ပၢင်တိုၵ်း တီႈၸႄႈဝဵင်းမူႇၸေႊ ၶၢဝ်းတၢင်း 3 ဝၼ်းထပ်းၵၼ်မႃးၼႆႉ သိုၵ်းမၢၼ်ႈ ယိုတ်းမိူင်း ယိုတ်းလႆႈတပ်ႉပၢင်သဝ်း ၶွင် သိုၵ်း TNLA 3 ဢွင်ႈတီႈ။

တႄႇဢဝ် ဝၼ်းတီႈ 17-19/9/2023 မႃးၼႆႉ သိုၵ်းမၢၼ်ႈ တပ်ႉမ 99 တင်း ပျီႇတူႉၸိတ်ႉပၢၼ်းသေး၊ ပျီႇတူႉၸိတ်ႉမဵဝ်ႉမလႄႈ ပျီႇတူႉၸိတ်ႉပဵင်းသႃႇ ႁူမ်ႈၵၼ် လေႃႇတိုၵ်း တပ်ႉသိုၵ်းတဢၢင်း TNLA တီႈဢိူင်ႇပၢင်ႇၶမ်းလႄႈ ဢိူင်ႇၸေႊလၢၼ်ႉ ၼႂ်းၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မႃးႁၢဝ်ႈႁႅင်း ၼႆယဝ်ႉ။

ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၶဝ် ၶၢဝ်းတၢင်း 3 ဝၼ်းမႃးၼႆႉ သိုၵ်း မၢၼ်ႈသိမ်းလႆႈ ဢွင်ႈတီႈတပ်ႉပၢင်သဝ်း ၶွင်သိုၵ်းလွႆၶဝ် 3 ဢွင်ႈတီႈ မိူၼ်ၼင်ႇ – တီႈၵွင်းမူးတၢပ်ႈလွႆတေးမိူင်း၊ ၵွင်းလိၼ် လႅင်လႄႈ သၼ်လွႆၾၢႆႇတူၵ်းၵွင်းလိၼ်လႅင် ၸိူဝ်းၼၼ်ႉ။ လွင်ႈမၢတ်ႇၸဵပ်း လူႉတၢႆၶဝ် တင်းသွင်ၾၢႆႇတႄႉ ပႆႇလႆႈႁူႉၸွမ်း”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ မိူဝ်ႈဝႃး ဝၼ်းတီႈ 19 ၼႆႉ မၢၵ်ႇလူင်သိုၵ်းမၢၼ်ႈ တူၵ်းသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆၸွမ်း 2 လင် ၵူၼ်းမိူင်းမၢတ်ႇၸဵပ်းၸွမ်း 3 ၵေႃႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 19 ယၢမ်းဝၢႆးဝၼ်း 4 မူင်းၶိုင်ႈ မၢၵ်ႇလူင်သိုၵ်း မၢၼ်ႈ တူၵ်းသႂ်ႇႁိူၼ်းၵူၼ်းဝၢၼ်ႈ မၢၼ်ႈၸၢၼ်းသႃႇ ဢိူင်ႇတိုင်းလူင် လူႉၵွႆ 2 လင်။ ၸၢၵ်ႇမၢၵ်ႇတိူဝ်ႉသႂ်ႇ ၸဝ်ႈႁိူၼ်း ပႃႈ သွၼ်းလႄႈ ပႃႈလိုၼ်း ဢႃယုၶဝ်တေမီးမွၵ်ႈ 50 ႁိမ်းႁွမ်းၼႆႉ ၸၢၵ်ႇမၢၵ်ႇတိူဝ်းသႂ်ႇ တီႈဢႅင်ႈ/ ဢႅဝ် ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉသႂ်ႇထႅင်ႈ ဢွၼ်ႇယိင်း ဢႃယု 17 ပီ ၵေႃႉၼိုင်ႈ လႆႈတိူဝ်ႉမၢတ်ႇၸဵပ်းၸွမ်း။ လွင်ႈၵူၼ်းမိူင်း မၢတ်ႇၸဵပ်းတႄႉ ဢမ်ႇပေႃး ထိုင် တီႈလႆႈမႆႈၸႂ်ၶႃႈ”- ဝႃႈၼႆ။

မၢၵ်ႇလူင် သိုၵ်းမၢၼ်ႈ ဢၼ်တူၵ်းသႂ်ႇႁိူၼ်းယေး ၵူၼ်းဝၢၼ်ႈ တီႈမၢၼ်ႈၸၢၼ်းသႃႇၼႆႉ တိူဝ်ႉသႂ်ႇတီႈႁွင်ႈဢၢပ်ႇၼမ်ႉ၊ ၸွမ်းသိုင်ႇၾႆး ၸိူဝ်းၼႆႉပႃး။ မိူဝ်ႈဝၼ်းတီႈ 18 ပူၼ်ႉမႃးၼၼ်ႉၵေႃႈ ၸၢၵ်ႇမၢၵ်ႇလူင်တိူဝ်ႉသႂ်ႇ ၽူႈယိင်းဢႃယုမွၵ်ႈ 40 ပီ ၵေႃႉၼိုင်ႈ ၵူၼ်းမၢၼ်ႈၵၢင် ဢိူင်ႇၸေႊလၢၼ်ႉ လႆႈမၢတ်ႇၸဵပ်းၸွမ်း။

လွင်ႈပၢင်တိုၵ်း တၢင်းၸႄႈဝဵင်းမူႇၸေႊၼႆႉ မိူဝ်ႈဝၼ်းတီႈ 17 ယၢမ်းၵၢင်ၼႂ် 7:46 မူင်း သိုၵ်းမၢၼ်ႈ တပ်ႉမ 99 တႄႇယိုဝ်း မၢၵ်ႇလူင်သႂ်ႇ သိုၵ်း TNLA တၢင်းၾၢႆႇၸၢၼ်း မၢၼ်ႈဝဵင်းၼၢင်း။ ထိုင်မႃး ယၢမ်းၵၢင်ဝၼ်း 12:20 မူင်း – 1:40 မူင်း ဝၢႆးဝၼ်း တင်းသွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း။ ထိုင်မႃး ယၢမ်းဝၢႆးဝၼ်း 4:00 မူင်း – 4:30 မူင်းသမ်ႉ သွင်ၾၢႆႇ သိုပ်ႇပဵၼ်ပၢင် တိုၵ်းထႅင်ႈ သိုၵ်းမၢၼ်ႈ ယိုဝ်းၵွင်ႈလူင် ၵႂႃႇၵူႈႁူႈၵူႈတၢင်း။

ဝၼ်းတီႈ 18 ယၢမ်းၵၢင်ၼႂ် 7:00 မူင်း – 7:30 မူင်း သိုၵ်းမၢၼ်ႈ တႄႇယိုဝ်းၵွင်ႈလူင်ၵႂႃႇတၢင်း မၢၼ်ႈဝဵင်းၼၢင်း – ပၢင်ႇလိၼ် လႅင်။ ထိုင်မႃး ယၢမ်းၵၢင်ၼႂ် 10 မူင်းၶိုင်ႈ သိုၵ်းမၢၼ်ႈ ယိုဝ်းမၢၵ်ႇလူင်ထႅင်ႈ။ ယၢမ်းဝၢႆးဝၼ်း 3:00 မူင်း – 5:00 မူင်းပၢႆ သိုၵ်းမၢၼ်ႈ ၶိုၼ်ႈလေႃႇတိုၵ်း သိုၵ်း TNLA တီႈၾၢႆႇၼိူဝ် မၢၼ်ႈဝဵင်းၼၢင်း။ ထိုင်မႃး ယၢမ်းၵၢင်ၶမ်ႈ သိုၵ်းမၢၼ်ႈ ပွႆႇမၢၵ်ႇလူင်ၵႂႃႇ တၢင်း ပၢင်ႇလိၼ်လႅင်၊ ဝၢၼ်ႈၼမ်ႉၵတ်းလႄႈ လွႆတေးမိူင်း ၸိူဝ်းၼၼ်ႉထႅင်ႈ။

ထိုင်မႃး ဝၼ်းတီႈ 19 ယၢမ်းၵၢင်ၼႂ် မွၵ်ႈ 9 မူင်း – 11 မူင်းၶိုင်ႈ ၵၢင်ဝၼ်း သိုၵ်းမၢၼ်ႈ ယိုဝ်းၵွင်ႈလူင် ၵႂႃႇတၢင်းဝၢၼ်ႈၼမ်ႉၵတ်း၊ တၢင်းလွႆၾၢႆႇၸၢၼ်း မၢၼ်ႈဝဵင်းၼၢင်း၊ ပၢင်ႇလိၼ်လႅင်၊ ၾၢႆႇဢွၵ်ႇသၼ်လွႆတေးမိူင်း ၸိူဝ်းၼၼ်ႉထႅင်ႈ။ ယၢမ်းဝၢႆးဝၼ်း မွၵ်ႈ 4 မူင်း – 4 မူင်းၶိုင်ႈပၢႆၼၼ်ႉ သွင်ၾၢႆႇပဵၼ်ပၢင်တိုၵ်းၵၼ် တၢင်းပွတ်းသၼ်လွႆၼမ်ႉႁႃႉ ၾၢႆႇတူၵ်းၼမ်ႉဢုမ်ထႅင်ႈ။

“ဢဵၼ်ႁႅင်း သိုၵ်းမၢၼ်ႈ တေမီးမွၵ်ႈ 200 ၵေႃႉ ႁူမ်ႈပႃး ပျီႇတူႉၸိတ်ႉပၢၼ်းသေး 30 ၵေႃႉ၊ မဵဝ်ႉမ 20 ၵေႃႉလႄႈ ပဵင်းသႃႇ 20 ၵေႃႉ တင်းမူတ်း ႁူမ်ႈၵၼ် တေမီးဢဵၼ်ႁႅင်းမွၵ်ႈ 270 ၵေႃႉ။ သိုၵ်းလွႆသမ်ႉ ႁူမ်ႈပႃးတပ်ႉၵူဝ်ႇမၢၼ်ႇတူဝ်ႇၶဝ်သေ တေမီးဢဵၼ် ႁႅင်း တင်းမူတ်း 380 ၵေႃႉ”- ၽူႈတူင်ႉၼိုင် ၵၢၼ်သိုၵ်း တၢင်းထုင်းမၢဝ်း သိုပ်ႇလၢတ်ႈၼႄ ၼင်ႇၼႆ။

ၸုမ်းပျီႇတူႉၸိတ်ႉ ဢၼ်ႁူမ်ႈတင်းသိုၵ်းမၢၼ်ႈသေ ၵႂႃႇယိုဝ်းတပ်ႉသိုၵ်း TNLA တီႈၸႄႈဝဵင်းမူႇၸေႊ ယၢမ်းလဵဝ်ၼႆႉ တေပဵၼ် ပျီႇတူႉၸိတ်ႉပၢၼ်းသေး၊ ပျီႇတူႉၸိတ်ႉမဵဝ်ႉမ မၢႆ – 3 လႄႈ ပျီႇတူႉၸိတ်ႉပဵင်းသႃႇ ၸိူဝ်းၼႆႉ။ ဢၼ်ဢမ်ႇၶဝ်ႈႁူမ်ႈယိုဝ်းၸွမ်းသမ်ႉ တေပဵၼ်ပျီႇတူႉၸိတ်ႉ မၢၼ်ႈၸေႈ၊ ပျီႇတူႉၸိတ်ႉ မၢၼ်ႈပဵင်း၊ ပျီႇတူႉၸိတ်ႉ တႃႈမိူင်းငႅၼ်း ၸိူဝ်းၼႆႉ ၽူႈတူင်ႉၼိုင် ၵၢၼ်သိုၵ်း ထုင်ႉမၢဝ်းလၢတ်ႈ။