ၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇဝႆႉ တီႈမူႇၸေႊၼၼ်ႉ မိူဝ်ႈလဵဝ်မႆႈၸႂ်ႈႁိူၼ်းယေးၼႆသေ ပွၵ်ႈၶိုၼ်းႁိူၼ်း။
မိူဝ်ႈႁၢင်လိူၼ်ဢေႃႊၵတ်ႉသ်ၼၼ်ႉ သိုၵ်းမၢၼ်ႈယိုတ်းမိူင်းလႄႈတင်းသိုၵ်းတဢၢင်း TNLA ပိုတ်းယိုဝ်းၵၼ် ႁၢဝ်ႈႁႅင်းသေ ၵူၼ်းမိူင်းၸေႊလၢၼ်ႉလႄႈၸိူဝ်းယူႇႁိမ်းႁွမ်း လႆႈၶၢႆႉပၢႆႈၼပ်ႉႁူဝ်ပၢၵ်ႇ။မိူဝ်ႈလဵဝ် မႆႈၸႂ်ႁိူၼ်းယေးၼႆသေ ၸိူဝ်းပၢႆႈမႃးသွၼ်ႈယူႇဝႆႉတီႈဝတ်ႉၵျွင်းပွၵ်ႉႁူဝ်ၼႃး ၸႄႈဝဵင်းမူႇၸေႊၼၼ်ႉ ပွၵ်ႈၶိုၼ်းႁိူၼ်းလူၺ်ႈတၢင်းမႆႈၸႂ် ၼႆယဝ်ႉ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းၼႂ်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်သိမ်းၶူဝ်းလဵင်းၶဝ်သေ လုၵ်ႉတီႈၵျွင်းႁူဝ်ၼႃးၼၼ်ႉသေ ပွၵ်ႈၶိုၼ်းၽွင်ႈယဝ်ႉဢေႃႈ။ထိုင်မိူဝ်ႈလဵဝ် သိုၵ်း TNLA တိုၵ်ႉယူႇဝႆႉ ၼႂ်းဝၢၼ်ႈဢၼ်ၶဝ်မိူဝ်းၼႆႉလႄႈ ဢမ်ႇလိူၵ်ႈၶၢဝ်းယၢမ်း ၸၢင်ႈပဵꧣ်ၢင်တိုၵ်းၵၼ်လႆႈဢေႃႈ။ၵူၺ်းၼႃႇ ၶဝ်သမ်ႉ မႆႈၸႂ်ႁိူၼ်းၶဝ် ၵွပ်ႈဝႃႈ ပွႆႇဝႆႉႁေပၢႆႈမႃးႁိုင်လႄႈ မႆႈၸႂ်ႁိူၼ်းယေးၽႂ်မၼ်းၵေႃႈႁင်းမၼ်းၼၼ်ႉၼႃႇၼေႃႈ ” – ဝႃႈၼႆ။
ၵူၼ်းပၢႆႈၽေးသိုၵ်းၸိူဝ်းမႃး သွၼ်ႈယူႇဝႆႉတီႈ ဝတ်ႉၵျွင်းႁူဝ်ၼႃး မူႇၸေႊၼႆႉ မီးလၢႆဝၢၼ်ႈ မိူၼ်ၼင်ႇ ဝၢၼ်ႈၼမ်ႉၵတ်း ၊ ဝၢၼ်ႈမႆႉသၵ်း လႄႈ ၵူၼ်းၼႂ်းၸေႊလၢၼ်ႉၵမ်ႈၽွင်ႈ တင်းသဵင်ႈႁူဝ်ၵူၼ်း ဢမ်ႇယွမ်း 200 ။ၶၢဝ်းတၢင်း ၵူၼ်းပၢႆႈၽေးသိုၵ်းသွၼ်ႈယူႇဝႆႉ တီႈဝတ်ႉၵျွင်းၼၼ်ႉ မီးၸုမ်းပရႁိတလၢႆၸုမ်း မႃးၸွႆႈထႅမ်ပၼ် လႆႈႁူႉၼင်ႇၼႆ။
လိူဝ်သေၵူၼ်းဝၢၼ်ႈၸိူဝ်းယူႇႁိမ်းႁွမ်းၸေႊလၢၼ်ႉပွၵ်ႈၶိုၼ်းႁိူၼ်းယဝ်ႉ မိူၼ်ၼင်ႇ ၵူၼ်းမိူင်းၼႂ်းၸေႊလၢၼ်ႉၵေႃႈ ယွၼ်ႉငဝ်းလၢႆးလၢႆလွင်ႈလၢႆဢၼ်သေ ၶိုၼ်းပွၵ်ႈၶိုၼ်းႁိူၼ်းယေးၽႂ်မၼ်းၵေႃႈမီးၼႆယဝ်ႉ။
ၾၢႆႇတၢင်းမူႇၸေႊတႄႉ သဵင်ၵွင်ႈယဵၼ်ယဝ်ႉသေတႃႉ ပွတ်းတၢင်းသႅၼ်ဝီ ၊ ၵူတ်ႉၶၢႆ ၸိူဝ်းပုၼ်ႉသမ်ႉ သိုၵ်းမၢၼ်ႈယိုတ်းမိူင်းတင်း သိုၵ်းတဢၢင်း TNLA တိုၵ်းၶဵင်ႈၶႅင်ၵၢၼ်သိုၵ်းတေႃႇၵၼ်ထႅင်ႈႁၢဝ်ႈႁႅင်း။ယွၼ်ႉပၢင်တိုၵ်းၸိူဝ်းၼႆႉသေ မီးလွင်ႈတုမ်ႉတိူဝ်ႉ ၵူၼ်းဝၢၼ်ႈၵူၼ်းသူၼ်လႄႈ ၶူဝ်းၶွင်ႁိူၼ်းယေးလူႉၵွႆလူႉသုမ်း။
မိူဝ်ႈဝၼ်းတီႈ 6/9/2023 ၼၼ်ႉၵေႃႈ သိုၵ်းမၢၼ်ႈတင်းၸုမ်းယိၵ်းၵွင်ႈၵၢင်ႇၸၢဝ်းၶိူဝ်း ပိုတ်းယိုဝ်းၵၼ် တီႈႁိမ်းဝၢၼ်ႈၼွင်မွၼ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
