သိုၵ်းမၢၼ်ႈ ယိုတ်းမိူင်းတင်း PDF ပဵၼ်ပၢင်တိုၵ်းၵၼ် တီႈဝဵင်းၼွင်ၶဵဝ်ထႅင်ႈႁၢဝ်ႈႁႅင်း ၵူၼ်းပၢႆႈၽေးသိုၵ်း ဢမ်ႇယွမ်း 100 ။
ဝၼ်းတီႈ 26/8/2023 ယၢမ်းၵၢင်ၼႂ်မွၵ်ႈ 10:45 မူင်း သိုၵ်းမၢၼ်ႈ တင်း သိုၵ်း PDF ပဵၼ်ပၢင် တိုၵ်းၵၼ် တီႈႁိမ်းဝၢၼ်ႈႁူဝ်ၶူဝ် ဢိူင်ႇႁူဝ်ၶူဝ် ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁဵတ်းႁႂ်ႈ တုမ်ႉတိူဝ်ႉ ၵူၼ်းဝၢၼ်ႈႁူဝ်ၶူဝ်၊ ဝၢၼ်ႈႁူဝ်ၶၢႆးလႄႈ ဝၢၼ်ႈၵုင်းၵျီး လႆႈပၢႆႈၽေးသိုၵ်း 110 ၵေႃႉ မူၵ်းသွၼ်ႈယူႇတီႈၵျွင်မုၼ်ၸဝ်ႈ။
ၵူၼ်းဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ တပ်ႉ 252 လႄႈ 257 တင်း ၸုမ်းၵႅတ်ႇ ၶႄ ၵူၼ်းမိူင်း MDY – PDF ယိုဝ်းၵၼ်ၶႃႈဢေႃႈ။ PDF သမ်ႉ ယူႇတၢင်းၾၢႆႇဢွၵ်ႇဝၢၼ်ႈႁူဝ်ၶူဝ် ယိုဝ်းၵွင်ႈလူင်သႂ်ႇ။ သိုၵ်းမၢၼ်ႈၼၼ်ႉသမ်ႉ ယူႇတၢင်းၾၢႆႇၸၢၼ်းဝၢၼ်ႈသေ ယိုဝ်းသႂ်ႇ သွင်ၾၢႆႇပဵၼ်ပၢင်တိုၵ်းၵၼ် တႄႇဢဝ်ယၢမ်းၵၢင်ၼႂ် 10:45 မူင်းထိုင် 11:05 မူင်းၶႃႈဢေႃႈ”- ဝႃႈၼႆ။
ဝၢႆးၼၼ်ႉ သိုၵ်းမၢၼ်ႈ ဢဵၼ်ႁႅင်းမွၵ်ႈ 100 ထႅမ်ႁႅင်းသိုၵ်း တူင်ႉၼိုင်ၶဝ်ႈမႃးၼႂ်းဝၢၼ်ႈႁူဝ်ၶူဝ်သေ မႃးႁိုၵ်ႉၺႃးၵၼ်ထႅင်ႈ မွၵ်ႈၶၢဝ်းယၢမ်း ဝၢႆးဝၼ်း 3 မူင်း 15 မိၼိတ်ႉ သွင် ၾၢႆႇ ပိုတ်းယိုဝ်းၵၼ်ထႅင်ႈ ၵမ်ႈၼိုင်ႈ။
“ လွင်ႈမၢတ်ႇၸဵပ်းလူႉတၢႆတႄႉ ဢမ်ႇလႆႈႁူႉ။ ၵူၺ်းၵႃႈၵူၼ်းဝၢၼ်ႈႁူဝ်ၶူဝ်၊ ဝၢၼ်ႈႁူဝ်ၶၢႆးလႄႈ ဝၢၼ်ႈၵုင်းၵျီး လႆႈပၢႆႈၽေးသိုၵ်းၵႂႃႇသွၼ်ႈဝႆႉတီႈ ဝတ်ႉၵိဝ်ႇဢၢင်း မီး 110 ။ ႁၢၼ်ႉတေႃႇထိုင်ယၢမ်းလဵဝ် ပႆႇႁတ်းပွၵ်ႈမူတ်း တိုၵ်ႉၵိုတ်းဝႆႉ ဢိတ်းဢွတ်းယူႇၶႃႈ။ ယၢမ်း လဵဝ် သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇၶႃႈ”- ၵူၼ်းပိုၼ်ႉတီႈ ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 5-22/4/2023 ၶၢဝ်းတၢင်း 18 ဝၼ်းၼၼ်ႉ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ် တၢင်းၸဵင်ႇႁွင်ႇဝၼ်းတူၵ်း ဝဵင်းၼွင်ၶဵဝ်။ ပၢင်တိုၵ်းၼႆႉ တုမ်ႉ ယွၼ်ႈၵူၼ်းပိုၼ်ႉတီႈႁၢဝ်ႈႁႅင်း ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်လႄႈ ပွႆႇမၢၵ်ႇလူင်သႅၼ်း 120 မမ ယိုဝ်းသႂ်ႇ။ ႁိူၼ်းယေး ၵူၼ်း ဝၢၼ်ႈလူႉၵွႆ ဢမ်ႇယွမ်း 20 လင်၊ ၵူၼ်းမိူင်းၺႃးၸၢၵ်ႇလူႉတၢႆ ၸွမ်း 3 ၵေႃႉ၊ မၢတ်ႇ 4 ၵေႃႉလႄႈ ပၢႆႈၽေးသိုၵ်း ဢမ်ႇယွမ်း 1,500 ၵေႃႉ။
“ဝၢႆးၶဝ် ပဵၼ်ပၢင်တိုၵ်းၵၼ်ယဝ်ႉၼၼ်ႉ သိုၵ်းမၢၼ်ႈ မႃးပၵ်းတီႈတၢင်းၽႄၼွင်ၶဵဝ် – ပၢင်ႇဢူႈ တီႈဝၢၼ်ႈႁူဝ်ၶူဝ်ၼၼ်ႉသေ ပႂ်ႉ ၵူတ်ႇထတ်း ၵူၼ်းမိူင်းၵႂႃႇမႃး ႁၢဝ်ႈႁႅင်း မိူၼ်ၼင်ႇ လုၵ်ႉလႂ်မႃး၊ တေၵႂႃႇတီႈလႂ်၊ တေၵႂႃႇႁဵတ်းသင် ယဝ်ႉၵေႃႈ သွၵ်ႈတူၺ်းၸွမ်း ၼႂ်းၵႃး ၼႂ်းရူတ်ႉၶိူင်ႈ ၸိူဝ်းၼႆႉပႃး။ လိူဝ်ၼၼ်ႉ ၸႅတ်ႈတူၺ်းပႃးမၢႆၾၢင်ထႅင်ႈ ပေႃးပဵၼ် – နခတ (နိုင်) ၁၃ – တႄႉ ဢမ်ႇပေႃးမီး ပၼ်ႁႃ။ သင်ဢမ်ႇၸႂ်ႈမၢႆၾၢင် ၁၃/ ၼႆႉၸိုင် ၶဝ်တေၺွပ်း ၸႅတ်ႈထၢမ်ၵမ်းလဵဝ် ၶဝ်ၸႂ်ႉ ၶၢဝ်းတၢင်းႁိုင်လိူၼ်ပၢႆၶႃႈ ၶဝ်ၵူတ်ႇ ထတ်းၼႆႉ။ ဝၢႆးသေ ၶဝ်ဢွၵ်ႇၵႂႃႇၶိုၼ်းယဝ်ႉ ၸုမ်း PDF ၼႆႉ မႃးၶိုၼ်းသေ ၸင်ႇပဵၼ်ပၢင်တိုၵ်းၵၼ်ၶိုၼ်းၶႃႈဢေႃႈ”- ၵူၼ်းပိုၼ်ႉ တီႈ ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။
ဝၼ်းတီႈ 27/8/2023 ၼႆႉ သိုၵ်းမၢၼ်ႈ ယိုတ်းမိူင်းတင်း MDY – PDF (ဝဵင်းလိူဝ်ႇ) တိုၵ်ႉထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်း ၵၼ်ဝႆႉယူႇ တၢင်းပွတ်းဢိူင်ႇႁူဝ်ၶူဝ်လႄႈ ဢိူင်ႇၵုင်းၵျီး ၸိူဝ်းၼႆႉဝႆႉ ဝႃႈၼႆ။
