ၼၢင်းယိင်းမူႇၸေႊ ၵူၼ်းႁဵတ်းၵၢၼ်လႅၵ်ႈငိုၼ်းၵေႃႉၼိုင်ႈ ၺႃးယိုဝ်းသေ ထုၵ်ႇၸူၼ် ဢဝ်ငိုၼ်း။
မိူဝ်ႈဝႃး ဝၼ်းတီႈ 27/8/2023 ယၢမ်းၵၢင်ၼႂ် 8 မူင်းၼၼ်ႉ ၼၢင်းယိင်းၵူၼ်းႁဵတ်းၵိၼ်ၵၢၼ် လႅၵ်ႈငိုၼ်းၼႂ်းၵၢတ်ႇၵေႃႉၼိုင်ႈ တီႈမူႇၸေႊ ၺႃးၸုမ်းဢမ်ႇႁူႉၾၢႆႇ ယိုဝ်းသေ ႁိမ်ဢဝ်ငိုၼ်းမၼ်းၼၢင်းၵႂႃႇ ၼႆယဝ်ႉ။
ၵူၼ်းၼႂ်းပိုၼ်ႉတီႈမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၸၢႆးမွၵ်ႈ 3 ၵေႃႉၼႆႉ ၶီႈရူတ်ႉၶိူင်ႈ သွၼ်ႉၵၼ်မႃးသေ ယိုဝ်းသႂ်ႇ မၼ်းၼၢင်း ။ ငိုၼ်းၵေႃႈ ၶဝ်ၸူၼ်ဢဝ်ၵႂႃႇမူတ်း။ ၼၢင်းယိင်းၵေႃႉၼၼ်ႉၵေႃႈ လိူတ်ႈဢွၵ်ႇၼမ်ၼႃႇႁေ ၵႂႃႇတၢႆတီႈႁူင်းယႃဢေႃႈ ” – ဝႃႈၼႆ။
ၼၢင်းယိင်းဢၼ်ၺႃးယိုဝ်းၼႆႉ ဢႃယု မီး 45 ပီ ပဵၼ်ၵူၼ်းႁဵတ်းၵိၼ်ၵၢၼ်လႅၵ်ႈငိုၼ်း ၶႄႇ ငိုၼ်းမၢၼ်ႈ ၼႂ်းၵၢတ်ႇၸႄႈဝဵင်းမူႇၸေႊ ၵူၼ်းဢၼ်မႃး ပိုတ်းယိုဝ်းၵႂႃႇၼႆႉၵေႃႈ ပဵၼ်မူႇလႂ် ၸုမ်းလႂ်ၼႆ ပႆႇမီးၽႂ်ႁူႉတႅတ်ႈတေႃး။ ငိုၼ်းဢၼ်ပႃးၵႂႃႇၼၼ်ႉမွၵ်ႈ 3 မိုၼ်ႇယႂၼ်ႊ ၵူၼ်းပိုၼ်ႉတီႈလၢတ်ႈၼင်ႇၼႆ။
မႄႈၸဝ်ႈႁိူၼ်း ၵူၼ်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ငဝ်းလၢႆးဝၢၼ်ႈမိူင်း မိူဝ်ႈလဵဝ်ၼႆႉ ပေႃးဢမ်ႇႁဵတ်းၵၢၼ်ၵေႃႈ ဢိုပ်း ။ ပေႃးႁဵတ်းၵၢၼ်သေ မီးငိုၼ်းမီးတွင်းမႃးၵေႃႈ သမ်ႉမီးၵူၼ်းမႃးၸူၼ်ႁိမ်ဢဝ်ၸိူင်ႉၼႆ တႃႇတေႁဵတ်းၵၢၼ်သင်ၵေႃႈ ဢမ်ႇထၢင်ႇႁၢင်ႈယဝ်ႉၶႃႈ လႆႈၵူဝ်ယူႇၵူႈမဵဝ်း ” – ဝႃႈၼႆ။
ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းႁဵတ်းပၢႆးမၢၵ်ႈမီးၼႂ်းမူႇၸေႊ ၵမ်းၵမ်းၺႃး ပိုတ်းယိုဝ်းၶႃႈတၢႆလႄႈ ၸဝ်ႈပၢႆးမၢၵ်ႈမီးၵမ်ႈၼမ် တႃႇမီးလွင်ႈႁူမ်ႇလူမ်ႈၼႆသေ ဢွၼ်ၵၼ်ၶၢႆႉပၢႆႈ ၵႂႃႇႁဵတ်းၵၢၼ်ၸွမ်း တႃႈၵုင်ႈ ၊ ဝဵင်းလိူဝ်ႇ ၸိူဝ်းၼႆႉ။
ၼႂ်းၸႄႈဝဵင်းမူႇၸေႊၼႆႉ မီးၸုမ်းယိပ်းၵွင်ႈၵၢင်ႇ မီးလၢႆလၢႆၸုမ်း မိူ ၼ်ၼင်ႇ TNLA , SSPP / SSA လႄႈ MNDAA ၸဵမ်ၸိူဝ်းၼႆႉ။
