ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သွင်မေႈလုၵ်ႈ ထုၵ်ႇၵူၼ်းႁၢႆႉ 3 ၵေႃႉ ၶိုင်ဢၢင်ႈတီႉၺွပ်း တေဢဝ်ၵႂႃႇပဵၼ်တူဝ်ယိူဝ်ႇ ၵူၺ်းၵႃႈ ဢမ်ႇတၼ်းတီႉလႆႈၵႂႃႇ ဝႃႈၼႆ။
မိူဝ်ႈဝႃး ဝၼ်းတီႈ 28/8/2023 ယၢမ်းႁူဝ်ၶမ်ႈ 6:40 မူင်း ၼၢင်းသႅင်ပၼ် ထုၵ်ႇၵူၼ်းႁၢႆႉ 3 ၵေႃႉ ၶီႇၵႃး (Crown) မႃးလမ်း ၼိုင်ႈသေ လၢၵ်ႈၸၼ်မၼ်းၼၢင်း ၶိုင်တီႉၺွပ်းဢဝ်သႂ်ႇၵႃးၶဝ်ၵႂႃႇ တီႈပွၵ်ႉသၼ်သၢႆး ဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း။
ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ ၶီႇၵႃး (Crown) သီၶၢဝ်မႃးၵိုတ်း တီႈ ၼႃႈႁိူၼ်း ၼၢင်းသႅင်ပၼ် လမ်းၼိုင်ႈသေ လူင်းၵႃးၶဝ်မႃးယဝ်ႉ ၶဝ်ႈၵႂႃႇၼႂ်းႁိူၼ်းမၼ်းၼၢင်းၵမ်းလဵဝ် ၵူၼ်းႁၢႆႉ 3 ၵေႃႉ ၼၼ်ႉ ဢဝ်ၵွင်ႈငႃ လၢၵ်ႈလၢၵ်ႈၸၼ်ၸၼ်မၼ်းၼၢင်း ဢွၵ်ႇမႃးၼႂ်းႁိူၼ်း တေၶိုင်တီႉၺွပ်းဢဝ်တူဝ်မၼ်းၼၢင်းသႂ်ႇ ၵႃးၵႂႃႇ ၵူၺ်းၵႃႈ တၼ်း လၢၵ်ႈမၼ်းၼၢင်း ဢွၵ်ႇမႃးၼႃးႁိူၼ်းၵူၺ်းၶႃႈ ဢမ်ႇတၼ်းတီႉၺွပ်းလႆႈၵႂႃႇ ႁဵတ်းၼၼ်ၵေႃႈ ၵူၼ်းႁၢႆႉ 3 ၵေႃႉၼၼ်ႉ ၶီႇၵႃးၶဝ် သေ ႁေႃႈပၢႆႈၵႂႃႇၶႃႈဢေႃႈ”- ဝႃႈၼႆ။
ၵူၼ်းႁၢႆႉ 3 ၵေႃႉၼၼ်ႉ ပဵၼ်ၽူႈၸၢႆး ပူၵ်ႉၼႃႈ သႂ်ႇမူၵ်ႇႁူဝ် ၵူႈၵေႃႉ လိူဝ်ၼၼ်ႉ ယိပ်းၵွင် ႈပွတ်းၵၼ်သေ ငႃသႂ်ႇၼၢင်းသႅင် ပၼ် တီႈၼႂ်းႁိူၼ်းၼၼ်ႉ မိူဝ်ႈၽွင်းၼၼ်ႉ ၵေႃႉပဵၼ်ၸဝ်ႈၽူဝ် ၸၢႆးတုၺ်ႈသမ်ႉ ဢ မ်ႇယူႇႁိူၼ်း မီးဝႆႉ ၼၢင်းသႅင်ပၼ်လႄႈ လုၵ်ႈယိင်းဢွၼ်ႇ ဢႃယု 5 ၶူပ်ႇ ၵေႃႉၼိုင်ႈသေ ယူႇဝႆႉၵူၺ်း ဝႃႈၼႆ။
“ယၢမ်းလဵဝ် တီႈတႃႈၶီႈလဵၵ်းၼႆႉ ဢမ်ႇမီးလွင်ႈႁူမ်ႇလူမ်ႈသင်သေဢိတ်းၶႃႈယဝ်ႉ ပေႃးပဵၼ်လႆႈတႄႉ ၶႂ်ႈႁႂ်ႈပျီႇတူႉၸိတ်ႉ ၼႂ်း ပိုၼ်ႉတီႈၶဝ် ႁႂ်ႈသႂ်ႇၸႂ်ဢဝ်ႁူမ်ႇလူမ်ႈပၼ်ၼႂ်းပွၵ်ႉၼႂ်းယွမ်ႇၽွင်ႈ။ ၾၢႆႇပလိၵ်ႈၶဝ်ၵေႃႈ မိူၼ်ၵၼ် ႁႂ်ႈတူၺ်းပၼ် လွင်ႈႁူမ်ႇလူမ်ႈ ၵူၼ်းမိူင်းၽွင်ႈ ယၢမ်းလဵဝ် ၵူၼ်းမိူင်းၼႆႉ ဢမ်ႇမီးလွင်ႈႁူမ်ႇလူမ်ႈ ဢမ်ႇမီးတီႈၸႂ်ယႂ်ႇသင်ၶႃႈယဝ်ႉ”- ၵူၼ်းပိုၼ်ႉတီႈ ဝဵင်းတႃႈ ၶီႈလဵၵ်း သိုပ်ႇလၢတ်ႈၼႄၼင်ႇၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီပၢႆမႃးၼၼ်ႉ ၼႂ်းၸႄႈဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႇ လိူင်ႇၼမ်ႁႅင်း ရူတ်ႉၶိူင်ႈၵူၼ်းမိူင်း ႁၢႆၵူႈဝၼ်း၊ ၵူၼ်းသူႇသမ်းၵိၼ်ယႃႈမဝ်းၵမ် ၵေႃႈၼမ် ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ဢုၼ်ႇ ၸႂ်သင် ၵူၼ်းပိုၼ်ႉတီႈလၢတ်ႈ။
မိူၼ်ၼႆ ၼင်ႇၵဝ်ႇ ပူၼ်ႉမႃး ဝၼ်းတီႈ 17/7/2023 ၼၼ်ႉ ၸၢႆးၼေႃႇၶမ်း ဢႃယု 24 ပီ ၵူၼ်းဝၢၼ်ႈသီႇၼေႃႇမႂ်ႇ ဢိူင်ႇမိူင်း ၵူဝ်း ၸႄႈဝဵင်းတႃႈၶီႈလဵၵ်း ၼၼ်ႉၵေႃႈ မီးၵူၼ်းၵပ်းၾူၼ်းၸူးဝႃႈ ၶႂ်ႈတူၺ်းၵႃးၼႆသေ မၼ်းၸၢႆး ဢဝ်ၵႃး ၵႂႃႇၼႄတီႈတၢင်း ၼႃႈႁူင်းႁႅမ်းသူၺ်ႇပူးတီးၼၼ်ႉ ထုၵ်ႇၵူၼ်းႁၢႆႉ တီႉၺွပ်းတူဝ်ၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ