈၶႅၵ်ႇလီပၢင်ၸႃႉဢွင်ႇပၢၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တႆးၵေႃႉၵၼ် 2 ၵေႃႉ ၵိၼ်လဝ်ႈၵုမ်းၵၼ် မဝ်းမႃးၵေႃႈ ယဝ်ႉယွၵ်ႇၵၼ်ထိုင်တီႈပေႃး ဢမ်ႇၶၢမ်ႇလႆႈ ၸႂ်လမ်ၵၼ်သေ ဢဝ်မိတ်ႈတႅင်းၵၼ်။ ၵူၼ်းႁိမ်းႁွမ်းၼၼ်ႉ ၸႅင်ႈမႃးလႄႈ ၵူၼ်းႁဝ်းၶႃႈၸင်ႇ လႆႈၵႂႃႇဢဝ်ၵူၼ်းပဵၼ်သူင်ႇႁူင်းယႃ။ ထိုင်ႁူင်းယႃ ဢမ်ႇတၼ်းႁိုင် လူႉတၢႆပႅတ်ႈ ” – ဝႃႈၼႆ။
ၵေႃႉထုၵ်ႇၺႃးတႅင်းလူႉတၢႆၼႆႉ ၸိုဝ်ႈ ဢွင်ႇထူးမေႃႇ ဢႃယု 35 ပီ ယူႇပွၵ်ႉၺွင်ႇပိၼ်ႇထွင်ႇ ၸႄႈဝဵင်းဢွင်ႇပၢၼ်း ၵေႃႉပူၼ်ႉပႅၼ် ၸိုဝ်ႈ ၼၢႆႇမိၼ်းဢွင်ႇ ယူႇပွၵ်ႉ ဢေးမျိၼ်ႉသႃႇယႃႇ ၸႄႈဝဵင်းဢွင်ႇပၢၼ်း။
ၸုမ်းၸွႆႈၶႅၵ်ႇလီပၢင်ၸႃႉဢွင်ႇပၢၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိတ်ႈဢၼ်တႅင်းၵၼ်ၼၼ်ႉ ယၢဝ်း 18 ၼိဝ်ႉ။ တႅင်းၺႃးတီႈ လုပ်ႇၶၢင်ႈတတ်းသိုဝ်ႈဢူၵ်း ဢွင်ႇထူးမေႃႇၼၼ်ႉ။မိူဝ်ႈလဵဝ်တႄႉ ၸုမ်းပလိၵ်ႈလႄႈ ၽူႈမီးပုၼ်ႈၽွၼ်းၶဝ် ၺွပ်းတူဝ်ၵူၼ်းပူၼ်ႉပႅၼ်ဝႆႉတီႈႁူင်းပလိၵ်ႈဢွင်ႇပၢၼ်းယဝ်ႉ ။ပီႈၼွင်ႉၾၢႆႇၵူၼ်းတၢႆ ပိုတ်ႇဢမူႉ ဢဝ်လိူင်ႈဝႆႉယဝ်ႉ” – ဝႃႈၼႆ။
မိူဝ်ႈလိူၼ်ၵျုၼ်ႊပူၼ်ႉမႃးၼႆႉၵေႃႈ ၽူႈၸၢႆးဢူၺ်းၵေႃႉၵၼ် 2 ၵေႃႉၵူၼ်းဝၢၼ်ႈပၢင်ႁၵ်ႉလႄႈ ဝၢၼ်ႈသီႇရိငွၵ်း ဝဵင်းတႃႈၶီႈလဵၵ်း ၸူဝ်းၵၼ်ၵႂႃႇၵိၼ်လဝ်ႈတီႈ ထဵင်ၼႃး ၼႂ်းဝၢၼ်ႈမူင်ႈ ဢိူင်ႇမိူင်းၵူဝ်းသေ ထိုင်မဝ်းမႃး ထဵင်မေႃး ၽိတ်းၽႅၵ်ႇၵၼ် ထိုင်တီႈ ၽၼ်းၵၼ် ယိုဝ်းၵၼ်မၢတ်ႇၸဵပ်းတင်းသွင်။
