မိူဝ်ႈၼႆႉ ဝၼ်းတီႈ 28/8/2023 ယၢမ်းၵၢင်ၼႂ် 10 မူင်းပၢႆ ၸုမ်းသိုၵ်းမၢၼ်ႈ တင်းသိုၵ်းတဢၢင်း TNLA ၶဵင်ႈၶႅင်ၵၢၼ်သိုၵ်းတေႃႇၵၼ်ႁၢဝ်ႈႁႅင်း ပွႆႇမၢၵ်ႇသႂ်ႇၵၼ် ႁိမ်းဝၢၼ်ႈထမ်ႈ ၾၢႆႇ ၼိူဝ်ၸေႊလၢၼ်ႉ ဢမ်ႇယွမ်း 10 ၵမ်း ။
ၵူၼ်းၼုမ်ႇ ၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သဵင်မၢၵ်ႇတႅၵ်ႇၼႆႉ10 ၵမ်းပၢႆ ။ လုၵ်ႈဢွၼ်ႇဢၼ်တိုၵ်ႉၶိုၼ်ႈၵျွင်းဝႆႉ တီႈၸေႊလၢၼ်ႉၼၼ်ႉၵေႃႈ လုၵ်ႈၽႂ် လုၵ်ႈမၼ်း ဢွၼ်ၵၼ်မႃး ႁပ်ႉမိူဝ်းႁိူၼ်းၽႂ်မၼ်းၶိုၼ်းမူတ်းယဝ်ႉၶႃႈ ” – ဝႃႈၼႆ။
သိုၵ်းမၢၼ်ႈတင်းသိုၵ်းတဢၢင်း TNLA ၼႆႉ ၶဵင်ႈၶႅင်ၵၼ်ႁၢဝ်ႈႁႅင်း ၸဵမ်မိူဝ်ႈဝႃးလႄႈ ၵူၼ်း မိူင်းၸိူဝ်းယူႇသဝ်းၸွမ်း ဝၢၼ်ႈၼွင်သႅင် ၊ ၸေႊလၢၼ်ႉ ၸိူဝ်းၼႆႉ ဢွၼ်ၵၼ် ၼႅတ်ႈၶၢႆႉပၢႆႈ ယူႇဝႆႉတီႈမူႇၸေႊ။
ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ ဢၼ်မုင်ႈႁၼ်တႄႉ မၢၵ်ႇလူင်ၼႆႉ လႅပ်ႈတေၵႂႃႇတိူဝ်ႉသႂ်ႇ ၵျွင်းၼိူဝ်လွႆတေးမိူင်း ဢၼ်မီးၾၢႆႇၸၢၼ်းၸေႊလၢၼ်ႉၼၼ်ႉ ႁူၺ်ႇၼိုင်ႈဢေႃႈ။ ဢမ်ႇႁူႉဝႃႈ ၸွင်ႇတေတိူဝ်ႉၵူၼ်းမၢတ်ႇၸဵပ်း။ ငိၼ်းဝႃႈတႄႉ တီႈၼိူဝ်လွႆၼၼ်ႉ မီးၸုမ်းသိုၵ်း TNLA ၵူၺ်းၼႆဢေႃႈ ၵူၼ်းမိူင်းလႄႈသင်ႇၶႃႇၸဝ်ႈတႄႉ ဢမ်ႇမီး။ သိုၵ်းမၢၼ်ႈၼႆႉ ယူႇတၢင်းႁွင်ႇၸေႊလၢၼ်ႉ တီႈလွႆသူးတွင်းၼၼ်ႉသေ ယိုဝ်းဢေႃႈ ” – ဝႃႈၼႆ။
မိူဝ်ႈဝၼ်းတီႈ 25/7/2023 ၼၼ်ႉၵေႃႈ သိုၵ်းမၢၼ်ႈ တင်း သိုၵ်း TNLA ပိုတ်းယိုဝ်းၵၼ်ႁၢဝ်ႈႁႅင်း တီႈၵၢတ်ႇဝၢၼ်ႈၼမ်ႉဢုမ် ၸႄႈဝဵင်းမူႇၸေႊ ၸၢၵ်ႇမၢၵ်ႇၵွင်ႈ တူၵ်းသႂ်ႇႁိူၼ်းၵူၼ်းမိူင်း မီးလွင်ႈလူႉသုမ်း ၵူၼ်းမိူင်းတူၵ်းၸႂ်ၵူဝ်ႁႄ။