သိုၵ်းမၢၼ်ႈ ယိုတ်းမိူင်း ဢဝ်ရူတ်ႉၵႃးၶုတ်းလိၼ် Backhole မႃးၶုတ်းယႃႉသဵၼ်ႈတၢင်းပႆ ၵူၼ်းပိုၼ်ႉတီႈ တၢင်းၸဵင်ႇၸၢၼ်းဝၼ်းတူၵ်း ဝဵင်းသႅၼ်ဝီ ႁဵတ်းႁႂ်ႈၵူၼ်းပိုၼ်ႉတီႈ ၵႂႃႇမႃးထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း။

ဝၼ်းတီႈ 29/8/2023 ယၢမ်းဝၢႆးဝၼ်း 4:30 မူင်း သိုၵ်းမၢၼ်ႈ တပ်ႉ 16 ဢဵၼ်ႁႅင်း 15 ၵေႃႉ ဢဝ်ၵႃး ပႅၵ်ႊႁူဝ်ႊ လမ်းၼိုင်ႈ မႃးၶုတ်းလုၵ်း ယႃႉပႅတ်ႈ သဵၼ်ႈတၢင်းပႆၵူၼ်းမိူင်း တၢင်းဢိူင်ႇမိူင်းလီ ၾၢႆႇၸဵင်ႇၸၢၼ်းဝၼ်းတူၵ်း ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇႁႅင်း တႃႇတေႃႉၶူဝ်းသူၼ်ဢွၵ်ႇၶၢႆ ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဝ်ၵႃးမႃးၶုတ်းလုၵ်း ယႃႉတၢင်းပႅတ်ႈ ဢၼ်ပဵၼ်သဵၼ်ႈတၢင်းႁဝ်းၶႃႈ ပႆယူႇတႃႇသေႇၼႆႉ မၼ်းပဵၼ်သဵၼ်ႈတၢင်းၵၢႆႇၸူးဝဵင်းၵမ်းသိုဝ်ႈလႄႈ ယၢမ်းလဵဝ် ႁဝ်းၶႃႈ ဢမ်ႇၸၢင်ႈ ၵႂႃႇမႃးယဝ်ႉ။ ဢၼ်ၶဝ်မႃးၶုတ်းဝႆႉၼၼ်ႉ လုၵ်းမၼ်း တေလိုၵ်ႉမွၵ်ႈ 2 ၸူဝ်ႈၵူၼ်းၼႆႉ။ တၢင်းၵႂၢင်ႈမၼ်း တေမီးၼိုင်ႈၼႃႈလႂ် 4 ဝႃး မွၵ်ႈ 40 ထတ်းပၼ်ႇမူၼ်းၼႆႉၶႃႈ”- ဝႃႈၼႆ။

မူႇဝၢၼ်ႈ ၵူၼ်းမိူင်းၼႂ်းပိုၼ်ႉတီႈ ဢၼ်ဢမ်ႇၸၢင်ႈၵႂႃႇမႃးၼႆႉ တေပဵၼ်ဝၢၼ်ႈႁူဝ်တူင်ႈ၊ ဝၢၼ်ႈၼႃးၵေး၊ ဝၢၼ်ႈၼမ်ႉဢၢင်၊ ဝၢၼ်ႈ မိူင်းပၢင်၊ ဝၢၼ်ႈၵွင်းၵေႃႇ၊ ဝၢၼ်ႈၼွင်ၸွမ်ႇလႄႈ ဝၢၼ်ႈၽၢႆမွင်ႉ ၸိူဝ်းၼႆႉ လင်ႁိူၼ်း တင်းမူတ်း ဢမ်ႇယွမ်း 200 လင် ႁူဝ်ၵူၼ်းၼပ်ႉႁဵင် ဢမ်ႇၸၢင်ႈၵႂႃႇမႃး ၼႆယဝ်ႉ။

“ယွၼ်ႉသင်လႄႈ ၶဝ်မႃးယႃႉႁဵတ်းလုၵ်းပႅတ်ႈ ၸိူင်ႉၼႆၼႆႉ ႁဝ်းၶႃႈ ဢမ်ႇလႆႈႁူႉၸွမ်းလွင်ႈတၢင်းမၼ်းၶႃႈ ယၢမ်းလဵဝ် ၶဝ်ႁဵတ်း ႁႂ်ႈႁဝ်းၶႃႈ ၵူၼ်းမိူင်းဢမ်ႇၸၢင်ႈၵႂႃႇမႃးၼၼ်ႉၶႃႈယဝ်ႉ။ ပိုင်ႈၽူႈယႂ်ႇၵူၼ်းလူင်ႁဝ်းၶႃႈ ၸွႆႈလၢတ်ႈပၼ်ၶဝ်၊ ႁႃတၢင်းဢွၵ်ႇပၼ် ဢိတ်းၼိုင်ႈ တႃႇႁဝ်းၶႃႈ တေတေႃႉမၢၵ်ႇၶဝ်ႈတဝ်ႈၼမ်ႉ ၶူဝ်းသူၼ် ဢွၵ်ႇၶၢႆၼႂ်းဝဵင်း ၸိူဝ်းၼႆႉၶႃႈဢေႃႈ”- ၵူၼ်းပိုၼ်ႉတီႈ ဝဵင်း သႅၼ်ဝီ သိုပ်ႇလၢတ်ႈၼႄၼင်ႇၼႆ။

တၢင်းပွတ်းတွၼ်ႈ ၸဵင်ႇၸၢၼ်းဝၼ်းတူၵ်း ဝဵင်းသႅၼ်ဝီၼႆႉသမ်ႉ မီးဝႆႉ ၸုမ်းယိပ်းၵွင်ႈၵၢင်ႇ မိူၼ်ၼင်ႇ သိုၵ်းၵူဝ်းၵၢင်ႉ MNDDA တင်း ၸုမ်းတဢၢင်း TNLA ၸိူဝ်းၼႆႉ တူင်ႉၼိုင်ဝႆႉ။ မိူဝ်ႈႁူဝ်လိူၼ်ဢေႃႊၵတ်ႊသ်ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းၵူဝ်းၵၢင်ႉ ပဵၼ်ပၢင်တိုၵ်းၵၼ်မႃး ၵမ်းၼိုင်ႈ။ ဢိင်ၼိူဝ် လွင်ႈၼႆႉသေ သိုၵ်းမၢၼ်ႈ ဢဝ်ၵႃးပႅၵ်ႉၶူဝ်း မႃးၶုတ်းလုၵ်း ယႃႉ ပႅတ်ႈသဵၼ်ႈတၢင်းၼႆႉၵေႃႈ ၸၢင်ႈပဵၼ်လႆႈ ၵူၼ်းပိုၼ်ႉတီႈလၢတ်ႈ။