ၵူၼ်း 2 ၵေႃႉ ၺႃးယိုဝ်းတီႈမူႇၸေႊ မၢတ်ႇၸဵပ်းၵေႃႉၼိုင်ႈ တၢႆၵေႃႉၼိုင်ႈ။
မိူဝ်ႈဝၼ်းတီႈ 9/9/2023 ယၢမ်းၵၢင်ၶိုၼ်း 11 မူင်းပၢႆၼၼ်ႉ ၵူၼ်း 2 ၵေႃႉ ဢၼ်မႃးၼွၼ်းလိုဝ်ႈတီႈႁူင်းႁႅမ်းတၢႆႊမုၼ်ႊ(Diamond Hotel) ၼႂ်းပွၵ်ႉၵွင်းၼွင် မူႇၸေႊၼၼ်ႉ ၺႃးၸုမ်းဢမ်ႇႁူႉၾၢႆႇငွႆးယိုဝ်း ၸၢႆးမၢတ်ႇၸဵပ်းသေ ယိင်းလူႉတၢႆထင်တီႈ။
ၵူၼ်းၼႂ်းပိုၼ်ႉတီႈမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၵႂႃႇမွၵ်ႈ 11 မူင်းၼႆႉ ။ မီးၵူၼ်းမႃးငွႆးယိုဝ်း ၵူၼ်း 2 ၵေႃႉ ဢၼ်မႃးၼွၼ်းတီႈႁူင်းႁႅမ်းၼၼ်ႉ ။ ၸၢႆးၵေႃႉၼိုင်ႈလႄႈ ယိင်းၵေႃႉၼိုင်ႈ။ ပေႃးတူၺ်းၵႃးဢၼ်ၶဝ်ၶီႇၼၼ်ႉတႄႉ လႅပ်ႈတေပဵၼ်ၸုမ်းပျီႇတူႉၸိတ်ႉ။ ၸုမ်းဢၼ်မႃးယိုဝ်းတႄႉ ၸုမ်းလႂ်ၵေႃႈဢမ်ႇႁူႉ။ သဵင်ၵွင်ႈမၼ်းလင်ၼႃႇ ပေႃးတူၵ်းၸႂ်တိုၼ်ႇ ။ ၶဝ်သွင်ၵေႃႉၼၼ်ႉသမ်ႉ တေဢွၵ်ႇၵႂႃႇတၢင်းၼွၵ်ႈၼႆသေ မိူဝ်ႈဢွၵ်ႇႁူင်းႁႅမ်းမႃးၼၼ်ႉ ၺႃးယိုဝ်းဢေႃႈ ။ ၸၢႆးၵေႃႉၼၼ်ႉတႄႉ ၺႃးယိုဝ်းတီႈႁူဝ်မႃႇသေ လႅၼ်ႈၶဝ်ႈၵႂႃႇ တၢင်းၼႂ်း ႁူင်းႁႅမ်းၶိုၼ်း။ ၵိုတ်းၼၢင်းယိင်းၵေႃႉၼၼ်ႉၵူၺ်းဢေႃႈ လႅၼ်ႈဢမ်ႇတၼ်းပူၼ်ႉ ၺႃးယိုဝ်းၼမ်ဢေႃႈ ၸင်ႇဝႃႈတၢႆပႅတ်ႈ ” – ဝႃႈၼႆ။
ၼၢင်းယိင်းဢၼ်ၺႃးယိုဝ်းတၢႆၼႆႉ ဢႃယု မီး 22 ပီ ၊ ၵူၼ်းၸၢႆးၵေႃႉဢၼ်မၢတ်ႇၸဵပ်းၼၼ်ႉ ဢႃယု မွၵ်ႈ 30 ပၢႆ ။
ၵူၼ်းၼႂ်းပိုၼ်ႉတီႈမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ၵွင်ႈဢၼ်ၶဝ်ယိုဝ်းၼႆႉ လႅပ်ႈတေပဵၼ်ၵွင်ႈၸၢၵ်ႈ ဢမ်ႇၼၼ် ၵွင်ႈယၢဝ်းၶႃႈဢေႃႈ ။ ၶဝ်မႃးငွႆးယိုဝ်းလၢႆၵေႃႉတႄႉ ဢမ်ႇႁူႉ ဢမ်ႇႁတ်းလုၵ်ႉတူၺ်း ။ မူႇၸေႊၼႆႉ လီၵူဝ်ၼႃႇ ဢမ်ႇမီးလွင်ႈႁူမ်ႇလူမ်ႈ သေဢိတ်းယဝ်ႉ” – ဝႃႈၼႆ။
မိူဝ်ႈဝၼ်းတီႈ 27/8/2023 ၼၼ်ႉၵေႃႈ ၼၢင်းယိင်းၵူၼ်းႁဵတ်းၵိၼ်ၵၢၼ် လႅၵ်ႈငိုၼ်းၼႂ်းၵၢတ်ႇၵေႃႉၼိုင်ႈ တီႈမူႇၸေႊ ၺႃးၸုမ်းဢမ်ႇႁူႉၾၢႆႇ ယိုဝ်းသေ ႁိမ်ဢဝ်ငိုၼ်းမၼ်းၼၢင်းၵႂႃႇ ၼႆယဝ်ႉ။
 ၼႂ်းပွၵ်ႉၵွင်းၼွင် မူႇၸေႊၼၼ်ႉ ၺႃးၸုမ်းဢမ်ႇႁူႉၾၢႆႇငွႆးယိုဝ်း ၸၢႆးမၢတ်ႇၸဵပ်းသေ ယိင်းလူႉတၢႆထင်တီႈ။){kind=link}