ၸုမ်းလုၵ်ႉၽိုၼ်ႉၼွင်ႁၢႆးယႃႈလၢႆၸုမ်း ဢွၵ်ႇလိၵ်ႈသၢၼ်ၶတ်းသိုၵ်းမၢၼ်ႈယိုတ်းမိူင်း ဢၼ်တေႁဵတ်းပွႆးၽြႃး ၸၢမ်ၵဝ်ႈ တွၼ်ႈလူင်းမိူင်း(ဖောင်တော်ဉီးဗုဒ္ဓပူဇနိယ)။

သိုၵ်းမၢၼ်ႈယိုတ်းမိူင်း ပိုၼ်ႈၽၢဝ်ႇ တေၸတ်းႁဵတ်းပွႆးၽြႃးၸၢမ်ၵဝ်ႈတွၼ်ႈလူင်းမိူင်း ( ဖောင်တော်ဉီးဗုဒ္ဓပူဇနိယ)ၼႆလႄႈ ၸုမ်းလုၵ်ႉၽိုၼ်ႉ တီႈၼွင်ႁၢႆးယႃႈလၢႆၸုမ်း ႁူမ်ႈၵၼ်ဢွၵ်ႇလိၵ်ႈသၢၼ်ၶတ်းၼႆယဝ်ႉ။ တႃႇဢွၵ်ႇလိၵ်ႈသၢၼ်ၶတ်းၼႆႉ ၸုမ်းလုၵ်ႉၽိုၼ်ႉၼွင်ႁၢႆးယႃႈ ႁူပ်ႉဢုပ်ႇဢူဝ်းၵၼ် ၼိူဝ်ဢွၼ်ႊလၢႆႊ မိူဝ်ႈဝၼ်းတီႈ 26/8/2023 ၼၼ်ႉၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇသၢၼ်ၶတ်းၼၼ်ႉ ပႃးဝႆႉဝႃႈ – “ လွင်ႈဢၼ် သိုၵ်းမၢၼ်ႈယိုတ်းမိူင်း ၶႃႈႁႅမ်ၵူၼ်းလူႉႁၢႆတၢႆၼမ် ၊ လွင်ႈၽဝ်ၾႆးၸုတ်ႇႁိူၼ်းလူႉသုမ်းၼမ်၊ လွင်ႈၸႂ်ႉၶိူင်ႈမိၼ်တိုၵ်း ပွႆႇမၢၵ်ႇပိုတ်းယိုဝ်းသေ ဢွင်ႈတိႈ ၵိူဝ်းယမ်သႃႇသၼႃႇ မိူၼ်ၼင်ႇ ၵွင်းမူး ၊ ၽြႃး ၊ ဝတ်းဝႃးၽႃသိူဝ်ႇ ၸိူဝ်းၼႆႉ လူႉၵွႆၼမ် ၸဵမ်ၸိူဝ်းၼႆႉ ႁူႉၵၼ်ဝႆႉယဝ်ႉ။ ထိုင်မိူဝ်ႈလဵဝ် ၾၢႆႇၶဝ်သမ်ႉ တေဢၢၼ်းၸတ်းႁဵတ်းပွႆးၽြႃးၸၢမ်ၵဝ်ႈတွၼ်ႈလူင်းမိူင်း ( ဖောင်တော်ဉီးဗုဒ္ဓပူဇနိယ)ၼႆလႄႈ ၶဝ်ဢၢၼ်းဢဝ်လွင်ႈၼႆႉ ႁဵတ်းၼႃႈတိူဝ်ႈမၼ်းသေ ပဵၼ်တႃႇဢဝ်ၼမ်ႉမျၢတ်ႈၼမ်ႉတွၼ်းၵၢၼ်မိူင်းၼၼ်ႉယဝ်ႉ” – ဝႃႈၼႆ။

သိုၵ်းမၢၼ်ႈယိုတ်းမိူင်း ပၼ်ႁႅင်းဢီး ႁႂ်ႈၵူၼ်းပိုၼ်ႉတီႈၼွင်ႁၢႆးယႃႈ ၸတ်းႁဵတ်း ပွႆးၽြႃးၸၢမ်ၵဝ်ႈတွၼ်ႈလူင်းမိူင်း ၼႂ်းဝၼ်းတီႈ 15/10/1023 မႅၼ်ႈဝၼ်းလိူၼ် 11 မႂ်ႇ ၼိုင်ႈၶမ်ႈ တေႃႇထိုင်ဝၼ်းတီႈ 15/11/2023  တႃႇၶၢဝ်းတၢင်း ၼိုင်ႈလိူၼ်ၼႆယဝ်ႉ။

ဢိင်ၼိူဝ်လွင်ႈၼႆႉ ဢူးၼေႇမျူဝ်း ၵူၼ်းၼႂ်း CRPH လၢတ်ႈၵႂႃႇ ၼႂ်းပၢင်ဢုပ်ႇဢူဝ်းၸုမ်းလုၵ်ႉၽိုၼ်ႉလႄႈၸုမ်းၾၢႆႇသႃႇသၼႃႇ ၼၼ်ႉဝႃႈ – “ ၸုမ်းဢၼ်ယႃႉလူႉလႅဝ် ဝတ်ႉဝႃးၽႃသိူဝ်ႇ ၊ ႁဵတ်းႁၢႆႉဢွင်ႈတီႈသႃႇသၼႃႇ ၸိူဝ်းၼၼ်ႉသေ သမ်ႉတေႁဵတ်းၶိုၼ်း တၵႃႇၵျွင်းဢမ်ႇၼၼ် ၸဝ်ႈတႃႇၼႃႉၼႆ မိူၼ်ၶဝ်သုပ်းၼႃႈၵၢပ်ႇသေ ႁဵတ်းၼႄၵၢၼ်လီ ၸိူင်ႉၼၼ်ၵွႆး ” – ဝႃႈၼႆ။

ၼွင်ႁၢႆးယႃႈၼႆႉ ပဵၼ်ၼွင်သၽႃႇဝ ဢၼ်ယႂ်ႇသုတ်းၼႂ်းမိူင်းႁူမ်ႈတုမ်။ ၵူႈပီပူၼ်ႉမႃးမီးၶႅၵ်ႇၼွၵ်ႈမိူင်းၼႂ်းမိူင်းမႃးဢႅဝ်ႇယဵမ်ႈၵူႈပီလႄႈ ပဵၼ်တီႈဢၼ်ႁႃငိုၼ်းၶဝ်ႈမိူင်းၼမ်သူတ်း။

ၼႂ်းၸုမ်းလုၵ်ႉၽိုၼ်ႉၼွင်ႁၢႆးယႃႈ ဢၼ်ႁူမ်ႈၵၼ်သေ ဢွၵ်ႇလိၵ်ႈသၢၼ်ၶတ်းသိုၵ်းမၢၼ်ႈယိုတ်းမိူင်းပွၵ်ႈၼႆႉ ပႃးဝႆႉ IPDF ၸုမ်းၵႅတ်ႇၶႄၵူၼ်းမိူင်းၼွင်ႁၢႆးယႃႈ ၊ IFDM ၸုမ်းတူင်ႉၼိုင်ၾႅတ်ႊတရႄႊၼွင်ႁၢႆးယႃႈ လႄႈ IWU ၸုမ်းၽွမ်ႉႁူမ်ႈၼၢင်းယိင်းၼွင်ႁၢႆးယႃႈ ၸဵမ်ၸိူဝ်းၼႆႉ ။