မီးၵူၼ်းမႃးႁၢင်ႈၵၢင်မၢၵ်ႇဝႆႉ တီႈၼႃႈႁူင်းႁႅမ်း CS Hotel တီႈဝဵင်းလႃႈသဵဝ်ႈသေ တႅၵ်ႇတိူဝ်ႉသႂ်ႇ ၵူၼ်းမိူင်း ၸိူဝ်းလတ်း ၽၢၼ်ႇ ၵႂႃႇမႃးႁိမ်းႁွမ်းၼၼ်ႉ လူႉတၢႆထင်တီႈ ၵေႃႉၼိုင်ႈလႄႈ မၢတ်ႇၸဵပ်း 4 ၵေႃႉ။

မိူဝ်ႈဝႃး ဝၼ်းတီႈ 19/9/2023 ယၢမ်းဝၢႆးဝၼ်း 5 မူင်းၶိုင်ႈ မၢၵ်ႇတႅၵ်ႇ လုၵ်ႈၼိုင်ႈတီႈၼႃႈႁူင်းႁႅမ်း CS Hotel ပွၵ်ႉ 2  ႁိမ်း ၵၢတ်ႇလူင်လွႆယဵဝ်ႈ ဢၼ်မီးတီႈၼိူဝ်သဵၼ်ႈတၢင်းပျီႇလႄႈ မွၵ်ႇၼိၼ်းသီႇ ၵၢႆႇၸူးၵၼ်ဝႆႉ ၼႂ်းၵၢင်ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“မၢၵ်ႇဢၼ်ၶဝ် မႃးႁၢင်ႈၵၢင်ၼၼ်ႉ သႂ်ႇၼႂ်းရူတ်ႉၶိူင်ႉမႃးၵိုတ်းဝႆႉ တႅၵ်ႇ လုၵ်ႈၼိုင်ႈ ရူတ်ႉၶိူင်ႈၼၼ်ႉ ၶၢတ်ႇၵႂႃႇပဵၼ်သွင်ပွတ်း ၵႃးၸိူဝ်းၼၼ်ႉၵေႃႈ တႅၵ်ႇတိူဝ်ႉသႂ်ႇ ပဵၼ်လၢႆလမ်းၶႃႈဢေႃႈ။ ၵူၼ်းမိူင်း ဢၼ်လႆႈမၢတ်ႇၸဵပ်းလူႉတၢႆၼၼ်ႉ ပဵၼ်ၵူၼ်းမႃးၼင်ႈၵိၼ်ၶဝ်ႈသွႆးႁိမ်းၼၼ်ႉသေ ၺႃးၸၢၵ်ႇၸွမ်း ၸၢႆး 3 ၵေႃႉ ယိင်း 2 ၵေႃႉ ။ ၼႂ်းၼၼ်ႉ ၽူႈၸၢႆး ၵေႃႉၼိုင်ႈ လူႉတၢႆထင်တီႈ။ ပၼ်ႁႃမၼ်းၼႆႉ ယွၼ်ႉလွင်ႈၵဵပ်းၶွၼ်ႇၼၼ်ႉၶႃႈဢေႃႈ”- ဝႃႈၼႆ။

မၢၵ်ႇဢၼ်မႃးႁၢင်ႈၵၢင် တႅၵ်ႈၾၢႆႇၼႃႈႁူင်းႁႅမ်း CS Hotel ၼႆႉ ပဵၼ်ၼမ်ႉမိုဝ်းၽႂ် မၢၵ်ႇၽႂ် ၸုမ်းလႂ်မႃးႁၢင်ႈၵၢင်တႄႉ ႁၢၼ်ႉ တေႃႇထိုင်ယၢမ်းလဵဝ် ပႆႇႁူႉ ဝႃႈၼႆ။

ၵူၼ်းမိူင်းယူႇႁိမ်းၵိၼ်ၸမ် တီႈႁူင်းႁႅမ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“မၢၵ်ႇၼႆႉ ၶဝ်တေဢၢၼ်းမႃးပွႆႇ သွင်ဢွင်ႈတီႈ ဢၼ်တႅၵ်ႇၵႂႃႇၼၼ်ႉ တီႈၼႃႈႁူင်းႁႅမ်း CS Hotel ၼၼ်ႉၵူၺ်း ဢၼ်တႅၵ်ႇတိူဝ်ႉသႂ်ႇ ႁူင်းႁႅမ်း လူႉၵွႆတႄႉ တေႃႉတႄႉမီးဢိတ်း ဢွတ်းၵူၺ်း ၸွမ်းတၢင်းၼႃႈႁူင်းႁႅမ်းၼၼ်ႉ။ ထႅင်ႈလုၵ်ႈၼိုင်ႈၼၼ်ႉ မီးၵူၼ်းၶီႇရူတ်ႉၶိူင်ႈသႅၼ်း 125 မႃးၵေႃႉၼိုင်ႈ မႃးဢဝ် မၢၵ်ႇဝိုတ်ႉသႂ်ႇတီႈႁူင်းႁႅမ်း New Asian ဢၼ်မီးၸၢႆႇၸဵင်ႇၵၼ် တင်းႁူင်းႁႅမ်း CS Hotel ၼၼ်ႉ ၵူၺ်းၵႃႈ မၢၵ်ႇလုၵ်ႈၼၼ်ႉ ဢမ်ႇတၼ်းတႅၵ်ႇ ပလိၵ်ႈသိုၵ်းမၢၼ်ႈၶဝ် တၼ်းမႃးၽဵဝ်ႈဢဝ်လႆႈၶႃႈဢေႃႈ”- ဝႃႈၼႆ။

ႁူင်းႁႅမ်း CS Hotel တင်း ႁူင်းႁႅမ်း New Asian ၼႆႉ တေတေႃႇၼႃႇၵၼ်ဝႆႉ တီႈသဵၼ်ႈတၢင်းၼၼ်ႉ ပဵၼ်ဢွင်ႈတီႈ ၵူၼ်း ၵိုၼ်းၶွၼ်ႈ ၵႂႃႇမႃးၼမ် ၼႆယဝ်ႉ။

ၼႂ်းဝဵင်းလႃႈသဵဝ်ႈၼႆႉ တီႈႁူင်းလႅမ်း ၊ ႁၢၼ်ႉၶၢႆတၢင်းၵိၼ် ၊ ႁၢၼ်ႉၵိၼ်ၵျေႃႇ Bar ၸိူဝ်းၼႆ့ ၵႆ့မီးလွင်ႈမၢၵ်ႇတႅၵ်ႇမႃးၶိူဝ်းယႂ်း။   ၵူၼ်းပိုၼ့်တီႈထတ်းသၢင်ႈ လၢတ်ႈဝႃႈ ၵဵဝ်ႇၵပ်းလွင်ႈမၢၵ်ႇၵႆႉတႅၵ်ႇၼႆႉ ယွၼ်ႉၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၶဝ် မႃးယွၼ်း ၶွၼ်ႇလႄႈ ၸဝ်ႈၶွင်မၼ်း ဢမ်ႇယွမ်းသႂ်ႇပၼ်လႄႈ ၸင်ႇမီးမႃး လွင်ႈႁၢင်ႈၵၢင်သႂ်ႇ ၸိူင်ႉၼႆ။

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်ၵႆႉၵဵပ်းၶွၼ်ႇ တီႈၼႂ်းၸႄႈဝဵင်းလႃႈသဵဝ်ႈၼႆႉသမ်ႉ ၵမ်ႈၼမ် တေပဵၼ် သိုၵ်း KIA သိုၵ်း TNLA သိုၵ်း MNDAA လႄႈ သိုၵ်း SSPP ၸိူဝ်းၼႆႉ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“ပေႃးဝႃႈ ၵဵပ်းၶွၼ်ႇဢမ်ႇလႆႈၼႆၵေႃႈ တႃႉၶဝ်တီႉၺွပ်းဢဝ် တူဝ်ၸဝ်ႈၶွင်မၼ်းၵႂႃႇ ၶႃႈဢေႃႈ။ ယႃႇပေမႃးပွႆႇမၢၵ်ႇသႂ်ႇၸိူင်ႉၼႆ ပွႆႇၵမ်းလႂ် ပွၵ်ႈလႂ်ၵေႃႈ မၼ်းတုမ်ႉတိူဝ်ႉၵူၼ်းမိူင်း၊ ၵူၼ်းႁဵတ်းၵၢၼ် ၼႂ်းလၢၼ်ႉ ၸိူဝ်း ၼၼ်ႉၵူၺ်း မၼ်းဢမ်ႇမီးၽွၼ်းလီ တႃႇၸုမ်းၶဝ်သင် မၼ်းပဵၼ်ၽွၼ်းႁၢႆႉ တီႈၵူၼ်းတင်းၼမ် ပိူၼ်ႈတေဢွၼ်ၵၼ်ၼႄးၶဝ် ဝႃႈ ပဵၼ်ၸုမ်းၵေႃႇၵၢၼ်ႁၢႆႉၵူၺ်း။ ဢၼ်ၶႂ်ႈဝႃႈတႄႉ ယႃႇပေပွႆႇမၢၵ်ႇသႂ်ႇၵူၼ်းမိူင်း ဢၼ်ဢမ်ႇမီးတၢင်းၽိတ်းသင်ၼၼ်ႉၶႃႈ ယဝ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 15/7/2023 ယၢမ်းၵၢင်ၼႂ် 7:45 မူင်းၼၼ်ႉ မီးၵူၼ်းမႃးႁၢင်ႈၵၢင်မၢၵ်ႇ ဝႆႉၼႂ်းရူတ်ႉၶိူင်ႈ ၵိုတ်းဝႆႉတီႈ ၼႃႈ ႁၢၼ်ႉၶၢႆၶမ်းသွႆးထႅတ်ႉ တီႈၵၢတ်ႇလူင်ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉသေ တႅၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆမၢတ်ႇၸဵပ်း ၸွမ်း 13 ၵေႃႉ ၼႂ်းၼၼ်ႉ တႃႇၵူၼ်းႁဵတ်းၵၢၼ် ၼႂ်းႁၢၼ်ႉၶၢႆၶမ်း မၢတ်ႇၸဵပ်း 10 ၵေႃႉ လူႉတၢႆ 1 ၵေႃႉ။ ၵူၼ်းႁိမ်းႁွမ်းၼၼ်ႉ သမ်ႉ တိူဝ်ႉၺႃးၸၢၵ်ႇမၢၵ်ႇၸွမ်း 2 ၵေႃႉ ၵူၼ်းမႃးႁၢင်ႈၵၢင်မၢၵ်ႇတႅၵ်ႇၼၼ်ႉ ပဵၼ် ၼမ်ႉမိုဝ်းၽႂ် ၸုမ်းလႂ် မႃးႁၢင်ႈၵၢင် ဢၼ်ဝႃႈ ၼၼ်ႉ ႁၢၼ်ႉတေႃႇထိုင်ယၢမ်းလဵဝ် ပႆႇတီႉၺွပ်းလႆႈ ၼႆယဝ်ႉ။

ႁၢၼ်ႉၶၢႆၶမ်းသွႆးထႅတ်ႉ (ဇွဲထက်ရွှေဆိုင်) ၼႆႉ ၼႂ်းမိူင်းတႆး ပိုတ်ႇၶၢႆၶမ်းဝႆႉ မီးသွင်ဢွင်ႈတီႈ တီႈဝဵင်းလႃႈသဵဝ်ႈၼႆႉ တီႈ ၼိုင်ႈလႄႈ တီႈဝဵင်းတူၼ်ႈတီး တီႈၼိုင်ႈ။ လိူဝ်ၼၼ်ႉ တီႈတႃႈၵုင်ႈ – မၼ်းတလေး ၸိူဝ်းၼႆႉထႅင်ႈ။