ၵူၼ်းမိူင်းႁူမ်ႈတုမ် ပႂ်ႉႁဵတ်းဝႂ် TBP တီႈမူႇၸေႊ ၼိုင်ႈဝၼ်းလႂ်ၼပ်ႉႁူဝ်ႁဵင်

ၵူၼ်းမိူင်းႁူမ်ႈတုမ် ၸိူဝ်းပႂ်ႉႁဵတ်းဝႂ်ၶၢမ်ႈလႅၼ်လိၼ် ၸူဝ်ႈၶၢဝ်း (TBP) တီႈဝဵင်းမူႇၸေႊၼႆႉ မၢင်ၸိူဝ်း လႆႈလုၵ်ႉၸဝ်ႉ ၵႂႃႇၶဝ်ႈ ထႅဝ်ပႂ်ႉႁဵတ်း ၸိူဝ်းၼႆႉ မီးတင်းၼမ် ယွၼ်ႉၵူၼ်းႁဵတ်းၼမ် ၼိုင်ႈဝၼ်းလႂ် ၵူၼ်းၵႂႃႇႁဵတ်း ဢမ်ႇယွမ်းႁဵင်။

တႄႇဢဝ် ဝၼ်းတီႈ 4/9/2023 ၼၼ်ႉမႃး တေႃႇထိုင်ယၢမ်းလဵဝ် ၽၵ်းတူလႅၼ်လိၼ်တႆး – ၶႄႇ တီႈၽၵ်းတူၸၢင်ႉၽိူၵ်ႇတင်း ၽၵ်းတူလူင် တီႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ၼိုင်ႈဝၼ်းလႂ် ၵူၼ်းၵႂႃႇၶဝ်ႈထႅဝ် ပႂ်ႉႁဵတ်းဝႂ်ၶၢမ်ႈလႅၼ်လိၼ် ၸူဝ်ႈၶၢဝ်း (TBP – Temporary Border Pass) မီးၼပ်ႉႁူဝ်ႁဵင်လႄႈ သင်ဢမ်ႇၵႂႃႇၶဝ်ႈထႅဝ်ပႂ်ႉၸဵမ်ၸဝ်ႉၸိုင် ၵူဝ် ဢမ်ႇတၼ်းႁဵတ်း ၶိုတ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မႄႈၶႃႈၼႆႉ ၵႂႃႇပႂ်ႉတင်ႈတႄႇ ၵၢင်ၼႂ်ၸဝ်ႉ 2 မူင်းၶႃႈၼႃႇ တိုၵ်ႉႁဵတ်း ဝႂ်ယဝ်ႉသေ လႆႈၶဝ်ႈၵႂႃႇၼႂ်းမိူင်းၶႄႇ မိူဝ်ႈယၢမ်းဝၢႆးဝၼ်း 2 မူင်းၼႆႉၵူၺ်းၶႃႈဢေႃႈ။ ၵူၼ်းၼႆႉ မၼ်းၼမ်ႁႅင်း ၼႃႇ တီႈၽၵ်းၸၢင်ႉ ၽိူၵ်ႇ – ၽၵ်းတူလူင် ၸိူဝ်းၼႆႉ။ ၼိုင်ႈတီႈလႂ် ဢမ်ႇယွမ်း 3 – 4 ႁဵင်ၼႆႉၶႃႈ။ ၸိူဝ်းၸုၵ်းၵေႃႈၸုၵ်း ၸိူဝ်းၼင်ႈၵေႃႈၼင်ႈပႂ်ႉ ၶပ်ႉ ယႆၵၼ် ပဵၼ်ထႅဝ်ၼၼ်ႉၶႃႈယဝ်ႉ။ မၢင်ၸိူဝ်း ၵႂႃႇပႂ်ႉ 6 မူင်းၵၢင်ၼႂ် လႆႈၶဝ်ႈၵႂႃႇ မိူင်းၶႄႇ 6 မူင်းၵၢင်ၶမ်ႈ ၸိူဝ်းၼႆႉၵေႃႈမီးဢေႃႈ” – ဝႃႈၼႆ။

ၵူၼ်းမိူင်းႁူမ်ႈတုမ် ၸိူဝ်းမီးမၢႆၾၢင် (မၢတ်ႉပူင်ႇတိၼ်ႇ) တႄႉ မီးသုၼ်ႇႁဵတ်းလႆႈ ဝႂ်ၶၢမ်ႈလႅၼ်လိၼ်တႆး – ၶႄႇ ၸူဝ်ႈၶၢဝ်းၼႆႉ လႆႈၵူႈၵေႃႉလႄႈ ၵွပ်ႈၼႆ ၵူၼ်းမိူင်းမၢၼ်ႈ တူင်ႈပဵင်း တၢင်ႇတီႈသီႇလႅၼ်လႄႈ ၵူၼ်းမိူင်းတႆး ၸိူဝ်းၼႆႉ ဢွၼ် ၵၼ်လႆၵႂႃႇတၢင်း မူႇၸေႊၼမ် တႃႇၶဝ်ႈမိူဝ်းႁဵတ်းၵၢၼ်ၼႂ်းမိူင်းၶႄႇ။ ယွၼ်ႉမီးၵူၼ်းႁဵတ်းၵိၼ် သိုဝ်ႉတီႈဝႆႉထႅင်ႈ သင်ဝႃႈ ၶႂ်ႈၶဝ်ႈၵႂႃႇတၢင်းမိူင်းၶႄႇ ၶၼ်ၽႂ်းၸိုင် 1 ၵေႃႉလႂ် လႆႈပၼ် 2 မိုၼ်ႇပျႃး သင်ဝႃႈ ဢမ်ႇပေႃးႁိပ်ႈၼႅတ်ႈၸိုင် 1 ၵေႃႉလႂ် 1 မိုၼ်ႇ ၼႆယဝ်ႉ။

“ၸႂ်ႈတႄႉဢေႃႈ လွင်ႈၼႆႉ ၶဝ်ႁဵတ်းၵိၼ်တႄႉၶႃႈ ပဵၼ်တူဝ်လဝၵ ႁဵတ်းၵိၼ်ၵမ်းလဵဝ်ဢေႃႈ။ သင်ဝႃႈ ၶႂ်ႈၶဝ်ႈဝႆးဝႆး တီႈ ၶဝ်ႁဵတ်း ပၼ်ဝႂ် တီႈၽၵ်းတူၼၼ်ႉၵမ်းလဵဝ်ၸိုင် တေလႆႈပၼ်ၶဝ် 20,000 ပျႃးၶႃႈ။ သင်ဝႃႈ ဢမ်ႇပေႃးၸမ်ပေႃးၵႆၸိုင် 10,000 ပျႃး ၶႃႈ။ တေႃႈၼင်ႇ မႄႈႁဝ်းတေၶဝ်ႈၵႂႃႇဝၢႆးဝၼ်း 2 မူင်းၼႆႉ လႆႈသိုဝ်ႉဢဝ်တီႈယူႇ ၼႂ်းထႅဝ်ၼၼ်ႉ 10,000 ပျႃးသေ ၸင်ႇလႆႈ ၸဵဝ်းၶဝ်ႈလူး။ ပေႃးဢမ်ႇသိုဝ်ႉတႄႉ တေပဵၼ်ၶၢဝ်းၵၢင်ၶမ်ႈပုၼ်ႉၵွၼ်ႇၶႃႈယူဝ်ႉ ၸင်ႇတေလႆႈၶဝ်ႈ ထၢင်ႇတႄႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ဝႂ်ၶၢမ်ႈလႅၼ်လိၼ် ၸူဝ်ႈၶၢဝ်း (TBP) ၼႆႉ တေမီးၶႂၢင်ႉၶဝ်ႈထိုင်လႆႈ ၸေႊၵဝ်ႇ – မိူင်းမၢဝ်း တေမီးဢႃယု 7 ဝၼ်း 6 ၶိုၼ်း။ ၵမ်ႈၼမ် ဢၼ်ယူႇတီႈ ၵူၼ်းမိူင်းႁူမ်ႈတုမ် ၶဝ်ႈမိူဝ်းတၢင်းၾင်ႇမိူင်းမၢဝ်းၼၼ်ႉသမ်ႉ မိူၼ်ၼင်ႇ မိူဝ်းဢႅဝ်ႇယႅမ်ႈပီႈၼွင်ႉ။ မိူဝ်း သိုဝ်ႉၶူဝ်းၵုၼ်ႇ၊ မၢင်ၸိူဝ်း မိူဝ်းႁဵတ်းၵၢၼ် တၢင်းၾင်ႇမိူင်းၶႄႇ ၸိူဝ်းၼၼ်ႉ။

ၵူၼ်းပိုၼ်ႉတီႈ မိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈၸဝ်ႈၼႃႈတီႈမၢၼ်ႈၶဝ် ပိုတ်ႇႁဵတ်းဝႂ်ၶၢမ်ႈလႅၼ်လိၼ် ၸူဝ်ႈၶၢဝ်း မႃးၼႆႉ ၼႂ်းၶၢဝ်းတၢင်း 2-3 ဝၼ်းမႃးၼႆႉ တီႈမိူင်းမၢဝ်းၼႆႉ ၵူၼ်းၵိုၼ်းၼမ်တႄႉၶႃႈ။ ၵမ်ႈၼမ် ၵူၼ်းမိူင်းႁူမ်ႈတုမ် တေဢွၼ် ၵၼ်မႃး ႁဵတ်းၵၢၼ်ၶႃႈဢေႃႈ။ မၢင်ၸိူဝ် တေႃႉၶူဝ်းၾင်ႇပုၼ်ႉမႃးၶၢႆၾင်ႇၼႆႉ တေႃႉၶူဝ်းၾင်ႇၼႆႉ မိူဝ်းၶၢႆ ၾင်ႇပုၼ်ႉ ႁဵတ်းၼၼ် ၶႃႈဢေႃႈ”- ဝႃႈၼႆ။

ၵၢၼ်ငၢၼ်း ၵမ်ႈၼမ် ဢၼ်ၵူၼ်းမိူင်းႁူမ်ႈတုမ် ၵူၼ်းၸၢႆးၶဝ် တေႁဵတ်းတၢင်းမိူင်းမၢဝ်းၼၼ်ႉသမ်ႉ တေပဵၼ်ၵၢၼ်ၵေႃႇသၢင်ႈ၊ ၵၢၼ်မႄးတၢင်း၊ လၢင်းႁွင်ႈ၊ ပတ်းတၢင်း၊ တဵင်ႇၶူဝ်းၵုၼ်ႇ ၵၢၼ်ၼၵ်း၊ ၵၢၼ်သူၼ်ႁႆႈၼႃး ၸိူဝ်းၼႆႉ ၼၢင်းယိင်းသမ်ႉ တေႁဵတ်းၵၢၼ် သႅင်ႇၶဝ်ႈၽၵ်း ၸိူဝ်းၼႆႉ။