ၼၢင်းဢွင်ႇသၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်း ဢၼ်ထုၵ်ႇသိုၵ်းမၢၼ်ႈတီႉၺွပ်းၵုမ်းၶင်ဝႆႉတီႈၼေႇပျီႇတေႃႇၼၼ်ႉ ဢမ်ႇယူႇလီလႄႈ ယူႇတီႈၸၢတ်ႈၸိုင်ႈလုမ်ႈၾႃႉ တုၵ်းယွၼ်းႁႂ်ႈပွႆႇပၼ်တႃႇလုမ်းလႃးတူၺ်းထိုင် ၼႆ သိုဝ်ႇ VOA ဢွၵ်ႇဝႆႉ ၼင်ႇၼႆ။

 ၵႅမ်ၽူႈၼမ်းၼႂ်းၸၢတ်ႈၸိုင်ႈလုမ်ႈၾႃႉ ( ကုလသမဂ္ဂ အတွင်းရေးမှူးချုပ်ရဲ့ လက်ထောက်) လၢတ်ႈတီႈပၢင်သပ်းၸႅင်ႈ ၶၢဝ်ႇဝႃႈ – “ ၵူၼ်းဢၼ်ၺႃးၵုမ်းၶင်ၵူႈၵေႃႉၼႆႉ  တၵ်းလႆႈမီးၵၢၼ်တူၺ်းထိုင် လုမ်းလႃး တႃႇပၢႆးယူႇလီ။ ၼႆႉပဵၼ် ပိုၼ်ႉ ထၢၼ်သုၼ်ႇလႆႈသုၼ်ႇပဵၼ်ၵူၼ်းယဝ်ႉ။ လွင်ႈဝႃႈ ၵူႈၵေႃႉမႆႈၸႂ် ဢွင်ႇသၢၼ်းၸူႉၵျီႇ ၼၼ်ႉၵေႃႈ လၢတ်ႈဝႆႉ ပွင်ႇ လႅင်းထိုင်ၵၼ်လီယဝ်ႉ” –  ဝႃႈၼႆ။

ၼႂ်းႁူဝ်လိူၼ်ၼႆႉ  ဢွင်ႇသၢၼ်းၸူႉၵျီႇ   ပဵၼ်ၶဵဝ်ႈၸဵပ်းႁိူၵ်ႇၵႂ်ႈ  ၶဝ်ႈၼမ်ႉတၢင်းၵိၼ်ၵေႃႈ ဢမ်ႇၵိၼ်လႆႈလီလီ ၊ ႁႅင်းၵမ်ႉတူဝ်ဢႄႇလႄႈ ပၢႆးယူႇလီဢမ်ႇတဵမ်ထူၼ်ႈ။

တႃႇလုမ်းလႃးပၢႆးယူႇလီၼၢင်းဢွင်ႇသၢၼ်းၸူႉၵျီႇ ဢႃယု 78 ပီၼႆႉ ၽူႈၵဵဝ်ႇၶွင်ႈၶဝ် တုၵ်းယွၼ်းႁႂ်ႈ သိုၵ်းမၢၼ်ႈလူတ်းယွၼ်ႇသေ ပၼ်တိုဝ်ႉတၢင်း ႁႂ်ႈမၼ်းၼၢင်းလႆႈၵႂႃႇၸူးမေႃယႃၾၢႆႇၼွၵ်ႈ ၊ လႆႈသုၼ်ႇလုမ်းလႃးပၢႆးယူႇလီဝႃႈၼႆသေတႃႉ ၾၢႆႇသိုၵ်းမၢၼ်ႈယိုတ်းမိူင်း  ဢမ်ႇၽွမ်ႉဝႃႈၼႆ။

ၸၢတ်ႈၸိုင်ႈလုမ်ႈၾႃႉတုၵ်းယွၼ်းႁႂ်ႈသိုၵ်းမၢၼ်ႈပွႆႇပၼ်  ဢွင်ႇသၢၼ်းသူႉၵျီႇ လႄႈ ၽူႈဢွၼ်ႁူဝ်ၵၢၼ်မိူင်းလၢႆလၢႆၵေႃႉ ဢၼ်ၺႃးတီႉၺွပ်းၵုမ်းၶင်ဝႆႉၼၼ်ႉ ။

မိူဝ်ႈဝၼ်းတီႈ 9/7/2023 ၼၼ်ႉတႄႉ ၽွင်းလူင်ၾၢႆႇၼွၵ်ႈမိူင်း မိူင်းထႆး ၻွၼ်ႊ ပရမူတ်ႉဝိၼႆး ႁွတ်ႈထိုင်မိူင်းမၢၼ်ႈသေ ႁူပ်ႉထူပ်းၸုမ်းသိုၵ်းမၢၼ်ႈယဝ်ႉ တူဝ်မၼ်းၸၢႆးၵႂႃႇထူပ်း ၼၢင်းဢွင်ႇသၢၼ်းၸူႉၵျီႇ ထိုင်ၼႂ်းၶွၵ်ႈ။  

သွင်ၶႃဢုပ်ႇၵၼ်လွင်ႈသင်လၢႆလၢႆဢၼ်ဝႃႈၼၼ်ႉ ၾၢႆႇသိုၵ်းမၢၼ်ႈၵေႃႈဢမ်ႇဢွၵ်ႇၶၢဝ်ႇပဵၼ်တၢင်းၵၢၼ်။ ၾၢႆႇတၢင်းထႆးၵေႃႈဢွၵ်ႇၶၢဝ်ႇဝႃႈ – ဢွင်ႇသၢၼ်းၸူႉၵျီႇ ပၼ်ႁႅင်းလွင်ႈပၢင်ၵုမ်ဢႃႊသီႊယၼ်ႊ။ မၼ်းၼၢင်းယူႇလီယူႇ – ၼႆၵူၺ်း။